مدني النخلي رجل يجسد الكلمه له نكهته في الشعر

الأستاذ عبدالباقي محمد البكري فنان صاحب مفرده متميزه يجعلك تحلق معه بصوت
شجي ، يختار اغنياته بدقه متناهيه من كلمه ومفردات ولحن تاثرك بجمالها أنه أستاذنا ود البكري
* كل حاجه ولا السفر ماذا يعني السفر والترحال في حياة أستاذنا ود البكري
_ السفر جميل وتغير نفسي ، في السفر ثلاثه فوائد ، والسفر لابد منه ، فيه مشاق وفيه فوائد
* الطبيعه الخلابه واثرها في حياة الأستاذ ود البكري ؟
_ دائما اعشق الطبيعه وأعشق الخضره والماء وأحب ان أكون وسط الاريحين والأزهر والله سبحانه وتعالي أعطي لون العسجد لون الكون لون الأرض ، بالذات الخريف عندي جميل جدا وبرتاح فيه شديد ، هذا لون الطبيعه الخلابه ماتكون الأرض الجدباء والطبيعه الخلابه هي الخضره
* متي يغني أستاذنا وماهو اختيارك الاغنيه ومتي تحسها ؟
_ مرات بجيك طيف خيال ، ومرات الاغنيه بتجيك عن طريق موقف ومرات عن طريق ذكري ففي الذكري تنهال عليك الكلمات من خلال معايشتك للماضي ، الاغنيه اذا كان ظرفك او لحظاتك العايشه حزينه تغني الاغنيه الحزينه والتي تاملت فيها مرات ، واختياري للاغنيه بحسها ، جيت زائر لناس شعرت بان لهم جرح نازف بتخيل المنظر أو تحس الاحساس وتكتب القصيده
اما طريقة الغناء في الحفل بتخيل الساحه ومن خلال الناس بغني الاغنيه
* أستاذنا ود البكري ملئ بالمشاعر والاحاسيس وهذا ينعكس في الغالبيه من اغنياتك هل يغني الأستاذ في لحظات حزن أم فرح وايهما اصدق ؟
_ أي اغنيه لها قالبها لوكنت في لحظات حزن الاغنيه بتخرج معلثم لكن اذا كنت فرحان بتغني في لحظات الفرح والاصدق لحظات الفرح الكابه ماجميله والحزن الأنسان ما بكون منشرح الصدر
* شاعر معين تحب التعامل معه ومقياس اختيارك للقصيده ؟
_ احب التعامل مع الأستاذ مدني النخلي رجل يجسد الكلمه وله نكهته في الشعر
* نقطة ضعف الأستاذ ود البكري وبكل صراحه ؟
_ نقطة ضعفي اري شخص مكلوم او محتاج ولم اتمكن من الوقوف معه مئه بالمئه
* لحظات حزن كان لها الاثر في نفسك ؟
_ أذكر سنة الجفاف ١٩٨٤م أختي مريضه بالمستشفي توفي أبنها الأول والثاني والثالث وهي في المستشفي ، لم أخبرها وعندما تسألني عنهم أقول لها حالتهم الصحيه جيده ، توفت وهي لا تعلم أن أبنائها ايضا توفوا ، هذه سنة الجفاف وكان لها الاثر حتي في تحملي للاذي والمواقف الصعبه ومن المواقف الصعبه التي تصلب الشرايين واكثر من هذا ماعندي موقف هزاني واحزنني بي شده
* لو لم تكن الأستاذ ود البكري ماذا تكون ؟
_ كنت أكون أستاذ أدرس اللغه العربيه ، أنا خريج النيلين اداب لغه عربيه عملت بالتدريس وتركته
* اغتيات الحقيبه في قمة ازدهارها بعد تردد الكثير من الشباب أغنيات الحقيبه ؟
_ أغنيات الحقيبه مرت عليها حقب بعد شويه ما بعرفوا أغنية الحقيبه ولا مفرداتها لان الشعر يتجدد علي حسب الزمن ، اخر شعراء الحقيبه كتب العبادي ( مر يانسيم بجاري واحكي ليه كل الجاري قل ليهو دمعوا الجاري في خدوده سوي مجاري ) فاثر خدود والوشم انتهي ، علي ما أعتقد ممكن يعرفو ناس الحقبة القدرنا ، أما الشباب ما بعرفو الشلوخ اربعه ولا سته أما الشعر المعاصر ( داقه في رقمو ما برد مالو نستو الايام ولا عزالو الرقم رقموا بي نفسو لي قالو قلبي كان عندو من زمان شالو ) انت لازم تعمل موازنه
* ايهما تفضل ود البكري أكثر الحفلات العامه أم المناسبات ؟
_ نحن نغني في المناسبات اكثر لأن فيها شوية بزنس والحفلات العامه كان زمان زمن السودان ضيق لكن العالم كله في يدك في الرموت ، غير ذلك علي رأس كل عشره فنان أو فنانه مافي حفله قوميه بتجيب دخل الا اذا كان من خارج الوطن الناس تشوفو وترجع
* أغنيه خالده تحب ترديدها مع نفسك دائما ؟
_ ربيع الدنيا للراحل المقيم الأستاذ عثمان حسين
* متي يرفض الاستاذ ود البكري الاغنيه خاصة كثر الشعراء والكل أصبح شاعر ؟
_ المفرده هي التي تفرض نفسها اذا شعرت بانها صادقه ، كثرت الشعراء لا تعني كل الناس شعراء ، في شعراء بالموهبه وشعراء بالهوايه ، نحن بتسيطر علينا المفرده بمعني أخترت مفردة إنسان وخرجت للجمهور معناه شاعر
* متي يكون الأستاذ ود البكري راضي عن نفسه ؟
_ عندما اعتلي المسرح واري كل الحشود تتمايل طربا حينها بكون راضي عن نفسي
* الفنانين مظلومين في حياتهم ومماتهم ؟
_ انا ضد ذلك الفنان الصادق مع جمهوره نحن رصيدنا الجمهور والله لو وقفت في الشارع وعربيتك قطعت بنزين تقف لك كميه من العربات وايضا لو حل بك مكروه ، قد يكون في تقصير من الزملاء في تقصير في المجال الفني ، لكن الجمهور يشيلك في حدقات العيون لكن مافي ظلم انشاءالله
* إتحاد الفنانين ودوره في حل مشاكل الفنانين ام انه مكان لشرب القهوه؟
_ انا علي ما اعتقد مكان لشرب الشاي والقهوه لان اساسا مافي ادارة قويه مافي انضباط مافي نقابة تجي تلقي واحد يردد في اغنياتك وانت لا تعرف من هو ومتي دخل الإتحاد ليست له بطاقه ولا متي اجازو صوته الاتحاد ده قاعد ساي مع احترامي ليهم