نادر التوم يكتب تحليق إخباري .. قراءة ساخرة للأخبار

تحليق إخباري نادر التوم
عناوين الصحف الصادرة الأربعاء الثامن من يونيو ٢٠٢٢م
صحيفة السوداني
_ شراء القمح من مزارعي الجزيرة بمبادرة من سودانيي المهجر.
_ يعني حميدتي ما دين البنك؟
دي شكلها القومة للقمح!!
عقار: المؤتمر الوطني سيأتي للسلطة مرتديًا”الجنز والحلق”
_ للسلطة و لا (السطلة)؟؟!!!
تفاصيل حرب دبلوماسية إسفيرية بين سفيري روسيا وبريطانيا حول السودان.
وين نيابة المعلوماتية حقتهم؟؟!!
صحيفة الانتباهة
_مقتل طفلة دهسًا بعربة قوّة نظامية في احتجاجات بالخرطوم
لا حول ولا قوة إلا بالله!! أطفالنا و آمالنا كلو يدهس!!
_ اشتباك بالأسلحة بين أعضاء حركة مسلّحة والشرطة بنيالا
آهاااا دا الكلام البجيب الكلام!!
_أعطال وانخفاض”التوليد” بمحطات رئيسية يزيدان قطوعات الكهرباء.
القروش البتشيلوها دي كللها ما صلحت الأعطال؟ أما انخفاض التوليد اتخيل لي من انخفاض العرس و الله أعلم !!
_ صديق تاور: العسكر لن يسلّموا السلطة بشكلٍ ودّي.
_ ودي و الله!! الود ودي!! ليه ياخ إتفاءل خير!!
اليوم التالي
_ البرهان: انسحاب الجيش من السياسة في حالة واحدة
إنو يكون مافي سياسة أصلا!!
_ العدل والمساواة: فصائل بالجبهة الثورية تبحث عن الأضواء
ما يمرقوا على الشمش الما بتتدارى دي!!
وفد من دولة الجنوب يزور الخرطوم ل(دفع) اتّفاق جوبا للسلام.
بطاريتو نزلت و لا شنو؟؟!!
الحراك السياسي
_ كارثة قادمة تهدّد الخرطوم بسبب”آبار السايفون”
ح تقولوا موية و صرف صحي و شنو؟؟ هو في موية أصلا؟؟!!
_ توقف مصانع بسبب الكهرباء والاتحاد يقترح الاستيراد من مصر.
مصانع بتخرب قبل تبدأ فيها و نيلك ممدد جنازة!!
_توت قلواك ينتقد مطالب بمراجعة اتّفاق جوبا.
مالو ما فيها شي يراجعو و يتراجعو لو في مصلحة عامة!!
_ مباحثات سودانية أمريكية قبل انطلاق حوار (الآلية الثلاثية).
ركشووو!
صحيفة أخبار اليوم
– مقتل واصابة 21 شخصا في نزاع قبلي مسلح بجنوب كردفان
لي متين لي متين؟؟؟!!
– قبل إنطلاق الحوار المباشر اليوم: اللجنة العسكرية تلتقي مساعدة وزير الخارجية الأمريكي
ما يساعد مالو.. المهم يكون في حل بدل ال …. الحاصل دا!
صحيفة الوطن
– نجاة وزير مجلس الوزراء السابق من محاولة إغتيال
حمدا لله علي السلامه لكين ….
يغتالوا لي شنو؟!!!
– أكثر من “2000” شرطي لتأمين إمتحانات الشهادة السودانية بالخرطوم
و كم معلم؟؟!!
– مصرع نجل كوشيب في تبادل اطلاق نار بدارفور
الله يرحمو و أبوهو محاكمتو بهناك!
صحيفة بدون عنوان
– البرهان: أرجو وأطلب من المكونات المختلفة المعنية بالحوار أن تبادر بالإستجابة وألا تقف حجر عثرة
ابقوا عثرة على البلد!
– الجلسة (التقنية) التحضيرية للحوار السوداني السوداني تعقد الأربعاء وسط اهتمام متزايد
حوار بالزوووم و لا شنو؟؟
– وزارة المعادن وأهالي الشرق يتوصلون لتفاهمات بخصوص قضايا التعدين
اي شي بالتفاهمات بمشي!!
