نفيسه بوبار والعولمة

نفيسه بوبار والعولمة
في جلسة الجبنه نفيسه قاعده سارحه ما ذي عوائده . النسوان شغالين فت وشمار تقيل ما خلو زول و نفيسه ماذي عوائده سارحة في عالم تاني
سعاد/هوووي يا نفيسه مالك الحاصل عليك شنو .علي طلقك وما قادره تتكلمي . ولا في زول مات .حيرتينا يابت امي ما من عاداتك تسكتي قدر ده الله يكفينا شر سكاتك
نفيسه/ احي يابنات امي سارحه في الدنيا العامله فينا عمايل . رضينا بالفقر وما رضيان بينا. شفتو يوم بكي ناس فاطمه النسوان ديل عاملات كيف يسون كده التقول جايات من كوكب تاني .كل واحده شايله ليها تلفون قدر ده وتشخط وانا اعاين لي دي ولي ديك ويفتحو في الاسمو شنو؟ وستاب وجنس حاجات تحير .وكمان الفيس كل واحده عندها كوم اصحاب من داخل والخارج. الا نحنا من بيت بكا لي دي ولدت ودي عيانه . ودي طهرت عياله .من صدقه لي صدقه غير اكل البليله واللقيمات ما عندنا شئ
سعاد/ والعمل يانفيسه قالو المخروب ده تمنه غالي .يعرس لي راجلك مرتين
نفيسه/ يعرس ركبيك هسع الجاب سيرة العرس شنو؟ هو علي المكعوج ده في كرتيلا ما بقطعو فيه قال يعرس قال. والجابو التلفونات ديل لي ماعرسو رجالم اتنين بدل التلفونات
غايتوه انا عايزه تلفون بدل الربيكا الشايله ومربوط بي لستك بخجل عديل لمن امرقه قدام النسوان
علويه/ خلاص يانفيسه عشان ما تجيك نفسيات ندور خته لكن يانفيسه نعمل الخته تصرفي الاولي وتعملي يعع
نفيسه/ ما من عمايلكم لو كان عندكم راس وبفكر ما كان بحصل ليكم كده
كالعاده عملت الخته ونفيسه صرفت ويا عمارة السلام جاك زول . غايتو اشترت ليها واحد مستعمل وجات قاشره بيهو . من جات يامحمد اعمل لي فيس يامحمد اعمل لي وستاب .كل شويه التلفون في الشاحن ونفيسه تصنقر تتنظره .خلت الوراها والقدامه .خلت المرقه والشمار . والبيت بقت حالتو حاله ذي بيوت الاشباح قاطعت الكل وبقت قصاد تلفونه
سعاد/ يانفيسه يختي كده ما بيجي . خلي بالك من نفسك وبيتك .عايني بقيتي هفتانه كيف التقول ضاربك اروي
علويه/ والله كلامك صاح نفيسه كملت تب وعيونه من السهر لمن بقن صغار .الله يكون في عونك يانفيسه
نفيسه/ ياحروم مالكم قالبنه بيت بكي وان سلم العود الشحم بيعود .وب علي من الشفتو والله انحنا ما كنا عايشين عملت لي اصحاب سماحة شنو ونضافت شنو تقول ملايكه عديل ناس بيض ونضاف ما ذي علي الكملان من لحم الدنيا ماشي وحافرين ليهو قبره
في اللحظة ديك يدخل علي ويسمع كلام نفيسه
علي/ انتظرتك تعقلي وتخلي البتسوي فيهو ده مانفع . اولادك جاعو وبقو مشردين عديل .احسن تنعدلي والا اتصرف
نفيسه/ حتعمل شنو يعني خوفتني احمد الله انا قاعده مع راجل مكعوج وبشبه ابو قنفت والله الرجال الشفتهم فرق وانت فرق والله انت من فصيله انقرضت زمان
خلي طولة لسانك انت ما شحديني عديل عشان اعرسك غربلتي شارع بيتنا وبعد ده عايزه تقولي علي مكعوج زمان ما شفتيه والله انت من نوع النسوان المبنفع فيهم وانا المكعوج ده بجيب مرة قمر عديل وتشوفي يانفيسه من هسع بيت ابوك تمي شخيطك هناك