مشاهدات في الفن والثقافه والمجتمع

مشاهدات
في الفن والثقافه والمجتمع

دوله مستقله

الامن والامان ضروره انسانيه مهمه لو ما اتوفرت لأي انسان استحالت الحياه
عشان كده نعمة الامن حاجه مهمه جدا بالنسبه للافراد والمجتمعات
والامن خدمه مسئولية الدوله بهيكل كبير من المؤسسات
الشرطه بمسمياته المختلفه شرطة بوليس مطافي مرور سياحه غابات امن جمارك جوازات مكافحة تهريب مكافحة مخدرات امن مطارات الخ مهمة الشرطة حماية الامن الداخلي وتأمين حياة الناس وتنظيمه ومهمة الجيش بمختلف وحداته
حفظ الامن الخارجي للبلد
عشان كده لما ينفرط عقد الامن في اي بلد تكتر الجرايم من خطف وسرقه واحتيال وارهاب ونهب نصة نهار
والحالي بتسمي سيوله امنيه
ودا النحنا بنعيشو حاليا في وطننا الحبيب والحاله بتدفع اي مواطن بكل السبل يحمي نفسو واسرتو وممتلكاتو مما يشكل خطوره كبيره لرغبة المواطن في شراء المستطاع من الاسلحه مع بلد مفتوحه من كل الاتجاهات لدخول الاسلحه الناريه والمخدرات البقت متاحه للجميع اسهل من شراب المويه ودا بيأدي لانتشار الجرايم وبيدفع مزيد من ضعاف النفوس لاستخدام الاسلحه الداخله بدون رقيب دي للارهاب والقتل والسرقه والاغتصاب
ومن شدة ما السيوله الامنيه عامله للناس هاجس لما بقينا ننكت في موضوعه وهاكم مثال علي كلامي النكته دي المتداوله بكثره البسيطه في مضمونه الخبيثه في مدلولا
مواطن بيتو اتعرض منزله للسرقه والحراميه سرقو منه حاجات قيمة وغالية ومهمة .مشي لقسم الشرطه عشان يفتح بلاغ
لما سالو العسكري البفتح ليهو البلاغ عن المسروقات العسكري لقاها حاجات غاليه جدا جدا
قام العسكري قال ليهو اانت وكت عندك كل الحاجات الغاليه دي في بيتك ماكان تشتري ليك مسدس وترخصو عشان تحفظ حاجاتاك وتدافع بيهو عن نفسك واسرتك؟
المواطن قال ليهو :
انا اشتريت قطعة الارض براي
اشتريت عواميد الكهرباء من الحكومة براي .
واشتريت عداد الكهرباء براي
واشتريت عداد الموية من الحكومة براي.
واشتريت خزان للموية وموتور موية وفلاتر للموية .
وبعد دا كلو كمان دايرني اشتري لي مسدس احمي بيهو نفسي!!
( طيب ما ارفع علم واعلن بيتي دولة مستقلة

زكريا عطبراوي
arbra13579@gmail.com