مشاهدات في الثقافه والفن والمجتمع

مشاهدات
في الفن والثقافه والمجتمع

الرصيد

زمان كنت بستغرب من نهايات بعض العلاقات ..
مثلاً كيف في حالات طلاق وإنفصال ممكن تكون بعد عشره سنين أو اكتر وأقول ليه انفصلوا بعد المده الطويلة دي ؟؟!!
ليه ماكان الانفصال دا من الاول ؟؟!!
ومثلاً أصدقاء العمر البيقاطعو بعض وما في زول بيقدر يقنعهم يرجعو علاقتهم مع بعض أبداً…
والأقارب والجيران وعلاقات الحب و احيانا واحد من اهل البيت الواحد بتستغرب لما تلقي في علاقات اتوقفت تماما وانتهت …
بين الاخ واخوهو بين الابن وابوهو بين الاب وجناهو بين ادام واهله
وفعلا مافي زول قادر يرجعها زي الاول..
استمريت في استغرابي من الموضوع دا وبديت افتش عن السبب البخلي علاقات دم تنتهي؟؟!!!
لغاية ما وصلت لحقيقة مقنعه انو في كل العلاقات
(( في حاجه أسمها رصيد ))
ايوه والله الرصيد الواحد ده
رصيد من المحبه ورصيد من الاحترام ورصيد من الموده ورصيد من العشره ورصيد من المواقف الطيبه
علاقاتنا بالناس مرهونة برصيد بيتحدد حسب مَعزّة الزول الجوانا وكل ما التعامل كان راقي ومحترم الرصيد يزيد..
والعكس صحيح كل ما التعامل كان سيء وغير لائق الرصيد بينخفض ومع إحساس البعض انو نحنا بنحبهم ونقدرهم ونحترمهم بيتمادو بالتصرفات الغير مرضية وما عارفين إنهم بيسحبو من رصيدهم بالعشم والمحبة الليهم عندنا بل للاسف الشديد بيعتقدو انه رصيد التسامح العندنا ليهم ممتد بلا نهاية وطبعاً العلاقة بتستمر بنفس الطريقه هم بيغلطو ونحنا بنسامح ويسحبو من رصدهم العندنا لحد ما يصبح الرصيد صفر ..
بس في حالات إستثنائية بنقرر نحنا نعيد شحن الرصيد ونضطر نغفرليهم أخطائهم ( عشان الرحم وعشان العيال وعشان الحلال و الحرام وعشان العشرة وعشان فلان و عشان الصداقه و وعشان الجيره وعشان الحب وعشان ….)
لغاية ما يرجع الزول يتمادى مره ثانية ويسحب من رصيدو مرة ثانية ويستنفدو هنا نحنا بنكون فقدنا قدرتنا على التحمل والصبر بعدها بيكون قرار قطع العلاقة النهائي قرار قادرين نتخذو بكل ثقة بكل قناعه وبدون تراجع ببساطة لانو بيكون قرار ما فيه ندم بعدين
عشان كده انا بوصيكم حافظو على علاقاتكم وعلى الناس البتغفر وبتسامح كثير
ماتعتقدو أن المدة الزمنية او طول العلاقة أسباب كافية لاستمرارها..
زيدو رصيدكم بالمودة و الرحمة والمحبه والإحساس وحسن الخلق والإحترام لانو لو أنتهى الرصيد أبداً ما بزيد ولا يمكن شحنه مهما حصل
و بطريقة أبسط :
‏كلما كثرت تجاربنا في الحياة… صغرت دائرة علاقتنا مع الناس الحولنا..ماتكبر بس دا بيحصل لأنو التجارب بتدي الإنسان معايير أكثر دقة لانتقاء الأشخاص الحيصاحبوهو في رحلة حياتو لأخر العمر ..
(منقول بتصرف)
زكريا صالح عطبراوي
atbra13579@gmail.com