نفيسه بوبار وغلاء الاسعار
نفيسه بوبار وغلاء الاسعار
في جلسة جبنه كالعاده . نفيسه لامه نسوان الحله من الصباح علي اجتماع ضروري .يا حروووم اليوم لازم نعمل حاجه.السوق مولع نار وماعارفين نتصرف كيف .حتي بيت البكا المتعودين نقضي فيه وقت ماقادرين نصله المواصلات ولعت حتي الرصيد عشان تعزي بالتلفون الرصيد بقي ينقصو هو ذاتو بقي ممحوق. علبة بسكويت لولدك الصباح بقي مشكله . والله انا جاتني نفسيات عديل
سعاد/ تبري يختي من النفسيات .نحن من اكل الويكه بالماجي قري يجينا كوش . بقينا نشتهي اللحمه .حتي الكمونيه العفينانه بقت تتعزز علينا سعرنه عديل يختي
علويه/والله كلامكم صاح ياسعاد حتي قعدة الجبنه بقت مسيخه . البن ده بقينا نشم ريحته عند الجيران. عشان تجيبي ليك بن وسكر وفحم وووب علي من الفحم الاسود الله يسود عيشتو عايزه مبلغ وقدره اها يا اخواتي نعمل شنو
سعاد/ كان عملنا موكب المواكب بقت كتيره ومسيخه وما فيها فايده والحكومه في اضان طرش .والعجب الاسمو شنو داك البمبان واي منو انا جاتني ازمه عديل من شمو . ده خلينا من نلقاهو عديل بري يختي . احسن نخت الخمسه في الاثنين
نفيسه/ يانسوان ده ما زمن خوف . البلد فيها حريات .يعني اي زول يعبر عن الحاجه العاوزه . بطلو الجهل بتاعكم ده .ما تخافو من شئ .نحن النسوان عددنا كبير ومافي شئ مستحيل . خلاص يا اخوتي نعمل وقفه احتجاجيه . سامعه اي زول ما عاجبوه شئ يقوم يشوف ليه ركن يقيف فيهو ويكتب ورقه قداموه . نحن قبل اي شئ يا اخواتي لازم العالم كلو يشوف ناس نفيسه عايشين كيف
علويه/ والله يا اخوتي جاتني فكره طيب عشان الناس تعرف وقفتنا الاحتجاجيه نشوف لينا حته نعلن فيها
سعاد/ نشوف ولد نفيسه باقي مسلط اليوم كلو بشخط . تعال يامحمد كدي نستشيرك
نفيسه/ عايزين نعمل وقفه احتجاجيه . عايزين كل العالم يعرف نفيسه وصحباته عاملين وقفه احتجاجيه يوم ٢٨
محمد/ خلاص بنزله في الفيس . بس اوعي تكون ونسة جبنه واطلع انا الكضاب قدام العالم
علويه/ بري ياولدي ما كضب نحن جمعنا ناس حينا ونسوان الاحياء التانيه والكل واقف معانا
محمد/ خلاص بعمله وجيبو ليكم ورق كبار عشان نكتب فيهو كل واحده تجازف من المصارف حق الورقه
نفيسه/ عاد المجازفه صعبه لكن نعمل المستحيل
وبدا التجهيز للوقفه الاحتجاجيه
ياتري هل تتم الوقفه الاحتجاجيه اذا تمت هل تؤدي الغرض المقصود متها