فوق رأي

* كثير من الشباب عايز يبني مستقبله وأنا بالجد شفقان عليهم لأننا في زمن لو عايز تبني راكوبه تجرسك ناهيك عن بناية مستقبل
* أي رئيس فيه حرف الباء دكتاتوري وبتاع ركوب راس ابتداء من بوتن وبوش الاب والابن وبشار وبشه ونابليون والقائمة طويله
* الدولار طار السما تاني الدفاعات الاوكرانيه ما بتنزله الحقنا يالفكي لقد اصبح جنيهنا كجلمود صخر حطه الدولار من علا
* قالوا حرب اوكرانيا طلعت اسعار الزيت ياعالم نحن زيتنا براه طلع
* أنا بقيت أخاف من حكاية المشاريع دي لانه المشروع الحضاري لسه ما عارفين الجماعه زرعو شنو الأيام دي طالعين في مشروع وطني
نصيحه لله الشتاء ولي ما تزرعو طماطم
* لاقو لي الزول القال كل حركه فيها بركه ده لو شاف ناس الحركات دي كان غير رأيه فنحن عندنا ٣٨ حركه في منطقه واحده صراحه دي حركات بايخه سااااي وناسه بتاعين حركات ، فقط احي ناس الحركه
* أنا اشك ان الجريف تابعه الي اوكرانيا فمعظم مدنها كيف خاركيف …….. الخ
* قالو توقعات باعلان حالة الطوارئ الاقتصاديه يعني تاني ما ناكل ولا ايه الحكايه
* زمان كان الطير المهاجر حاليا الكل مهاجر والمغالط يسال البحر الابيض والاسماك والسنابك
* التضخم وصل الي التهاني والتبريكات ، كان الناس في بلدي الواحد يكتب مبروك الزواج او النجاح ثم تدحرج الرقم الي الالف ومن ثم مليون مبروك والان تجد الواحد يكتب تراليون مبروك الله يجازي كل من أدخلنا في هذا النفق وهذا التضخم
* كنا ناس مظاهر الان بقينا ناس مظاهرات
* كل طائر اذا ما طار يقع الا الدولار حتي الناس الصارعوه وقعهم دا وقع روسيا بدل نحن
* الصيدلاني قال للمريض في اليوم ثلاثه حبوب بعد كل وجبه رد المريض انت بتهظر يا إبني حليل زمن المخلوق السوداني الذي ياكل ثلاث وجبات كسره
* لوكان الفقر رجلا لقتلته
* رغم القوات الكبيره التي دخلت اوكرانيا لم نسمع أن فتاة اغتصبت يكون ما عندهم كبري المسلميه