– مجلس التخصصات الطبية يطالب المالية بالصرف من موارده الذاتية أسوة بالتعليم العالي
ما تشوفو ليكم حاجة الا تحاكوها، أسوة دي في داعي ليها؟؟؟!!!
– السفيرة الأمريكية مولي تبحث مع لجنة العسكر آخر ترتيبات انعقاد الحوار الوطني الأربعاء
العسكر للثكنات!!
– تلف الجوازات وإضاعة المستندات وعدم الرد على الهواتف أبرز مشاكل الحجاج
المشكلة الكبيرة الكم مليار دي يجيبوها ليكم من وين؟؟!!
– شرطة الخرطوم تفتح بلاغا في مواجهة السائق الذي دهس الطفلة الشهيدة روان.
الله يرحمها.. دا نصيح؟؟؟!!
– المواصفات تشارك في ملتقى رجال الاعمال بمعرض الخرطوم الدولي
المواصلات الأيام دي راااقدة و فاااضبة!!
– قبائل الداجو والمسيرية الزرق والنوبة بمحلية لقاوة يوقعون على وثيقة وقف العدائيات
التوقيع ساهل!!
– الامطار الغزيرة بالعباسية تقلي تدمر مركز امتحان الشهادة السودانية
رواكيب و لا شنو؟؟؟!!
– الطرق والجسور بولاية الخرطوم تدرس اسباب تعثر مشروعات التشييد والمشاكل الواجب تفاديها.
ما في اي مشاكل.. ح نشيد نحن بلادنا و ح نفوق العالم أجمع. شيلو الصبر بس!!
– سوق سياحي دائم بكرمة بالشمالية لعرض كل المنتجات السياحية والموروث الثقافي
ما يكون (غالي)!!
– قطوعات الكهرباء تستصحب معها قطوعات المياه والكل يعاني الأمرّين
الحجل بالرجل!!
– 173 مليار جنية تكلفة بناء 500 ألف طن من المخزون الاستراتيجي للقمح والذرة.
بناء؟ بناء تعمير شهادة!!
– النفطي يباشر مهمته بالورقة والقلم في تمرين المريخ صباح الثلاثاء.
كورتين تلاتة و (ينقبوا) عن مدرب غيرو يستلم من ابراهومة!!
– السودان بالأبيض والكنغو بالأزرق وروح طيبة بالاجتماع الفني للمباراة
السودان أصلا (أبيض) و قلبو أبيض!!
– كاف يوافق رسميا علي دخول الجماهير لمباراة السودان والكنغو
الجماهير دي فيها حيل تشجع هي؟!!
– الكاف يعين الجنرال ومهيار منسقين أمنيين لمباراة السودان والكنغو
التنسيق أهم شى!!
– منتخب الناشئين يواجه نظيره في السعودية يومي 21 و 22 يوليو
خربانة من كبارها!!
– صقور الجديان في مباراة تعديل المسار اليوم أمام الكونغو باستاد الهلال
تعديل المسار دا في البلد دي ما بنفع .. لا كورة لا سياسة!!
صحيفة النيل الدولية
– البرهان: عدم التوافق بات يهدد أمن وسلامة البلاد
و عدم القروش برضو!
– استئناف محاكمة كوشيب اليوم الأربعاء
بقت زي محاكمة انقلاب ٨٩، ناس الانقلاب رجعوا.. الله يستر كوشيب ما يرجع!
– الخرطوم تتخذ تدابير صارمة في تأمين امتحانات الشهادة الثانوية.
أهم شي تدوا المراقبين (الما دوليين) قروش كويسة!
– استقالة والي البحر الأحمر تنهي اعتصام البجا في بور تسودان.
و الله عاقل.. عقبال أي ثقيل ما داير يستقيل!

آخر خبر : السنة دي (الضحية) عملت كم؟
الفساد سبب خراب البلاد و العباد الربا و الرشاوي أس البلاوي المخدرات خطر داهم مكافحته مسؤولية الجميع
خلو بالكم من عيالكم.
أللهم صل وسلم وبارك على سيدنا محمد و آله!

الأخبار من شبكة السودان نيوز

تعليق فرفشة

شبكة السودان نيوز