نفيسه بوبار وحماة علي مستوي

نفيسه بوبار وحماة علي مستوي
نفيسه تفرك في حلته وتنقنق هو بتين بقي للعرس ، ما بعرف كوعو من بوعو ، ياهو ولدي الكبير وسندي ، ما خليت شئ ما عملتو عشان يكمل تعليمه ويساعدني ، بعت الكسره ومن دكان لي دكان، اتحرقت بي عواسة الابري للنسوان ، حتي يظهر بين اصحابه بمظهر كويس وما ينحرج ، منتظره تخرجه بي فارق الصبر ، واخر شئ بعد ما اشتغل ولمه القريشات قال شنو قال عايز يعرس زميلتو عشان ما تطير منو ، اريته تطير ما ترك الفقر النقر ، ما عارفه طلعت لي من وين ، الليله يومك اسود يانفيسه عرس قال
دخلت سعاد وعلويه ونفيسه الشرار يطاير من عيونه
* علويه قلنا نجي نشرب معاك القهوه ونتونس معاك باقي طولنا ما شفناك وانتي مختفيه في ظروف غامضه
* نفيسه تقهوه في السفاهه قهوة شنو العايزات تشربن معاي انتو جايبكم الشمار ، عارفاكم ما عندكم شغله غير نقل القولات من الاخر كده ولدي محمد عايز يعرس
* سعاد سجم خشمي يانفوس عرس شنو ، هو سوي ليك شنو عشان يعرس، الله يعوضك تعبك ياختي اه اه اه وتحولت الجلسه لي بكي ونواح
كان لازم سعاد وعلويه يجاملو نفيسه بي دمعتين وإلا هم عارفين لسانه الطويل
دخل عليهم راجل نفيسه وهم بالحاله ده
* علي مالكم ياحريم قالبنا مناحه ده كلو عشان محمد عايز يعرس مش تفرحو ليهو بدل المناحه دى لو جا محمد شافكم كده بطنو بتطم من العرس الولد ياحريم عايز يكمل نص دينو بدل ما يضيع ويباري الحرام ويجيب ليهو مرض ما يشفي منه، انتي يانفيسه ما سمعتي بالايدز قالو المرض ده ما منو شفي اخير تفقدي ولدك ويموت ولا تعرسي ليهو
نفيسه نططت عيونه والتلاته قالو العرس
اها حددو يوم الخميس يودو الشيله والعقد
* نفيسه يانسوان اسرعو البلد بعيده وانا ماعزمت غيرك ياعلويه وسعاد وتكلفت المواصلات غاليه تعرس ليهو مرتين بدل واحده ما كان اخير يعرس بت اختي لا تكلفة مواصلات ولا غيرو بي كرعينا بنسير
* علويه وبي علي يانفيسه مالقيتو الا المره البعيده دي وحات الله من الدقداق جاني كساح
* سعاد اخير انا اسكت عشان نفيسه ما تجوط فيني لكن وحاة الله انا انتهيت عديل ، توبي اتكرفس هسع نقابل ناس العروس كيف بي شكلنا ده
وبعد العقد جابو العروس نفيسه بقت تعاين وتقول مخير الله
أما علويه وسعاد بلو في خشمهم شمال ويمين
نفيسه باركت للعروس تحمر ليها وتقول في نفسه الطويله المعصعصه دي ادتنا المشوار الطويل ده اكيد لو غسلت وشها ما بتتاقابل والعوقه ولدي يتبسم كانو جاب ملكة جمال العالم التصبر لي كان ما طفشتها ما اكون نفيسه تاني يوم جو علويه وسعاد
* سعاد نفيسه أصبحت كيف من تعب السفر
* نفيسه تصبح قرده تعبنا راح علي الفاضي ، طويله ومعصعصه والسنون مارقات ماعارفه العجب محمد فيها شنو
* علويه واحتمال اخلاقه حلوه كدي لمن تعاشريها بتشوفي حاجات تعجبك
* نفيسه ياقشار تعالي سريع اعملي قهوه للضيوف وجيبي مويه اجيبوك للضبح
* نهي حاضر ياخالتي
* نفيسه خلال الشوك اظنك القهوه ما بتعرفي تسويها
* سعاد حرام يانفيسه البت لسه في شهر العسل
* نفيسه العسل الما تضوقه دي شبه عسل
نهي عملت كل شئ وقدمتو للضيوف وقالت ليها في حاجه تاني اعملها خالتي
* سعاد الشكل ما كل شئ يانفيسه جاتك بت اخلاقه
ماشاءالله
* علويه يانفيسه يختي اعصريه عليك بتكون من يدك ده لي دي ما بتندمي
عملت نفيسه ذي ما قالو صحباته رغم انها ما مقتنعه
بالفعل نهي اثبتت انها بت مازوجة ولد
ومن هنا نقول لو اي واحده اعتبرت نسيبتها ذي امها عاملته كويس حتي لو كانت كعبه بتلين وما بتحصل مشاكل ولكن اذا عملت العكس أكيد بتكون عايشه في مشاكل واحتمال تخرب بيتها بيدها