ما حصل قلنا اتنمروا علينا!! والحمد لله، طلعنا رجال

منسأة الكلام     الأمين التميرابي
___________

تنمر وكدا..!
…………..

أهاااا …

* عندي إحساس بقول يظهر علينا في آخر الزمان ناس قليلة حياء وما عندها أدب،لا يحترموا كبير ولا صغير، النوعية دي بدت تظهر زي جزيرة في بحر، تبدو بعيدة، لا نراها إلا عندما يتخذها طير أبو الكرك محطة وقود..!

* وقفة ألم.
ظهرت اليومين ديل، كلمة تنمر! زمان لما كنا صغار، الواحد ينهرو المعلم، ونسكت!
وينهرنا الكبير، لو أخطأنا ونسكت!
حتى مرات يجلدونا في المدرسة بلا سبب،وبرضو نسكت!
أتذكر في أولى ابتدائي،في معلم لقاني أچبلغ في البحر ،عامل فيها كيجاب،ههه..
مسكني بي سوط،أداني علقة نضيفة، ولي يوم الليلة بحترمو إحترام زيادة..
ما حصل قلنا اتنمروا علينا!!
والحمد لله، طلعنا رجال والله نأكل الشوك حااااف!!
حكاية التنمر الطالعة جديدة دي ما ليها لزوم تب!
شنو يعني الواحد أو الواحدة، يظهر في فيديو يرمي ليه دميعات، وينيص!!
عشان يظهر في الأسافير،بغرض الشهرة!
أنا ذاتي فكرت أجيب مصور، وأرمي لي دميعات غزيرة كمان! وأقول في واحد اتنمر علي!!
بالله فكونا من الأوهام دي، وخليكم شعب كبير بعقله، شعب يكون معلم للشعوب، مش شعب فكوكة ساكت!!!
وما نجري بالعاطفة وراء الأوهام دي، مافي حاجة إسمها اتنمر علي أو عليك، زول ماشي في دربك عديييل،وماسك لسانك، عوجة ما بتجيك، كمان لو في زول من العينة اللي ما عندها أدب أساء ليك في حاجة،عندك تلاتة من الحلول،،
إما ترد الإساءة ويكون أخذت حقك كامل،وما بتجامل!
أو تمشي المحكمة دربك عديل،ترفع قضية.
أو تعفيه،وترجى حقك عند الله سبحانه وتعالى.
لكن ما تعمل لينا(هيدك) ، رأسنا دا خسرانين عليه، كل يوم حبتين بندول، والفينا مكفينا!!
العبارة الأخيرة دي ،ذكرتني واحدة من أناشيد الكيزان الوهمية زمان، رغم إنو لحنها جميل،مفروض يكون اللحن في نشيد وطني،أو أغنية تراثية..
بداية النشيد تقول :
ما دايرين دقيق،فينا قمحنا كتير يكفينا..!!
ولي يومنا دا، محتاجين لي دقيق الفينا،أمانة في اللقيمات مو سمح سماحة..!
أفوتكم بي عافية..
وما أسمع زول يقول إتنمروا علي!

التميرابي