نفيسه بوبار

نفيسه بوبار والمناحه
وووب علي يا أخواتي علي النعيم أخوي الما شفت شئ في الدنيا الليله يوم السواد ياابو الجهال جدعتهن مشيت وين الليله الدنيا ضلمت علي وووب علي
* علويه
_ يانفيسه استغفري البتعملي فيهو ده شنو المناحه ماكويسه بتعذب الميت كفايه يانفوس البكا ما بجيب شئ
* نفيسه
_ وووب علي يا أخواتي ياحروووم خلوني ابكي وانوح أخوي وا سوادي الليله الرماد وينو اتكند ماخلاص الدنيا بعدك ضلام
* سعاد
_ رماد شنو والخرافات البتعملي فيها والله ما قايلاك جاهله قدر ده يانفوس حرام عليك البتسوي فيهو ده البركه في عياله
* نفيسه
_ المشكله في العيال الاتهملو وبقو أيتام الكان بضاري فيهم الليله مشيت وين يا اخوي
* علويه
_ استغفر الله العظيم
* نفيسه
_ قشت دموعه وتتحلف ياعلويه عشان ما ردحدن معاي أخوي أنا ما بكيت معاك ابوك وردحت لحدي ما الواطه صبحت انا عايزاكم تسدوني حقي واي واحده طالبها تجي تبكي وتردح لمن اقول ليها استغفري
( فجاءة المكان اتملئ بالحريم البتردح براها والكندكت راسه بالتراب نفيسه تعاين ابكن سمح يبكو عليكم انا قصرت معاكم في شنو ابكي لمن حسي انقرش البعرفو والما بعرفو ببكي معاكم ابكن لمن تسكنو مع أخوي
اها بعد البكي تشيلو معاي الحد ، أنتي ياعلويه حديت معاك ثلاثه شهور لابسه القنجا لمن علي عايز يطلقني ، وأنتي ياسعاد نسيتي لمن بكيت ابوك لحدي الصباح وحديت معاك أكثر من اربعه شهور عايزاك تكفيني حقي وما ينقص ولا يوم
* سعاد
_ نفوس أنتي عارفه لمن حدينا المرة الفاتت رجالنا سو ه شنو يانفوس عايزه تخربي علينا
* نفيسه
_ والله انا ما بهمني لو طلقوكم كلكن تحدن معاي وما عافيه ليكم حقي والله الما بتحد معاي بقاطعه ليوم الدين
( لم يكن امام الحريم الا الحد مع نفوس اها ياخونا رايكم شنو نحد مع نفوس ولا نتطلق نفيسه ختتنا بين خيارين كل واحد اصعب من التاني