نفيسه بوبار واجتماع فوق العاده

جمعت نفيسه نسوان الحله لاجتماع فوق العاده وكل واحده فيكن تجيب الضيافه معاها ، ما تجيني مدلدله أيدينا وتقول ما سمعت وما تكترو لي من البليله واللقيمات خلوكم حضرانين في حاجه اسمها كيك فطاير
( اجتمع النسوان في بيت نفيسه )
* نفيسه
_ والله ياحروم الموضوع مهم نحن فقدنا الرابط الاجتماعي يعني ما بنتلاقي إلا لمن نسمع ثكلي وكل واحده تلفح توبه وتقوم جاريه وتقعد في بيت البكا لمن يرفع الفراش وتعديها خامسه وسابعه وأربعين وتاني ما بنشوفه
عشان الكلام ده حددنا إجتماع ترابطي بدل الحوامه من سوق لي سوق
* علويه
_ أنتي يانفيسه جايبه الحريم ومقومه الدنيا عشان تسمعينا الكلام ده ، وأنتي ذاتك مقصرة ما ياكي قايمه وقاعده معانا من بكي لي بكي الجده شنو يعني
* سعاد
_ والله نفيسه تحير عديل كل ما تحلم بي حاجه او تطلع ليها حاجه في راسها تجمع الحريم
*علويه
_ والله الخوف من لسان نفيسه هو الجايب الحريم ديل غايتو نقعد ونسمع نفوس عايزه مننا شنو انشاءالله تقول بطلو حوامه
* نفيسه
_ دائما افكاركم متاخره كيف نتطور أنا عايزه حينا يكون الحي المثالي في كل شئ، وأنا ماقاعده احلم ياسعاد حتي لو كنت بحلم عايزه نكون نحن الأفضل ، أول امس مشيت زيارة لي أختي والله حاجه تشرح النفس الواحده بعد ما تنظف بيته تقوم كدى علي الشارع حاجه تفتح النفس مش زيكم ، الشارع ما بشوف النضافه الا في رمضان أو العيد نسوان رمم
الواحده فيكم تفتح الباب وترمي الأوساخ وبواقي الاكل خليتو الذباب والباعوض ينجضنا نجاض عالم وهم
* سعاد
_ اتكلمي عن نفسك أنت كل الحاجات دي بتعمليها أنتي المويه واصله الشارع الخامس والوساخه عايزه عربيه نفايات عديل ، بدل ما تلمينا ما كان تنضفي خشم بابك وأكيد اي واحده حتعمل ذيك
* نفيسه
_ أنا لو عايزه كده كان عملته القلتي عليه ده لكن عايزه الفائده تعم الجميع ونكون الحي المثالي
* سعاد
_ خلاص يختي تعملي أنتي ونحن ما فاضين عندنا شغله ماشين عليها
* نفيسه
_ شغلتك شنو غير الشمار ومبارات الخبارات ، دحين أنا جيت بي صورة حضاريه وده ما نافع معاكن عشان كده جهزت مكانس ومن المحله ده دايره الشوارع نضيفه ابدو من بيتي بديكم ساعة زمن بس وانتو عارفين نفيسه لمن تقول كلام قدرو
( فما كان من النسوان إلا كل واحده اخدت مكنسه وبدو عملية النضافه خوفا من نفوس )
ونفيسه خالفه رجل فوق رجل وتعاين ناس ما بتجي الا بالعين الحمره