نفيسه بوبار والعريس المنتظر

نفيسه بوبار وسعاد وعلويه في جلسة الجبنه كالعاده
* سعاد
_ ولد فاطنه قالو جاي من أمريكا وقال عايز يعرس واحتمال الشهر الجاي بكون في السودان
* علويه
_ عاد يانفيسه جنس حاله يخلي بنات امريكا السمحات ويجي يعرس هنا في قريتنا الكان ربطو فيها الحمار يقوم جاري
* سعاد
_ والله كلام ، ديك مازي بناتنا يايمه جيه وسماحه وما زي الحلبيات الريحتم نحاس نحاس
* علويه
_ أنا غايتو بتي ما بقصر معاها من باكر يديها قروش تمشي تجيب أجود انواع الكريمات عشان تضوي ذي لمبة النايلون
* علويه
_ خليها تمشي مع بتي هي بتعرف محلات كتيره
* نفيسه
_ يختي دي منافسه لازم يكون كل شئ مختلف وانا عارفاك حاسده عايزها تكون زي بتي ما يقدر اختار بري بتي بتعرف السوق ما عميانه منو
* علويه
_ دائما مطلعانه حاسدات وراصدات انشاءالله يختار بتك المعصعصه الما بتشبه البنات مش كان اتفسخت وانجلخت
* نفيسه
_ هوووي ياعلويه مافي داعي للكلام البتقولي فيهو ده ماله بتي سيمه وقيمه الكلام علي بتك المافيها شئ بتفرز اخير بتي مقسمه
( استمرت مرحلة الجلخ والكل مستعد ان يقع عليها الإختيار عدا سعاد وبتها كان لديهم قناعات ان الجوهر اهم من المظهر )
حضر ولد فاطنه ماشاءالله عليه كسار عديل والبنات داخلات ومارقات التقول عرض ازياء وهو يتلفت ويعاين مافي واحده عجبته من كترت الاشياء المصنعه من الوان ومكياج صارخ
مشت سعاد وبتها لفاطمه ليسلمو علي ولدها في لحظه تعلق ببنت سعاد وبدا يسال عنها ووقع الإختيار عليها
* محمد
_ والله يا أمي البت دي هي العجبتني من دون البنات
*فاطمه
_ياولدي دي شربانه مافيها أي شئ يشبه البنات شوف بت علويه ونفيسه سماحة الدنيا عليهم
* محمد
_ يا امي ديل صناعيات أنا لو عاوز ذي ديل كنت اتزوجت من هناك ، بالفعل تم الإختيار وحددو موعد للزواج
* علويه
_ ووب علي يانفيسه تعبنا سااااي القروش الصرفناها لو دخلنا بيها صندوق ماكان احسن ولو اشترينا كبابي ساااي كان نفعتنا
* نفيسه
_ وا حسرت تعب بتي الما بتنوم الليل ، تحلم بالسفر لأمريكا وكنت ماشيه ليها هناك وحلمت معاها بالسفر لكن الله غالب لقته سعاد لا تعبت ولا اجتهدت ذينا ، ذي ما بقولو سعد الشينه هسع السمح فيها شنو عشان يعرسه
( فعلا الكلام علي الجوهر )
تم الزواج وسافرت بت سعاد الي أمريكا