Ultimate magazine theme for WordPress.

نادر التوم يكتب قفة فرح

قفة فرح    نادر التوم
_ياهو البضحك _

 

نزار قباني الله يرحمو قال
سيحبك آلاف غيري

و سيأتيك بريد الشوق

لكن لن تجدي رجلا مثلي

يهواك بهذا العمق

لن تجدي أبدا

لا في  الشرق و لا في الغرب!!

نحلل النص دا:

أول شي  الممدوحة أو (المحبوبة) مزة عرفنا كيف سيبك آلاف غيري، مبالغة صاح؟؟؟

في حتة البريد دي، يا حليل بريد الشوق: الرسايل الكان بتتكتب (بالورقة و القلم) كان عندها طعم .. و لمن تصلك تسل روحك.. و عادي ممكن تلقى المحبوب (شلبو) قبل رسالتك ما تصل _

ما زي هسه الرسايل بقت مسيييخة و كلها كضب و شائعات!

يله تعال لي حتة الثقة : راجل بريدك زيي مافي لا في الشرق و لا في الغرب

إنتو عارفين العمق الاستراتيجي دا من بقى ضحل في الوجدان و بقى كلو سياسة البلد دي اتدهورت!

و الله دا تحدي عديل!
………………………………………

مثل :

قطع الرقاب و لا قطع الكهراب!

………………………………………
المطرب صلاح ولي أداءك للأغنيات بطريقتك المجنونة يمنحها الحيوية لكن عليك أن تركز في الكلمات جيدا:
رجيتك و في إنتظارك عينيك …. يله طوالي ….. كملت الصبر كلو
ما عارفك جبت ليها الواو دي من وين؟

_ زي المذيعين و المذيعات و …   إسحق آخر الليل!
………………………………
أنا ما عارف الزول دا ح يرجع و لا عليو كفارة : فقد حلف طلاق إنو لو الكيزان رجعوا ما يخليها تعيد عند أهلها و هي عيدت و الباقي عارفنو.. أها الفتوى شنو؟
………………………………..
في الحياة لا شي يدوم (كان سمح كان كعب) عليكم الله ما بتذكروا:
_ صفوف العيش المدعوم؟
_ البنزين؟
_ الجازولين.؟
_ الغاز.؟
_ الصراف الآلي؟
_ ثمرات؟
دعونا نغني: الجروح بكره بتروح،

الجروح الحاكمانا دي لمن ما قادرين نعبر!!
…………………………………………
قال ليو :
_ و الله المدرسة دي كانت ماسكة بلاوي.
_ ليه عندك أولاد في المدرسة؟
_ لا و الله، مرتي معلمة!!

التحية للمعلمات، بنهظر معاكم!
…………………………………….
دقسة محمد علي باشا إنو الوكت داك مافي أجهزة و لا لودرات و لا (عروق)!
……………………………………….
في الخريف الناس تعمل حسابها من الكهربا…. ما تقطع تاني!
و اخذروا من الشارع، رمي النفايات و القزاز و الحديد …. البكونو (تبن تحت موية)
………………………………………
فعلا المسؤول دا (ما كيشة)
نحن الطلعنا كيش !
…………………………………….
بختهم ناس الراحات
هم ال ح (يقتسمو الكيكة)
لانو السواد الأعظم (حق الرغيف ما عندو)!
…………………………………..
أبو داود و عوض دكام .. هل يجود الزمان بمثلهما. ظرافة و قيافة و لطافة؟؟؟

أللهم أغفر لهما و أرحمهما!!
……………………………………….
مشكلة العالم كلو في حرف واحد بس ..
لما نحذفوا بسبب المشكلة و لما نضيفو بتتحل :
حرف السين
لو حذفناهو من (الإنسانية) ببقي مشكلة
و لما نضيفو للأنانية بحل المشكلة!

البنات الصغار ديل نعمة
و حتى الكبار
و حتى الزوجات (كان الله هداهن)!
غايتو البيت بدون بنات زي التربة بدون نبات .. قاحل شديد!!
………………………….
برطمانية فرح:

لو ما أخاف الكضب أقول القهوة ذاتها متقريفة ليك …
مع انك بتشربيها شبع.. و لا بترميك!

…………………………………
رسالة في كبسولة :
خلي بالك مني فيك
من قلب خايف عليك!

…………………………………

آخر نكتة: ظهور مثير لكراع خروف في الجزارة يسوط المشاعل، أقصد يشعل الوسائط!!

رافقتكم السعادة

 

أكتــب تعليقكـ هنــــا

لن يتم نشر عنوان بريدك الإلكتروني.