قمة الكوميديا الحزينه

اضحكوا شويه ياناس

زهجانه و روحي طالعه قلت احسن اشغل شريط عرسي لي ١٠سنوات ما حضرته .. وبس شغلته شوية كده…. قاموا أولادي يصرخوا و يكوركوا 😭😭
ليه ما سقتينا معاك العرس وليه بابا بس معاكم … و بكى و درديق في الواطه و دموع و مناخير سائله وواحد من اولادي طق كسّر الشاشة قال الا امشي معاكم 😭😭💔 والصريخ حرك الجو والدنيا جاطت عايزه اسكتهم وافهمهم بس مافي فايدة ،،
شوي كده جات نسيبتي قالت لي مالهم الشفع ديل؟؟ بديت احكي ليها في القصة وهي عينها في الشريط هنااااااااك…. تعاين و تتفرج في شريط العرس كمان هي قامت تصرررخ وتلطم و تسكل و تبكي قلت لها سلامات يا حجة مالك 😭😭😭
قالت لي ده اخوي الشهيد وابوي وده عمي وووووب وووووووب. ووووووووب وا سوادي وا رمادي … طوالي قمت قلدتها و طقينا الكوراك لانه صراحة كل المراحيم طلعوا في الشريط 😒😤😷😫

اها بقى الصوت عالي حتى جيرانا من الصريخ جوا جارين و بدون ما يفهموا الحاصل شنو مسكونا وقلدونا ويبكوا معانا 😭😭
والعده مرقت و سرامس الشاي و القهوة اتشتت و حفاظات الموية الباردة اتملت

تقول اسي يعني لو انا قعدت بي زهجتي و الضيقة العلي ما احسن من العزا البقيت فيهو ده 😂😂🤣🤣