مشاهدات في الفن والثقافه والمجتمع

مشاهدات
في الفن والثقافه والمجتمع

رمضان يا اهل الله

رمضان يا اهل الله ماشهر فخفخه وتفاخر وشوفوني
ولا شهر اكل وشراب وسهر وشيش وكافيهات وحفلات وفسح ولعب ليدو وكشتينه وضمنه
رمضان شهر واااااحد في السنه شهر لصيانة العقل والروح والجسد
صيانة العقل بقراية كتاب الله وتدبر اياتو
والتفكر في ملكوت الله
وصيانة الروح بتنقيتا من الشوائب والعادات الذميمه والنواقص الاخلاقيه لغاية ماتسمو الروح وتطهر
وصبانه جسديه بالامتناع عن الاكل والشراب خلال ساعات النهار من شوق الشمس لغاية مغيبه عشان نحس بمعاناة اخوانا الفقرا وعشان نتقرب بصيامنا من الله سبحانه وتعالي
والاهم عشان نريح المعده من الطحن والفرم وافراز الانزيمات الهاضمه
والصيام ما الامتناع عن شهوتي البطن والفرج بس
الصيام الامتناع عن الغيبه والنميمه والكذب والحلف بالله بالباطل واكل اموال الناس واستغلال الناس والتحدث في اعراض الناس
والاهم المواظبه علي الصلوات في مواعيده قدر الامكان
مش الواحد في رمضان يربي دقنو ومسواكو في خشمو الاربعه وعشرين ساعه ويواظب علي صلواتو في الجامع عشان وبعد مايصلي يقعد يتنفل ويرتل ويسبح وياخد ليهو بطحه ماحبا في رمضان ولا الصيام والصلاة لكين عشان الجامع مكيفو باااااارد
وبعد صلاة العيد مباشرة يحلق الدقن ويرمي المسواك والسبحه ويفارق المياجد والمصلايه كأنهم مرض معدي
ومايتذكر الصلاه الا رمضان الجايي
النوع دا بيضحك علي نفسو ولا علي الناس ولا علي الله سبحانه وتعالي
هو ناسي انو ربنا مامحتاج لصلاتنا وصيامنا وزكاتنا
بالعكس نحنا المحتاجين ليهو
يا اهل الله خليكم واعييين وملمين بي اصول دينا الاسلامي الحنيف البيحث علي مكارم الاخلاق
بعدين ماتكون سجارتك مولعه وسفتك جبل طول ما انت في البيت وكبابي الشاي والقهوه تتطاقش قدام زوجتك واطفالك بحجة انك بتتعب في الشغل تحلل لي نفسك انك تفطر رمضان
وتامر اهل بيتك بالصوم
مافي زول حيسمع كلامك عارف ليه لانك انت القدوه ماتامر الناس بحاجه انت مابتعملا صلي اولادك حيصلو
صوم اهل بيتك حيصومو اتصدق اهل بيتك حيتصدقو صلي اهل بيتك حيصلو
انت ربان سفينتك لازم تكون قدوه في كل حاجه
الله يصلح حالنا وحالكم وزماااان الشاعر قال
اذا كان رب الدار علي الدف ضرب
فشيمة اهل البيت الرقص
وقالو لايستقيم الظل والعود اعوج
انت العود واهل بيتك الظل اتعدل عشان يتعدلو
وكل الاعوام وانتو بألف خير
وربنا يتقبل مننا الصيام والقيام

زكريا عطبراوي
atbra13579@gmail.com