نفيسه بوبار والشلب

نفيسه بوبار
ووب علي الليله احي يابنات امي يوم السواد يا نفيسه الله يصبرك يانفوس اتلمو نسوان الحله والكل يجامل نفيسه في الثكلي والكندكه بالتراب واحده فيهم ما كلمت نفسها بالسؤال عن السبب الخلي نفيسه تثكل وتلم الجيران
بعد تدخل العقلاء هدات نفيسه واخدت نفس عميق بعد استغفرت وشربت مويه
نفيسه / والله ياجماعه الموضوع خطير وانا مما سمعت اغنية ( يانساء العالمين اتعلمتو الشلب من وين ) بديت اشك في سلوك راجلي البشبه ابو القنفت وارقبو في الكبيره والصغيره لحدي ما يوم نسي تلفونو لقيت ليك رسايل ما بقدر اقول ليكم عليها وووب علي وووب علي
علويه/كدي يانفيسه اهدي الشلب بقي عادي اختك ممكن تشلب راجلك كدي خلينا نفكر ونتاكد بعد داك كلنا معاك يد واحده
سعاد/ اي كلامك صاح اول شي ما توريه انك شفت الرسايل عشان يتصرف بحريه بعد داك نبدا نراقبه في الصغيره والكبيره
وبدات عملية المراقبه سعاد في مكان العمل وعلويه من الشارع لحدي ما يصل العمل ونفيسه عليها تمويل العمليه
مر كم يوم وسعاد لم تصل لشي ولا علويه حتي وصلو مرحلة الياس
علوية في المراقبة اليوميه وقفت عربيه حدث وصاحبك ركب وهو يتبسم علوية طوالي وراه لمن وصل كافتريا واخد راحته طوالي عملت اتصال واتلمو الجماعه واولهم نفيسه
نفيسه/ عليكم الله المعصعصه دي احسن مني في شنو ولا عاجبو اللون المزيف وكمان عامله منشات ذي الكومر الخربان ( منشات رموش صناعيه)
علويه/ صدقيني يا نفيسه مافي شي يعجب وكمان لابسه متطلون انتي يانفيسه يختي غيري في شكلك شويه شعراتك الطايرات ولا توب الهزاز العامله لينا بيهو نفسيات
سعاد/ الكلام ليك يالمطير عينيك بدل ما تقولي الكلام ده لي نفيسه وتعملي ليها احباط هسع انحنا جينا لي شنو
وجا الجرسون اها طلبات الخالات شنو
الكل طير عيونو
نفيسه/ يخلل كريعك ما لقيت كلمه غير دي
سعاد/ اجي يا بنات امي انا لسه صغيره وجاهله واتلموا في الجرسون
راجل نفيسه لفت انتباه الصوت الما يغباه اتلفت لقي نفيسه وصحباته ومافي طريقه يتخارج
مي/ ديل شنو الناس الما بتفهم وقت عايزين يعملو مشاكل جاين ليه عالم ما بتفهم
اتلفتت عليها نفيسه
نفيسه/ هوووي وتاني هوووي دايرانا نرسل الشكله واتساب يا معصعصه ياشلابه
مي/ دي بتقصد شنو؟
نفيسه/ بقصد شنو يا معصعصه القاعده معاه ده راجلي انا البشبه ابو قنفت ده دايره اعرف العجبك فيهو شنو ؟
الشايب الما بقدر العشره
مي/ طيرت عيونه معقوله ياحسون دي زوجتك الاختاره ليك منو
نفيسه لم تتمالك نفسها ودورت فيها بالبنيه
راجل نفيسه لم يجد امامه الا المخارجه وتاب توبه نصوحه
تيم نفيسه كل واحده عملت اضافه لزوجها باسم مستعار حتي تراقب تحركاته ( اعملو حسابكم انا كلمتكم)