نفيسه بوبار وكميةمن الافكار

نوال النور

الكثير من الناس اتعود عدم الابتكار وتشغيل مخه حتي ينتج ويبدع . وهذا السبب الذي جعل الاغلبيه تتشارك في شئ واحد
نفيسه جمعت نسوان الحله هووو يانسوان بدل قعدتنا الما نافعه دى أخير نعمل لينا حاجه مفيده.نعمل خته بدل قعدة الجبنه الكلها شمار وقطيعه. نحدد مبلغ معين نجازفو من حلة الملاح ونديه لواحده فينا تعمل بيهو مشروع تفيد بيهو نفسه وواوعو بعد ما تصرفو تديه للراجل والله بعرس بيها . طبعا الصرفه الأولي لي لاني صاحبة الفكرة
*سعاد/ والله عجب أنتي دائما يانفيسه انانيه وبتحبي نفسك ليه ما تكون لواحده فينا ما كلنا محتاجات والله ده كلام
* علويه / كلامك صاح ياسعاد انتي ما عارفه نفيسه عامله نفسه الكل في الكل لكن الدنيا دواره ونحن في كل مرة بنمشي راي نفيسه لاننا ما عندنا راي ولا فكر . لكن نفيسه ماشاءالله عليها افكاره سمحه وبنستفيد منها . عشان كده بنباريها
* نفيسه/ اتحكرت وعدلت جلسته والله انا ما عايزه ليكم غير تستفيدو . في راس كل واحده فيكم جزمه ما قاعدين تفكرو . لو شغلتو مخكم شوية كان بقيتو احسن مني . لكن ما علينا كل واحده تجازف الف في كل جلسه في نهاية الاسبوع تشيله واحده فينا وبالفعل استمر المشروع ونهاية الاسبوع استلمت نفيسه الخته يا سوق ليبا جاك نفر ماخلت شئ في يوم الجلسه نفيسه فرشت حاجاته وقالت هوووي يا نسوان العايزه تشيل حاجه تدفع جزء والباقي علي اقساط وبالفعل النسوان شالو كل الحاجات ودفعو نص القيمه نفيسه دفعت حق الخته وطوالي السوق
وفي الخته القادمه نفيسة باعت بضاعته وبقي النسوان شغالين دفع في الاسبوع القادم كل واحده جابت بضاعته وفرشت
*نفيسه/ هو يا نسوان العملتو ده شنو كل البضاعه ذي بعض هسع منو البشتري . ما كان تشغلو مخكم الظلت ده وتجيبو حاجه مختلفه نستفيد منها وننفع بعض . هسع نعمل شنو البضاعه كلها ذي بعض وده الماخرنا لحدي الان وما قادرين نتطور لو كل واحده شغلت مخها كان وصلنا العالميه ومن الليله ما عاوزه معاكم خته
*سعاد/ وقروشنا الفي بطنك نخلصه كيف
* نفيسه/ والله دي مشكلتكم .انا عملت الخته عشان اعمل مشروع وطالما المشاريع اتشابهت كل واحده تاكل ناره