نفيسة بوبار وفطور العريس

نفيسة بوبار وفطور العريس
الكل مستعد لزواج بت نفيسه. جابو ليها الشيله ما خلو شئ. الماكولات تفتح بقاله خليك من الدهب والمال ربط ربط . ونفيسه قاعده تقلب في عيونها وتفك في بخور اللبان خوفا من العين
*علويه / اها يا نفوس الليله ندق الريحه ونتخارج من الموضوع ده عشان نتفرغ للحاجات التانيه
*نفيسه/ الريحه تطير في حاجات اهم منها خلوها لي يوم الخميس
*سعاد/ اجي يانفيسه يختي كل ما نقول نعمل حاجه بتقولي خلوها ليوم الخميس هو يوم الخميس نعمل فيهو شنو ولا شنو والله يجي العرس وانحنا في محلنا ده
*علويه/ خلاص خلينا نجهز عدة فطور العريس والخبائز عشان ما ننزنق
*نفيسه/ شنو شنو فطور شنو يانسوان ياخرفانات والله انا مافي شئ بيقظني غير فطور العريس، وكمان اخر تقليعه بوده بي موسيقة الجيش الله الجيش اليحتكم والله ده كلام
في زمنا كان اسمو القدح وفيه حاجات مبسطه ، لكن هسع البجيبو العريس برجعو ليهو لو اصلا الحكاية كده احسن لينا عرس الكوره
*علويه / والله الزمن اتغير وكان ما وديتي فطور عريس بشيلو حسك ونسابتك وما بحترمو بتك
*سعاد/ يانفوس اعقلي الراجل ده ما قصر قيم بتك في اي شئ ، انتي ما تقصري فطور العريس عاده، ما ممكن انتي يانفيسه لمن تجي عليك تلغي ويوم زواج بت علويه انت اول واحده اصريتي علي الفطور وانك تمشي توديه اشمعنا هسع لمن بقي عليك تغيري رايك
*نفيسه/ كنت مجنونه وعقلت لقيتها عادات ممكن نحن نغيره يانسوان ، انحن البنخلق البدع ونصر عليها وده الخلي بناتنا ببورو وما يعرسوهم والله انا قررت قرار وما برجع فيه
اجتمعوا نسوان الحله في بيت نفيسه لمناقشة موضوع الفطور بحكم امرهم شوره
*فاطمه/ والله انا جاياك من الحله الوراء لمن سمعت خبرك انك ما عايزه تؤدي الفطور ، جيت اعقلك وأم العريس بي هناك فايره ومندلقه وتقول انها قصرت معاك في شنو
*نفيسه/ والله يا فاطمه عايزه اتكلم معاك بي صراحه انت عندك كم بت
فاطمه / اربعه
نفيسه/ مالن شينات ماذي القمر ، تعرفي لي بايرات . عشان مافي زول من الشباب بقدر علي كل التكاليف دي اخير ياحروم تعقلن وام العريس انا بمشي ليها
وتمشي سعاد وعلوية ونفيسه لام العريس
نفيسه/ انا جيت وكل امل تفهمي الحاصل شنو القصه ما قصة فطور وانا والله ما غالبني اعمل ليك ذي العادات دي واكثر ، لكن انت عارفه لو نفيسه عملت حاجه الكل بباريها بدون ما يشغل مخو دحين يختي لازم نتخلي عن هذه العادات
*حلوم/ والله انا ما عندي شغله وعازمه ضيوف ومعتمده علي الفطور ، وكل الجابو ولدي رسلتو ليك اكثر من كده اعمل شنو
*نفيسه/ عندك كم بت
حلوم اربعه سهام اكبر من ولدي العايز يعرس وتلاته بعد ه
*نفيسه/ اها ياحلوم ده ذاتو الكلام البقول فيهو من قبيل الشيله والطلبات الزياده دي البورت البنات هسع لو اي واحده ختت الرحمن في قلبه ورفضت العادات القبيحه دي مافي بت بتبور
*حلوم/ والله كلامك صاح من الليله تاني فطور عريس مافي لا في حلتنا ولا في الحلال المجاورة وشعارهم لا يجينا فطور عريس ولا نوديه
نفيسه/ عليك الله شوف النسوان الفارغات ديل الحاجات دي استفيد منها ولا اعملها بوبار بتي تعبت فيها لمن قرت الجامعه وبقت مهندسه قدر الدنيا تشيله ساي وكمان الجبتو ارجعوا لا فالح
بعد ما تم العرس نفوس اشتغلت قدر ظروفك والبيع بالجمله والقطاعي