مشاهدات

مشاهدات

نحن والغربه
في الفن والثقافه والمجتمع

نحن السودانيون من اول عرف الاغتراب في جميع انحاء الكره الارضيه سواء كان بقصد السياحه او الدراسه او العلاج او العمل
في خانة العمل دي نحنا اغرب مغتربين في الدنيا
لانو في كل دول العالم اي انسان بيغترب عندو خطة ومشروع محدد بزمن معين
الثلاثه سنه الاولي لازم يبني بيت ويأسسو
السنه الرابعه يتزوج ويحجج امو وابوهوهو
السنه الخامسه يشتري العربيه السنه السنه السادسه
يعمل مشروع تجاري بعدها يرجع يستقر في بلدو معزز مكرم
نحنا من دون جميع خلق الله غربتنا او هجرتنا استيطانيه من عشرين سنه ولي فوق والواحد كاتلاهو الحنيه من اول سنه يفكر يجيب اولادو معاهو رغم انو عارف ومتأكد انو دخلو مابيسمح ليهو يجيب اولادو ويبدا يصرف كل الدخل بتاعو ويشتغل دوامين ويستلف عشان يكمل مصاريف البيت والتزاماتو من سكن واعاشه وتعليم وعلاج ويبقي النزول للبلد في الاجازه مستحيل وتطول فترة الاغتراب لغاية مايبلغ سن المعاش وتستغني منو المؤسسه الشغال فيها
وللاسف ما يكون خلال فترة اغترابو عمل اي حاجه لاعندو بيت لا عندو مشروع لاعندو قروش وتبدا المرمطه وتنتهي الاقامه ويغلبو تجديده والاولاد في المدارس والجامعات يعجزو عن اكمال تعليمهم
ويبدا التنازل من السكن النضيف لسكن اقل في عدد الغرف والايجار والاولاد يطردوهم من المدارس والحياة تبدا تصعب وهو ضيع شبابو بدون مايعمل حساب لليوم دا ويضيع مستقبل الاولاد بعد فصلهم من المدارس
وهو من اغترب بي اولادو يكون اخر رجعه ليهو للسودان قبل عشره سنه يلقي مافي خيار قدامو الا يرجع البلد وترفض ام الاولاد ترجع البلد الام وتصر تعيش في العاصمه وتصر ماتسكن في بيت عادي لازم شقه وتتبوبر وتتفشخر وهو يطاوعا لانو ماناقص نقه
ومن اول شهرين العندو يكملا ايجار واكل وشراب مع الغلا المتسارع بسرعه ضوئيه
لتبدا رحلة الجهجهه والدردره ويكون كمل مروتو في الشغل في الغربه ومافيهو حيل لشغل متعب ولو لقي شغل يرفضو تعيينو لانو وصل سن المعاش
والسوق بدون راسمال مستحيل يقدر يدخلو يضطر يبيع جوالو بعد شويه جوال الوليه بعد زعل وجرجره بعد شويه جوالات الاولاد
بعدها يبدا في الديون طاقية دا في راس ده في الاخر كل الناس تمتنع تسلفو وبلاغاتو تكتر
ومع الضيق المستمر اما اتسجن اما طلق المره وشتت اولادو الماعلمهم علي المسؤليه ولا هرب خلاهم
عشان كده لازم اي انسان يلقي فرصة اغتراب وعمل خارج السودان يضع ليهو جدول زمني مايفوت العشره سنوات يكون خلالا اسس بيت واتزوج وعمل مشروع واشتري عربيه يدر ليهو دخل يقدر يخليهو يعيش بكرامه والا فليبشر بالضياع

زكريا صالح عطبراوي
atbra13579@gmail.com