نفيسه بوبار وموية رمضان

في جلسة جبنه كالعاده نفيسه اتحكرت وسألت علويه ، اها ياعلويه يختي رمضان قرب وشايفاك ما شغاله بالموضوع الشغله لا فكرتي في ابري ولا عده عايزه تملحي المره بعد ما ادتك راجل يضوي ذي القمر ، والله تشيل حسك بالحله والحلال التانيه ما شفتي عواطف موية رمضان كانت تشرف وأنتي ذاتك مشيتي معانا شفتي البذخ كيف
* سعاد
_ والله كلامك درر يانفوس الواحد لازم يتبع العادات وما يخالف عشان ما يكون اشتر ، ياعلوية كلام نفوس صاح احسن تستعدي من هسع لموية رمضان عشان تبيضي وش بتك قدام نسابته وأنتي عارفها مرة قادره ولسانه طويل غايتو كلمناك وذي ما قالو اسمع كلام الببكيك وانا ونفوس مستعدين من باكر نمشي معاك السوق ونجهزه معاك ونوصله لحدي بيت فاطنه
* علويه
_ هو يانسوان موية شنو البوديها وتشيل الوراي والقدامي ، يعني عشان جابت لي كم الف أقوم ارجعه ليها ونفضل يجيبو وانا ارجع والله ده خمت نفس عديل وعدم شغله وبتي ذاتها ما مقتنعه بي موية رمضان ، وانا ذاتي ابري ما عسته عشان بقي غالي اقوم اسوي عشان فاطمه تتجقمو تشرب السم انشاءالله
* نفيسه
_ وكت ما عندك مقدرة المره مشرباه السم مالك ده نقاصك مع الحريم جابت ليها سم والله كان اكلمه وأنتي عارفه نفيسه لمن تقول حاجه قدره وعشان ما يجيبو ليك انا أغسل كرعيني وامشي ليها واكلمه بي نقاصك
* سعاد
_ ماتبقي خرابة عامره يانفوس وتسببي مشاكل للبت وتفسخي خطوبته وتشيلي وش القباحه
* نفيسه
_ بشيلو طالما صحبتنا ناقصه وتجيب لينا الكلام علي صمة خشمنا وكلمتي ما راجعه فيها وبمشي يعني بمشي
* علويه
_ خليها تمشي ما هي اصلا متعوده علي الفتنن وفالحه في النقل ينقلوها المشرحه وانشاءالله الرهيفه التنقد
( ذهبت نفوس لبيت فاطنه قعدت واتحكرت )
* نفيسه
_ دحين يافطنه يختي نحن اتعودنا علي عادات ما بنقدر نخليها كنت هسع بتشاور مع الحريم في موية رمضان وعلويه لازم تجيبه ليك طالما اديته راجل ذي القمر ، تقوم الناقصة تقولي موية رمضان عادات لازم نتخلي عنها حلفت ليها أجي اكلمك
( في اللحظه دي جا داخل ولدها وسمع كلام نفوس
* محمد
_ والله مرة عاقله تحارب العادات دي الما عندها أي فايده عادات باليه ومفروض كلنا نحاربه
* نفيسه
_ هو ياولد انت شن خبرك بي شغلت النسوان دي حاجه اتعودنا عليها
* فاطمه
_ والله يانفوس ما تزعلي وانا ذاتي ما عايزها ، والحمدلله جهزت حاجات رمضان والزايد بقسمو ورمضان شهر خير ومفروض نحن ذاتو نختصر وما قالو شهر اكل ومويات هو شهر عباده وياداب علويه كبرت في نظري لان تفكيره ما رجعي
* نفيسه
_ ترجعي لي غادي خاتيه أنا الجيتك وتستاهلي علويه ما تجيب ليك موية رمضان
( اها ياجماعه موية رمضان عادات لازم نحاربه جميعا حتي لا تكون عب علي الجميع