مشاهدات

مشاهدات
في الفن والثقافه والمجتمع

اعراسنا

في اعراسنا نشاهد العجب العجاب
فمعظمنا لايتزوج احياء لسنة رسول الله ولا لاكمال نصف الدين
انما للفخفخه والبهرجه وشوفوني
لازم قولة خير تكون حدث ام العروس وام العريس لازم يتفشخر ويتبوبرو قدام الناس ولا العرس مايتم
والعروس بت امها بعد ان ملكت قلب الشاب تلقي شروطه اقسي من شروط روسيا علي اوكرانيا
لازم الشيله عشره عشره ومن افخم الملابس والتياب
ولازم الريحه اللينه اربعه اربعه والناشفه كيلو من كل نوع
والشيله التموينيه تفتح ليها دكان برااحه
كل حاجه اتنين اتنين
والفنان لازم يكون فنان شباك والصاله لازم تكون ما اقل من نسيم شبال ولا برستيج واعشا لازم يكون مافي زول عملو
والزفه براااها تكلفته قيامه
والكوفير ميزانيه
والعريس المسكين تلقي راس مالو الحلاقه والملابس الداخليه
البلدله والجزمه والكرفته حقات العرس يكون شاديهم
ويطلع العريس من العرس مديون
ويزيد علي ديونو حق الولاده والسمايه
وقبل مايحل ديون العرس والولاده الاولي زوجتو بت الحلال تحمل بالتاني حسب وصية امها:
ماتخليهو يشيل نفسو كملي ولادتك كلها في خمسه سنه عشان يتربو مع بعض وتتفرغي لجمالك وحنتك ودخانك وكوفيراتك وارمي المفاعيص لحبوبتهم ام ابوهم
والمسكين يفضل جاري جري الوحوش شغال شغلتين والثالته بيشتغلا في البيت
والمدام تنقنق :
طوالي حابسنا في السجن دا لاطلوع لا فسح لاسفر زي ناس اختي كل يومين متعشين بره وكل سنه صايمين في بلد مره الامارات مره مصر مره تركيا مره السعوديه
وانت مرزوع في البلد دي التقول حرسوك ليها
واختي راجلا ممتعه وانت جاري في الفاضي البيتزا والباسطه والفواكه من الشهر للشهر وهي الفواكه شنو غير برتكان وموز عمل لينا تلبك معوي
ياوليه احمدي الله انو الحاجات دي بتجيك من الشهر للشهر في ناس خالص مابيشوفوها
انا اكسر رقبتي ولا اعمل شنو
وانتي ليه تعاين للأقل منك
ياحبيبي فتح مخك واشتغل مع نوح راجل اختي ليهو زمن يحنس فيك تشتغل معاهو لما غلب
ونوح ماشاء الله كل سنه بيغير عربيتو وكل سنتين بيغير عفش بيتو والستاير والعفش القديم يتصدقوبيهو علينا
لما قاطعت صاحباتي عشان كل مايجوني يقولو لي دامش عفش اختك القديم
: ياوليه انا فارقت نوح دا بالذات لانو شغال مخدرات وتهريب ذهب
:اها يامتولي الشعراوي يعني انت داير تصلح الكون ان الله غفور رحيم اشتغل معاهو اعمل ليك قروش وارفعنا لوش الدنيا وادخل بيها السوق وارحم نفسك من التعب البلا فايده ده بعده امشي حج توب!!
ان الله غفور رحيم.
ياوليه لكنه شديد العقاب
انت ماتصعبه اخد الجزء الاول بس
ان الله غفور رحيم
والجزو بتاع ولكنه شديد العقاب دا ماوكتو
وقدام النقه اليوميه والضغط اليومي علي اعصابو قبل يشتغل مع نوح (طياره) يشيلو البضاعه ويستلم بضاعه بدون مايعرف محتوي الشنط
ومصاريف السفر والاقامه لغاية مايرجع يتكفل بيها نوح
كل العليهو يسلم الشنطه الشايلا لزول حيجيهو في الفندق ويستلم منو شنطه بعد يومين ويجي راجع وياخد حقو
عمل ليهو خمسه سفريات والقروش جرت في ايدو واشتري العربيه لكين ما في كل مره تسلم الجره في السفريه السادسه وهو راجع اتمسك شايل 5000 حبه مخدره في بطانة الشنطه
وحولوهو النيابه واتحكم بي عشره سنوات
واول ما اتسجن المره عملت فيها الشريف الرضي
طلبت الطلاق لانو راجل طلع بتاجر في المخدرات وانا لو عارفاهو بتاع مخدرات وحاة نعمان اخوي ماكنت عرستو!!

زكريا صالح عطبراوي
atbra13579@gmail.com