غنم إبليس محمد عبد القادر العاليابي
غنم إبليس
كان متمحن جنب الباب
وسارح كان بي غنم إبليس
وأنا جاييهو عشان أحكيلو
ماكت قايلو معاه ونيس
نضمت معاه لقيتو كتر
صاري وشيهو وشايل كيس
يعقد ويطلق يقطع ويربط
دااابو الزول ياأخواني عريس
***********
مما عررس ليهو شهر
موظف جدا بي الماهيه
لما نهرتو أنخلع إتماسك
وقام قال ليا دي ماالمحريه
صاحب العده العقبو البارح
بددل بدلتو بي كوريه
والدكان الفاتح بابو
داير منو ديون كميه
***********
زول ماهيتو كم مليون
محل مايمدها مابيه تحوق
حاول يهرب من الواقع
وفكر يمشي يبيع السوق
وفكر تاني يبيع البيت
لكن البيت حق ناسا فوق
يدفع إيجارو وكان إتأخر
مطرود وكمان بي قلة ذوق
************
يجيب التوم دايرين البصله
يجيب السكر وينو الشاي
غداء بي لحمه دا موش في بالو
زولا غايتو عايش ساي
لاماضيهو العاشو جميل
ولاعشمان في الزمن الجاي
وسابني وفااات لي غنم إبليس
يرعى ويكتب في الدوباي
محمد عبد القادر العاليابي