نادر التوم يكتب تحليق إخباري (الخميس)

تحليق إخباري نادر التوم
قراءة ساخرة للأخبار
*عنـــــاوين الصــــحف السياسية السودانية الصادرة اليوم الخميس*

الانتباهة
_ انطلاق الحوار في غياب أطراف معارضة رئيسية.
هي معارضة ما ح تغيب كيف؟!!!
_تصاعد معدلات اختفاء الأشخاص بنسبةٍ عاليةٍ
و الله كلامكم صاح .. أي حاجة تختها ما تلقاها، البلد دي التقول مسكونة!! ربنا يجمع شملهم
السؤال : ماتوا، فاتو ، فزوا، سمبك، زهجو، اعتصام …… بحر ، نسوان، رجال، ظروف اقتصادية؟؟؟!!
يا جامع يا رقيب!!!!!
_ واشنطن: هناك انشقاق بين الجيش والدعم السريع ونخشى الانفجار.
يا ستار
انفجار زي دا أصعب من البراكين و الزلازل!
_ فحص الجماجم البشرية المضبوطة بأمدرمان لتحديد أعمارها الحقيقية.
و الله نحن الحيبن ديل جماجمنا بقت دايرة فحص، ربنا يرحمهم و يتقبلهم!!
_ الآلية الثلاثية: لا يمكن تصوّر حلّ سياسي بدون مشاركة الفصائل الغائبة
و الله أنا قايل كان ركزتو على (الفسائل) كان أخير!

الصيحة
_ “حميدتي”: لا بديل للحوار…اتّصالات (لإعادة”قحت”).
ما نجحوا؟؟!!
_ مياه الخرطوم: أزمة المياه بسبب انقطاع التيّار الكهربائي ومشاكل في الشبكات
و ناس الكهربا يقولوا انقطاع كهربتنا بي سبب عدم الموية .. !!!!!
_ الخارجية ترحّب بتعيين دفع الله الحاج وكيلاً للوزارة
و قووول ما رحبت!!!!
_مجلس البجا يرفض استقالة ترك.
المجلس كلو؟؟
_ انقاذ فتاة ألقت بنفسها من فوق”كوبري” داخل النيل.
كان شان الحر كلنا حرانين
معيشة العيشة بي خمسين
كان شان حبيب ما مستحقين
عدم شغلة كلنا عاطلين
الكبري ذاتو كان لقى طريقة كات (تلب)!
لكين الناس صابرين!

اليوم التالي
_ خلال 48..تكوين اللجان التحضيرية لحوار الآلية
البلد دي بين (اللي جان) و اللي راح يفقد عقلو!
– “ميل آند قارديان”: السودان الأعلى سعرًا للوقود في إفريقيا
مع إنو ما فيو (برادوهات) كتيرة، طيب الأفارقة ديل مساكين كدا مالهم؟ ما يهربوا بترولهم لينا ، زي ما بترولنا كان بتهرب ليهم، !!
_ تشكيل لجنة توفيق أوضاع المدارس الخاصة بالخرطوم.
بال (توفيق)!
– إسرائيل: التطبيع أعادنا إلى إفريقيا
يعني (بالباب عديل)!
– مطالب بمنح حماية المستهلك السلطة الخامسة
الأيام دي مافي استهلاك ذاتو و لا في حماية، البلد دي اي زول داير (يتسلط)!
السوداني
_ انطلاق الحوار السوداني بغياب أحزاب مؤثّرة وقوى الثورة.
الغايب عذرو معاو، إمكن شايلين اورنيك!!!!
بالمناسبة بلة الغائب بقى اسم على مسمى ما قال اي شي عن العيشة ام خمسين دي و العيشة الضاقت دي.. أظهر يا بلة!!
– البجا: استقالة ترك مرفوضة وتسوية لحلّ الخلافات بين القيادات قريبًا
قريبا …………. تابعونا على قناة (الأحلام)!
– وزير التربية: وصول الامتحانات لجميع المراكز بالداخل والخارج.
بعدين دايرين قروش المراقبة بنفس الهمة بالداخل و الخارج، ما نقعد ننتظر جات و ما جات !!
– اجتماع بالقصر يبحث اتّفاقًا جديدًا حول النفط مع جنوب السودان.
غباء البشير و الكيزان بتحريض انفصاليي(الغفلة).. الشغل كان حقك كلو تجي تفتش لي عطية مزين في البرميل؟؟
انفصال الجنوب و ……….
ديل أكبر خوازيق دقاهن البشير في نعش الشعب السوداني!!

أخبار اليوم
– انطلاق حوار الآلية الثلاثية والحرية و التغيير تقاطع
الله يستر ما تبقى زي مقاطعة اللحمة، قالو خلوها تعفن، عفنا نحن!!
– تصريحات لحميدتي حول غياب أطراف رئيسية عن الحوار.
أعملو ليو أطراف صناعية!!
– (الحرية و التغيير) : الآلية الثلاثية ارتكبت خطأ كبيرا
_ ما يكون في خط ١٨
تخريمة: أكبر من أخطائكم؟؟!!
الوطن
– إنطلاقة حوار الثلاثية بالخرطوم وغياب مركزي الحرية والتغيير.
صينية مركزي .. نفر (بي سعر الحافلة)!
– فولكر :سنتواصل مع الرافضين لإقناعهم بالمشاركة.
ما تحنسوهم بيكونوا اكلو في المطبخ!!
_ مجلس البجا يرفض إستقالة ترك
لكنه لم يرفض قفلة الشرق!
مواصلة الحوار يوم الأحد المقبل وتحديد سقف زمني له
_(حلنا في الحوار في كلمة حلوة نقولها.. )!!
النيل الدولية
– بدء الحوار المباشر لإنهاء الأزمة السياسية في غياب أطراف رئيسية.
الأطراف أهم حاجة في كرة القدم الحديثة و طرق (اللعب) المتطورة!!
– استقالة الناظر ترك بعد تفاقم الخلافات بمجلس البجا.
الحاجات لما تتفاقم حقو الزول يبعد، هسه نحن بسبب تفاقم الاسعار قدمنا إستقالاتنا زماااان من السوق!!
_ القوات المشتركة السودانية الليبية تستعيد عددا من المهاجرين.
ما عارف أقول ساعدوهم و لا خربو عليهم!!
_ خبير مياه: هطول أمطار أعلى من المعدل في السودان وجنوب السودان و إثيوبيا.
و مصر معدلها كيف؟

آخر خبر: الآلية الثلاثية بتاعة علاج الالتهاب في ليها بديل؟؟

الفساد سبب خراب البلاد و العباد الربا و الرشاوي أس البلاوي المخدرات خطر داهم مكافحته مسؤولية الجميع خلو بالكم من عيالكم

أللهم صل وسلم وبارك على سيدنا محمد و آله!!