في ربيع في رجب السماني (زي العجب)!

على صفيح ساخر نادر التوم
في ربيع في رجب السماني (زي العجب)!
• توطئة : توقَّفْتُ عن الكتابة الراتبة في الرياضة بعد إستقالتي من رئاسة تحرير صحيفة (الزاوية)
• و عدت (لِماماً) لأكتب كلما كان هناك مناسبة، في صحيفتي (فرفشة)
• توقَّفتْ فرفشة و توقفتُ عن الكتابة الرياضة و بعدت تماماً لكنَّني أعود عبر فرفشة مرة أخرى
• و هذه المرة إلكترونياً.. أسعد بمتابعتكم و أشكر كل من سأل عن الصفيح الساخن.
• تسخينة: لا فريق لا قناة، لا حول و لا قوة؟
• تسخينة تانية : نقطة هدفين جُداد.
• مضى المريخ خطوات في طريق الصعود للمرحلة المقبلة
• وأمضى غريمه خطوات للوراء في طريق الخروج من الباب الخلفي
• – (المريخ غالب واحد)!
• – هي بَدَتْ؟
• – آآي و الله و السماني دوَّن
• صلينا المغرب و جينا ، السماني جاب تاني
• أصلاً السماني ما مفروض الزول يغفل منو .. بتاتاً
لي شنو؟؟
• خصَّص رئيس المريخ (التاني) مبلغ مليون دولار حافزاً للاعبين في حال هزيمة الهلال
• خفتُ و الله فلقد تعودنا في عهد الوالي أن ينهزم اللاعبون رغم الحوافز
• و تُرجع الحوافز بعد أن يتسَّلمها اللاعبون مُقدَّماً
• لكن الحمد لله فقد تبدَّدت مخاوفي، و طائر السمانِ يحط رحله مرتين في شباك الهلال
• كما جطَّ من قبل في أيام الإجتفال بميلاد الحبيب المصطفي صلى الله عليه و آله و سلم في ربيع
• و خلَّى الهلال يضيع
• و هاهو الآن يفعلها في رجب و يعمل العجب
• و لا عجب!
فنَّان
• الهلال دائماً يتأثَّر بالفنانين
• غنَّى له الفنانون و الفنانات فهزمه مازيمبي بالخمسات في المقبرة
• و الآن يبدو أن الهلال عاجباهو حكاية (النقطة) الحاصلة في الوسط الفني
• فهو متمسك بنقطته، مستمتع بها
• من 3 مباريات لم يزدها بتاتاً
• داخل أرضه أو خارجها
• بتاتاً
• مع نده التقليدي او المصري.. بتاتاً
• في جنوب أفريقيا.. إطلاقاً.
حصيلة تعبانة
• من 3 مبارات حصَّل الهلال نقطة واااحدة فقط
• نقطة بس #
• شعار الهلال الجديد
• بعد أن أخذ عاصم شعاره القديم و (قناته)
• و بقى الكاردينال سيد (البلد) و ليس الهلال
• و دا موضوع تاني بنرجع ليو إن شاء الله!
المقبرة إندفنت
• زمن طويل و الهلال لم يحقق فوزا في مقبرته بتاتاً
• في هذه المجموعة ( و هذا لصالحه) لم يؤدي سوى مباراة واحدة أمام الأهلي القاهري
• و حقق فيها فوزا
ما بتحتاج
• مرة تاني بقول :
• مليون دولار أولى بيها الإعدادات و تجهيز الإستاد
• لو كانت حافز في حال هزيمة الأهلي القاهري أو صن داونز جنوب الإفريقي في عقر دارهم
• لكانت أجدي و أفيد و أوصل و أعمق أثراً
• لكن حافز لهزيمة الهلال في (إستادنا) و (ملعبنا) فهي كتيرة
• كتيرة شديد
• لفريق تعودنا أن نهزمه في كل مناسبة و (بدون مناسبة)
• و بالمناسبة :
• الهلال قبل مباراة المصادفة الأخيرة لم يهزمنا من زمن الإنقاذ
• و نسى حاجة إسمها كاس الدوري الممتاز
• الموضوع ما بكلف مليون سوداني يا حازم و عادي شديد!
نار على نار
• المريخ حقق بطولة محمولة جوَّاً و الهلال طار بالجو برضو.
ساخر بارد
• وروني العدو و أقعدو فرَّاجة شعار الصاوي الكاوي سبب البلاوي
• الغربال كان عندو دافع لما جا من الهلال، و هسَّه بفتش لحافز اعادة تسجيله في الهلال
• حتى أقوانو بقى ما عندها طعم زي لما كان في المريخ.
• سؤال وجيه: معسكرين زمن في جنوب أفريقيا و مخسرين آلاف الدولارات للنقطة دي؟
• عرفتتوها أبيتو تدُّونا الإستاد نلعب فيو .. لكين هنا و هناك السماني برجاك!
هواء ساخن
• مباراة غدٍ (السبت) ستُحدِّد لحد كبير ملامح الفريق الثاني الذي سيشارك الهلال في الصعود
• صعود وين؟ في كونفدرالية هو؟
• الهلال خشَّ الكورة مهزوم لما إفتكر انو غالب غالب
• تغريدة: يوم الجمعة أحلى يوم.
• تدوينة: هسه دا السماني و لا السمَّاكم انتو؟ واحد نين سماني وين؟
• تخريمة: الأيام دي الموز أبو نقطة رخيييص و راااقد ما شاء الله راااقد سلطة زي الطماطم.
• و يظل المريخ الحاضر و المستقبل و التاريخ
• و ما يضير البحر أمسى زاخرا إن رمى فيه غلام بحجر؟
• المخدرات خطر داهم مكافحته مسؤولية الجميع
• آخر قطرة: الهلال حسابياً في البطولة زي ما نحن حسابيا (مرتباتنا ح تزيد)!
• اللهم صل و سلم و بارك على سيدنا محمد و آله و سلِّم
و هذه بصمتي