مشاهدات

مشاهدات
في الفن والثقافه والمجتمع

رمضان من اعظم الشهور عند الله سبحانه وتعالي عشان كده ربنا قال)(في مامعناه)
كل عمل ابن ادم له الا الصوم لي وانا اجزي به
لكين الناس قلبو العباده لي عاده ناسيين او متناسيين حكمة مشروعية الصوم
وطبعا اول ماشهر رمضان يقرب تلقي الناس تتطاقش علي ابواب العيادات
واحدين يدعو المرض عشان مايصومو
ناسين قول المعصوم عليه صلاة الله وسلامه
صومو تصحو
البقولك والله العظيم انا عندي سكري
والبقولك انا عندي ضغط والضغط مابيتحمل العطش اما البيدعو الكلي ديل امه كامله المشكله مافي اكلو وشرابو المشكله تلقي سفتو دقار لوري وتلقي سجارتو قصبه وتتكلم معاهو عشان تهديهو يقول ليك بكل بجاحه وقوة عين يازول انا معذور الله اداني الرخصه ويتبع ليك كلامو بأن الله يحب ان تؤتي رخصه كما يحب ان تبعد عن معصيته
اما ناس خم الرماد مايدوك الدرب
الخم رمادو اكله كاربه
والخم رمادو سكرة يني
والخم رمادي مخدرات
والخم رمادو دعاره نسأل الله السلامه
متبلين علي خم الرماد الماعارفين معناهو ومناسبتو
اسمعو مناسبة كلمة خم الرماد جاد من وين
زمن حبوباتنا الجميل النقى والنضيف
معظم الناس ما بيعرفو معنى ومناسبة (خم الرماد)

ترجع حكاية (خم الرماد ) للزمن الجميل .. (حبوباتنا) يتجمعن في البيت الكبير أو (الحوش)
قبل أسابيع من بداية

شهر رمضان لعواسة الآبري
ويقسمن الأيام بينهن حتى يتم (تشوين) كل البيوت بالحلو مر ..
كان من عادة النسوان مابيكنسن بواقي حطب العواسه المحروق (الرماد) لغاية اخر يوم من ايام العواسه من باب الفخر بالكمية الهن حرقنها للعواسه

ويحتفلن في اليوم الأخير بتناول وجبة الفطور أو الغداء وبعد الوجبه القهوة ، ويقومن بنضافة مكان (العواسة) وكنس الرماد أو (خمه)
كما يحلو ليهن ، وبي خم الرماد يكونن أنجزن قيمة تكافلية كبيرة وفي دا إحياء لثقافة النفير والتراحم والتعاضد وكلها عادات جميلة وأصيلة ..

غير الجميل وغير الأصيل هو ما أصبح عليهو معنى كلمة (خم الرماد) ،

رمضان كريم وتصوموا وتفطروا على خير

زكريا صالح عطبراوي
atbra13579@gmail.com