مشاهدات في الثقافه والفن والمجتمع

*مشاهدات*

*في الفن والثقافه والمجتمع*

*شرح مبسط للتضخم*

زماااااان في قرية من القري
كان في سرقة محاصيل
اتفقو سبعة من اصحاب المحاصيل انه يسلموا العوض ود العمدة عيشهم ويخزنو ليهم لأنو سور بيتو عالي وعندو سلاح وما بتسرق بسهولة مقابل انو يدوهو حاجة رمزية كده
خمسطاشر نفر كل واحد سلم العوض شوال عيش واحد لكن البلولة سلمه شوالين والخضر سلمه تلاتة شوالات
نط الخضر قال يا اخوانا العوض ده يمكن ينكرنا ويقول ما عندكم عندي شي اها بعدين نقبل وين؟
اتفقو انو العوض يكتب ليهم ورق بي عدد شوالاتهم ويختمو ليهم قدام شيخ الحلة
هاك انت عندك واحد شوال دي ورقة مكتوب عليها واحد شوال متي ما جيتني البيت وجبت معاك الورقة دي بديك شوالك حتي لو ما لقيتني بتلقي اولادي
هاك انت ديل ورقتين عندك شوالين
هاك انت ديل تلاتة ورقات عندك تلاتة شوالات متي ما حبيت تشيلهم التلاتة او تشيل جزء منهم حبابك وكده
بقي العوض الآن عنده عشرين شوال عيش حقت ناس وسلمهم عشرين ورقه عباره عن ايصالات تثبت انه عندهم عندو عيش
يقوم الخضر صاحب التلاتة شوالات يحتاج لي غنماية مشي لي جارو ود احمد قال ليه انا ما عندي قروش لكن عندي شوالات عيش عند العوض بديك منهم اتنين وتديني الغنماية ود احمد قال ليو تمام
اها الخضر قال ليو بدل ما نمشي ونتلتل العوض انا بديك الورقتين خلاص بقن حقاتك وانت متي ما حبيت تشيل شوالاتك امش للعوض شيل الشوالين
وفعلا ود احمد شال الورقتين احتفظ بيهن
يقوم ود احمد زااتو يحتاج لي طوب لانو حيطتو وقعت من المطر مشي لبتاع الطوب واداه ورقة من الاداهن ليو الخضر وقال ليه دي فيها شوال عيش عند العوض اديني بيها طوب
وهكذا الناس بقت تتعامل بي وريقات العوض بدل ما يتلتلوه .
اهاااا يقووووم العوض يتزنق في عملية لي بتو وبتاع الدكان ابا يدينو وفتش سما واطة لي زول يدينو ما لقي راسو ضرب وقعد متمحن يضرب اخماسو في اسداسو
قامت جاتو فكرة شيطانية
قال طالما الناس بقت تتعامل بي الورق بتاعي من غير ما يجو يشيلو عيشهم واصلو الورق انا كاتبو بي خطي والشوالات عندي مافي زول بيجي يشيل شوالو اكتب ورقة زيادة بتاعت شوال عيش وامشي اديها الدكتور اقول ليهو عندك بيها شوال عندي متي ما حبيت تشيلو حبابك ،
ومافي زول حيعرف انو انا كتبت ورقة جديدة واساسا مافي شوال عيش لانو مافي زول بجي يفقد عيشو ،
وفعلا الامور مشت والعوض ما انكشف بعد فترة تاني اتزنق وعمل نفس الحركة مرة ومرتين وتلاتة
لكن الطامة الكبري انه الشغلانية حِلت ليهو لمن فكر يبني ليه غرفة في البيت عشان يوسع على وليداته ، فقام كتب ليه خمسطاشر ورقة بدل ما زمان كان بكتب واحدة وفعلا وزعهن علي بتاع الاسمنت وبتاع الطوب والبنايين وبني الغرفه وبقي شغال كل مايتزنق يكتب ورقه
الناس في الحلة حسو انو الورق ده كتير وحسو انو العوض ده بتلاعب فقررو انو يمشو ليو ويشيلو عيشهم ،
لكن العوض بدأ يتزاوغ منهم مره يقول ليهم المفتاح ما معاي
ومرة يقول ليهم انا اسي عيان كدي تعالو بكرة
المهم اشتكوهو لي شيخ الحلة
وجابو البوليس واي زول عنده ورقة جابها وكسرو المخزن ولقو الشوالات العشرين لكن الطامة الكبري انه في ستين نفر كل واحد شايل ورقة مختومة من العوض انو عندو بيها شوال ،
يعني ستين ورقة وعشرين شوال وكل واحد بقول انا ما عندي شغلة بس عاوز شوالي
المهم العوض اخد ليه دقة كاربة وودوهو السجن طوالي
بقي هسي كيف يحلو المشكلة ستين ورقة وعشرين شوال
شيخ الحلة قال عشان ما تحصل مضاربة ومشاكل بين الناس ديل انا بس اقسم الشوالات دي بينكم بالتساوي وكل زول يطلع ليهو تِلت شوال ،
كده بقي اي زول خسر بدون ما يشعر وحتي بتاعين الطوب والاسمنت الماعندهم شغلة بي عيش ولا شوالات طلعو خسرانين في صمة خشمهم
والورقة الكانت بتجيب ليك شوال بقت تجيب ليك تِلِت شوال والمستفيد الوحيد هو العوض
يعني ببساطة العوض سرق من كل واحد تلتين شوال من غير ما يهبش الشوالات
ده ياهو التضخم ببساطة
وده ياهو البعملو بنك السودان والدولة في الناس
الناس خسرانين وما جايبين خبر

طبعا كللللنا عارفين العوض منو
انا مابفسر وانتو ماتقصرو
(منقول بتصرف)

زكريا صالح عطبراوي
atbra13579@gmail.com