نادر التوم يكتب : بالدارجي الفسيح

بالدارجي الفسيح    نادر التوم
زول .. شلال فرح!! 1_2
في ناس في الدنيا دي ممكن يكونو ملاذك
كهفك البتاوي ليو لما يظلمك ااحواليك و يظلم الواقع المحيط بيك
في زول في الدنيا دي منوط بيو يفرغ كل شحناتك السلبية
مش كدا وبس، بل يملاك ايجابية لمن تنتشي.. و تنسى كل شى
بس المشكلة الزول دا زي الموهبة و امكانياتك
القالو عنها في ناس بكتشفوها
و في ناس (بموتو بيها)!
المحظوظ البكتشفها بدري
او بلقى زول يوجهوا لاكتشافها
…..
الزول البغمرك بالسعادة دا و يقلب حياتك و مزاجك ١٨٠ درجة قاعد و الله
إمكن يكون قريب شديد
و لو ربنا رايد ليك الخير ح يرميو في طريقك
حتى لو كنت ما بتعرفو
ح تحس إنو قريييب شديد و ما غريب
و ح يستقبلك بي ترحاب و بسمة
…..
الأجمل ما في الموضوع دا كلو
إنو الزول دا زي ماهو ملاذك
إنتو ملاذو
…..
كدا ربنا رضيان عليك
و …. عليو
كل ما تلاقيو او تتذكرو برتاح و تريحو….
و همومك بتنزاح و تنسى نفسك و تنسى الدنيا
لانو بقى بالنسبة ليك الدنيا
مافي حواجز بتقيف بيناتكم
مافي ظروف
ال ٢ بتسوا اي معوقات
و بكون الامتنان ثالثكما
بتحس إنو زي ما هو دنيتك و برطمانية فرحتك
انك مصدر سعادتو
…….
الصعب في الموضوع دا
زولك دا لو تعب و لا سرح
بدون ما تشعر بتلقى قلبك إنجرحك حتى لو في الواق واق
ممكن تكون بتحبو الزول دا
و ممكن لا
ممكن تكون بتعرفو قبل كدا
و ممكن لا ……
ح تبرمجو و يبرمجك
و تحبوا حاجات بعض
ح تحس إنو عيونك قليلة مقابل البديك ليو من دفء و طمأنينة و سعادة و انتشاء و حيوية…
بتلقى حاجاتك حاجاتو و حاجاتو حاجاتك
ما بكون همك شي غير إنو يكون بخير
ح تذوب فيو في لمح البصر
لما تلاقيو كل الطاقة السلببة المخزنة جواك ح تفرغها و تقوم نشيييط!
…..
الزول دا انا بنصح اي زول يفتشو
ما شرط يكون في عمرك و لا
المهم يكون في الموعد
عارفين ليه
لانو جلسة واحدة معاو كفيلة انك تنسى أحزانك و انك تكون فرحان سنة لي قدام
…..
و لما تلقاهو في حاجتين لازم تعملهم
١/ تحمد الله إنو لماك فيو .. لانو دا من أكبر النعم و النعم تستحق و تدوم بالحمد
٢/ تظهر ليو امتنانك و توريو إنك مقدر البعمل عشانك!
٣/ ما تبخل عليو لما يجيو برضو إحساس إنك ملاذو و عاوز يتلاشى فيك .
٤/ تدعو ليو ربنا يحفظو و يستر عليو
.. ..
كتير بنكون بنعاين للواطة شان نلقى قروش و في الغالب ما بنلقاها
و كتير بنكون (مقهيبن) و ما جايبين خبر و بتلقى القروش و قلبنا بعمل (شححح)
شان كدا م تركز كتير
بس خت فكرة انك كايس الزول دا جواك. مسيطرة عليك و مالياك.
….
و نصيحة: صح ممكن تعيش براك و تنزوي و تتحكم في عواطفك و حاجاتك ..
بس الأجمل إنك تتقاسم حاجاتك مع الزول الأنا وريتك صفاتو دي..
في الأولى بتحس بقوة لكين معاها ضعف داخلي و إحتياج مستمر و لو حاولت تخفيو بي كبرياء،
و في التانية مع زولك دي بتحس بقوة حقيقية و رسوخ عجيب و دافع و معنويات مااا تتخيلها!
…….
بالمناسبة الزول دا ما بس مكب نفايات تفرغ طاقتك السلببة فيو و تمشي .. أبدا..!!
بالعكس الزول دا ح يغبر فيك حاجات كتيرة
ح تبدأ معاك اووول ما عرفتو
و تستمر حتى لو بعد عنك او بعدت عنو لأي سبب من الأسباب
…….
الحياة مبنية على التشارك
و المرونة
ما الوحدة و القسوة و ثصلب الشرايين
شان كدا
اسأل ربنا يلمك بالزول دا
و انا برضو بسأل ربنا يلمك ببو
و ما تستعجل و لا تضيق
لانو قد يجيك في زمن تكون اتخيلت إنو (تووو ليييت)!
الناس البقولو ليك زول زي دا مافي.. كضابين
و البقولو ليك حتى لو لقيت ح يتغير ما عارفين
حتى لو لقيتو و اتغير صدقني إنت ما خسران شي!
بالعكس كسبان كتير!
بعد تلقوهو ورونا
و وصية مهمممة: ما توروا اي (زول من طرف) إنكم لقيتوهو!
و لازم جدا تشربو قهوة مع بعض
لأنها أساس التشارك و التشاور و …. البركة
….
آخر شى:
الزول دا هدية من ربنا عشان كدا :
ماااا تبخل عليو بي أي شي!!
…..

……