نفيسه بوبار

نفيسه بوبار
الولاده المتعسره
في لمة جبنه كالعاده والكل مستمتع واخر شمار
* نفيسه
_ عاد يا اخواتي ما سمعتو الخبر قالو راجل فاطنه عرس زميلتو في الشغل عايز يجيب المرة تسكن معاها خلتو مشي الشغل جابت دفار ود أخته ونقلت العفش ما خلت حاجه شوف عيني خلت البيت خلا
* سعاد
_ يستاهل المافيهو فايده تعمل فيهو اكتر من كده
* علويه
_ مفروض يحصل لاي واحد عينو زايغه خلي يلقي حاجه يقعد فيها
( واثناء ما الشمار مدور صرخت عزه بت نفيسه وكانت في حالة ولاده اتلمو نسوان الحي خوفا من لسان نفيسه واتوجهو للمستشفي
دخلت نفيسه وهي تولول كر علي يابتي الما شفتي شئ وأنتي بتين بقيتي للتعب والجهجه
* الدكتور
_ ياوليه البتسوف فيهو ده شنو كدي طلعي كوم الحريم ده عشان نشوف المريضه
* نفيسه
_ المرض المايفك بتي عايزه تولد

* الدكتور
_ عارف هسع وينه فيكم العايزه تلد ، اتلفتو النسوان يعاينو لي بعض هي ويني بتي وب علي
( اتضح مع اللخمه ركبو جميع النسوان وخلوه عزه في البيت اضطرو رجعوا مرة اخري وكانت في حالة يرثي لها لولا ستر الله لضاعت بسبب الإهمال وشمار الوالده
نفيسه
_ قلبت الموضوع مناحه وب علي وكر علي دخلت عزه عمليه مستعجله ومما سمعو كلمة عمليه دورت نفوس ثكلي وسط مجامله عاصفه من الحروم وصارت المستشفي كانها بيت بكا
* علويه
_ ياخواتي البنعمل فيهو ده ماصاح في مرضي ومحتاجين هدؤ كدي سببنا ليهم ازعاج مفروض تمشي مجموعه مننا
* نفيسه
_ ازعاج شنو ياعلويه ده الله قدرك عليه ، لو ما جاملوني في وجعتي يجاملوني متين أنتي حقدك وحسدك ده اصلو ما بتخليه والله البتمشي فيكم الا تشوف وش نفيسه التاني حمرت للحريم اي واحده رجعت مكانه مواصله في الثكلي والنواح
* علويه
_ غايتو جنس جهل وانا ذاتي بتكلم مع منو عالم ما بتفهم
* نفيسه
_ علويه هوووي يا تقعدي وتمسكي خشمك والا يكون في كلام تاني ياربي الصبر …. ولا شايفه الحريم الجايت معاي عارفاك حاسده ساوه عيونك الحوص ديل
* سعاد
_ والله نحن عاملين ازعاج مفروض يقعدو مرتين تلاته والباقين يمشو وبتك ربنا يحلها بالسلامه
* نفيسه
_سعاد وعلويه اختوني انا هسع في حلل بتي
جاء الدكتور وقال ولد النسوان فكن الزغاريد وأخيرا حيمشو بيوتم
( الا تتفقون معي في العادات السيئه التي تمارس داخل المستشفيات وكأن الكل في رحله ترفيهيه