مشاهدات في الثقافه والفن والمجتمع

مشاهدات
في الفن والثقافه والمجتمع

قلبي علي وطني

اول امبارح المساء تلبية لدعوة فطور حاصرني بها صديق من اليوم الاول في رمضان وماقدرت البيها ولم يكل او يمل من الاتصال المباشر بي لتجديد الدعوه يوميا والله خجلني ورغم زحمة جدولي بالمشاغل
ورغم الزحمه الفي الشوارع وضيق الوقت اتوكلت ومشيت عليهو قريب من مترو محمد نجيب شارع المشطور بالقرب من برج سلمي وهو شاب ثلاثيني جلب كرم السودانيين معه حين هاجر لهذا البلد واصطحب مثلنا العامي الجود بالموجود عندو برش يومي يجمع فيهو الناس عشان يقدم ليهو وجبة افطار.
وانا في شارع البستان حيث تجمع معظم مكاتب السفريات من والي السودان وجدت كميه من البصات الجايه من السودان افرغت الركاب المنهكين كانت محمله
بكميه مهموله رجال ونساء واطفال وكبار سن ومرضي وشباب تتراوح اعمارهم بين 16 سنه و 25 سنه
الاوضاع المتأزمه باستمرار والضايقه المعيشيه والازمات المفتعله اجبرتهم علي مفارقة ارض الاباء والاجداد وتوديع اسرهم واخرين هربو باسرهم الصغيره من الجحيم والاتون الذي خلقه السياسيون في بلادي
جمع غفير من البشر لفظتهم الاتوبيسات منهكين معدمين يظهر التعب والقرف والمسغبه علي ملابسهم ووجوههم وشنطهم الممزقه
يفترشون الارض في انتظار انتهاء الافطار لتبلتعهم مدينة القاهره بزقاقاته وحواريها
دمعت عيني دون وعي مني وانا اشعر بالاسي حيالهم خلعت نظارتي ومسحت دمعتي بكم قميصي
ثم اسرعت في المشي بعد مافاجأني الاذان في الشارع مشيت فطرت بلا نفس ورجعت بعد الفطور اسأل في المكاتب المنتشره في شارع البستان للسفر والرحلات من والي السودا
قابلت مجموعة شباب تتراوح اعمارهم بين السطاشر سنه والثلاثين سنه ينتشروم امام المكاتب يعرضون خدماتهم للمسافرين والقادمين علي حد السواء عايز تذكره ياخال
عايز شقه
عايز عقد ايحار لتكملة اجراءات الاقامه
عايز شهادة قرونا تنقلت بينهم سائلا
اها الايام دي الشغل كيف والسفر
كانت ردودهم
والله ياخال من هنا تعبان لكين من السودان كل يوم بيدخلو مصر عن طريق معبر اشكيت الحدودي في حلفا ومعبر ارقين الحدودي في دنقلا مايقارب ال 80 اتوبيس ومتوسط الركاب في كل اتوبيس، 45 راكب علي الاقل والبيرجعو من هنا بسيطين ما اكتر من 10 اتوبيسات او 15 اتوبيس متوسط الركاب 10 في كل اتوبيس والبيرجعو ديل معظهم تجار
ومعظم البيجو شباب صغار سن جايين للشغل في المصانع والمزارع والمعمار
ولا عشان يفتشو طريقه للهجره لأوروبا
حقيقه اتصدمت بالاحصائيه دي
ليه نحنا السودانيين مجهجهين ومشلهتين ومشتتين في بلاد الدنيا رغم انو بلدنا لو استقرت والسياسيين خلو التناحر ممكن نعيش بكرامه ونرتاح من التشتت في بلاد العالمين لانو فيها من الخير مايكفينا ويكفي الحولنا من الدول
هل تعلم الحكومه السودانيه انو عدد السودانيين المهاجرين في القاهره اكتر من 8 مليون سوداني
المقدمين للجوء ما اقل من مليون والبقيه شغال معظمهم في اشغال هامشيه والشغالين في المصانع عمال بدون عقودات وبدون تامين شغالين بمرتبات متواضعه لاتكاد تكفيهم ناهيك انو يرسلو لي اسرهم عشان يعينوهم
الي متي نعاني من نزيف الشباب والكفاءات ليكونو لقمه سائغه لتجار المخدرات وتجار الاعضاء وندفعهم للهجره الغير مقننه لمختلف بلاد العالم
لابد من تقنين الخروج من السودان ووضع ضوابط قاسيه
ولكن قبل هذا وذاك لابد من توفير الامن والاستقرار وفرص العمل وضبط الاسعار في الاسواق.
كل هذا الخراب الممنهج للوطن يحدث مع سبق الاصرار والترصد من جهات بعينها لاتهمها مصلحة الوطن بقدر ماتهمها مصالحها الشخصيه
رفقا بالشباب يا احباب

زكريا صالح عطبراوي
atbra13579@gmail.com