مشاهدات

مشاهدات

في الفن والثقافه والمجتمع

رمضان علي الابواب

رمضان شهر التوبه والغفران
والغرض من صيام رمضان معروف
ورمضان شهر في السنه نصومه متقربين لله سبحانه وتعالي
نصوم هذا الشهر لنشعر بجوع الفقراء
ولنشاركهم طعامنا وشرابنا في رمضان ابتغاء مرضاة الله
ولكن للاسف اصبح رمضان شهر للفخفخه والبوبار وشوفوني
أصبحنا نتسابق في شراء المشروبات والماكولات مالذ وطاب منها وتعودنا علي الصرف فيه ببذخ شديد ونصرف فيه صرف من لايخشي الفقر
نشتري التين والزبيب والمكسرات والقمر دين
والعصائر الطازجه والجافه
وشراء وصيانة مكيفات الهواء
ومانستمع به لا نوفره لوالدينا ولا ربعه ثم قضاء ليل رمضان جله في السهر ولعب الكوتشينه او قضاءه في شارع النيل او في الجمبات شيشه وقهوه وشاي
وان نقضي نهاره كله في النوم وقبل الفطور بساعه نستيقظ علي جرس المنبه فنقوم علي عجل نأخذ حماما ونصلي الصلوات جمله الصبح والظهر والعصر
وننتظر الاذان ونحن نتأفف من طول الزمن الاذان اتأخر مالو الشمش مالا مادايره تغيب ولا عدوها صايم
وفي برش الفطور كل زول تلقاهو باقي عشره علي صينيتو ويوصي المدام جوه البيت اسمعي قراصه وعصير ابري وعصير كركدي وبلح والبلح ماتختي من القنديله ولا البركاوي النضيف ختي من الكرشه ومعاهم البليله بس
وباقي الطيبات ماتختيها في الصينيه
خليها لما احلل صيامي في البرش وادخل البيت استمتع بيها معاكم اخير من ياكلوها الناس الصوانيهم مافيها غير عصيده وبليله وجك روزانا ولا عصير بودره مامعروف بتاع شنو
كأنو ضامن انو ربنا حيمد في عمرو لغاية مايفطر بره ويجي يكمل باقي اكلو في البيت وبعد ياكل هو واولادو باقي الاكل البيرموهو في الزباله كل يوم يكفي تلاته اسر ولما تقوليهو حرام ياخي اتق الله دي نعمه كان تطلع الفايض برش الفطور ولا تدي جيرانك يقول ليك دا حقي وانا حر خليك في حالك وماتشتغل بي ياخي
اما العشاء والسحور فحدث ولا حرج
اما الجيران ماعندو ليهم حاجه لابيفقدهم لابيسأل منهم حدو معاهم برش رمضان والعيدين والمناسبات
حاصر علاقاتو في اهلو القراااب وارحامو حتي ديل مايزوروهم الا في المناسبات ولما تتكلم معاهو عن صلة الرحم يقول ليك اقاربك عقاربك والاذيه مابتجيك من بعيد والاختصار عباده يحيرك
والواحد يقدم لي الله قراصه بي مرقه وداير يدخل احسن مكان في الجنه ويستأثر هو واولادو باحلا المأكولات ولما تناقشو يقول ليك انت الدخلك شنو انت وكيل الله ولا قال ليك راقبني ومش كتر خيري الانا طلعت حاجه لله
ناسي انو اي زول مفروض الحاجه البيطلعه لي الله تكون افضل ماعندو
يا اخوانا رمضان شهر تكافل وتراحم ماشهر اكل وشراب ونوم لازم نتشارك في الحلو قبل المر
ولازم نفقد فيهو جيرانا المتعففين وقرايبا ومانخليهم يحتاجو للغرباء
وكما قال المعصوم عليه صلاة الله وسلامه
خيركم خيركم لأهله
صدق رسول الله صلى الله عليه وسلم

زكريا صالح عطبراوي
atbra13579@gmail.com