على صفيح ساخر نادر التوم

على صفيح ساخر نادر التوم
ما كنت قايل قدر كدا!
تسخينة : الفرح في دربي عارفو أصلو ما بطول كتير.. زي غمام في سماي عد سابني في عز الهجير.
تسخينة ثانية: لا أسكت الله لكم حسا!
الرجل كان لديه قضية ضد آخر
ذهب للعرضحالجي ليكتب له عريضة
فلما قرأ له العريضة (إنتحب الفتى)
فسأله العرضحالجي: ما بك يا رجل؟
فقال: (ما كنت قايل روحي مظلوم قدر كدا)!!!
و إعلام و جمهور الهلال يذكرنا بالقصة
ما كنت عارف روحي (مفروس ) من المريخ قدر كدا
ما كنت قايل النقطة دي مسخنة كدا
ما كنت بفتكر الطيش دي حارة كدا
إهي إهي إهي
نقول لكم كما قال العرضحاجي:
إستغفروا الله.. لا تهلكوا أنفسكم
إنتو مغبونين صاح
لكين كمان (ما للدرجة دي)!
زعطوطة مبسوطة!!!
شوط كامل و المريخ يلعب ناقص
و المغبون ما صدق حينما سنحت له مصادفة سجل منها الهدف
مشكلتهم بنسوا سريع خلاص
ياخي قبل جمعتين السماني ما جاب فيك اثنين؟
فرحانين بالقون يا أبو نقطون؟
ميدان رابعة
بفوزه(أخيرا) بهدف يتيم ارتفع الهلال برضيده إلي ٤ نقاط
ليلحق بمن سبقوه في هذا المضمار
الزعيم و الأهلي
يعني الأربعة العاجباك دي جبناها زمان
و محطة وقفنا فيها زمااان
زي ما انت وقفت كتير في شارع ١
لكن شكلو كدا الصيني و كلارك عملو ليكم عريضة
لتكتشفوا إنكم
ما كنتو قايلين روحكم مغبونين و ممكونين و تعبانين و غضبانين كدا!
كلنا أربعة بالأهلي
الذي يلعب بكره إن شاءالله
يا زادها نقطة يا بقى في نفس المحطة
صن داونز لو طبق ليو الكي
ح يبقى ١٠ و يتأهل و يتصدر
و يكون معانا كلنا في الهوا سوا
٤ مباريات و ٤ نقاط
و العياط يملأ شبكتو أقصد الحشاش!
نفس أخطاء زمان!!!
قبل أعوام كان بين المريخ و التأهل أمام شبيبة القبائل دقائق
نام الهلالاب بالحسرة بعد أن تقدم المريخ ثلاثة مرات
و إستيقظوا بالغبطة على حس خروج المريخ في آخر اللحظات
و أمام الأهلي تكررت نفس الحركات
و أمام عيوطة الحصالة عادت بالكربونات
للأسف دقائق المدربين الأخيرة
و ليس شوط المدربين أثبتت فشل مدربينا و لاعبينا على حد سواء
و في هذه البطولة أهدوا الأهلي و الهلال (نقطتين) ما كانوا يستحقونها بالتفريط في آخر الدقائق.
و أهدوهم فرحة هستيرية
ما كانوا قايلين إنهم محتاجين لها قدر كدا.
تخريمة: اللاعب السوداني عشعش في ذهنو حكاية شوط المدربين و بقى يركن و يتوه من مرفأ لي مرفأ و يتلفت زي المروح حاجة.
و لما يتنشل يقول و الله ما كنت عارف بجيبو فينا قون في وكت زي دا!
ما قايلكم شفقانين قدر كدا !!@@
ياخ و الله ما كنا قايلين الطيش دي حارقاكم كدا
مع إنها بتحرق فعلا. بتحرق الواطيها و البشجعو.
لكين كمان عندكم قون و نقطة بس (ينفع اسم عمود أو برنامج تلفزيوني ).. أها يقولوا عليكم الأول و لا التاني؟
ليه إنتو قايلنو السماني؟؟،
طيش عن جدارة و إستحقائق و نتائج
ما مفروض تحرقكم قدر دا
و هسه بعد فزتو على فريق ناقص ما فرحتو لانكم غادرتو محطة عيوطة الحصالة
بل فرحتو إنو الزعيم بقى الطيش مع إنو لسه في جولتين..
و دي مشكلتكم على مدى الأيام وعبر التأريخ
بتحبوا المريخ يخفق أكثر من كونكم تنجحو و تعبرو و تنتصرو..
الشفقة تطير لسه بكير
الطيش محمداكم محمداكم في النهاية كان براكم كان مشترك.
ما بتطيرو براكم!!!
شكلو كدا ح نصبركم و نطمنكم
إنو ما بتطيروا براكم
فرطتو أول وةطيشتو
و فرطنا نحن في نقاط ساهلة موية فلحقنا بكم
عندكم نقطة واحدة
البخاف منو عليك الله؟
صديقي و إبن عمي الأستاذ جعفر عثمان
خلي الهلال بحق و حقيقة كون أنه يشجعه متى عقود و لم يحقق بطولة
ما جايب خبر .. ما زي الجماعة يقولوا خلينا الهلال من يغلب المريخ يرجعو
جعفر كان لاعب كورة ممبز و مدافع جسور
قال لي: المحيرني إنتو عندكم ٤ نقاط و الهلال (فرد واحدة) هسه البخاف من التاني منو؟
منطق و الله
الهلالاب ذاتهم ما كانو قايلين إنكم خايفين منهم كدا!!
و الله بي عشرة لو شديتو حيلكم كان غلبتوهم.. و حصلت قبل كدا!
و رجعنا تاني!!!
بعد ما قالوا (هو البلد دي فيها كورة)
و نحن خلينا الهلال
و باركوا لينا الثنائية السمانية
بكل ود و أريحية
رجعو تاني للحركات الما أصلية
و نحن الهلال بنريدو جد
نهواهو نعشفو للأبد.. مع إنو بعد قون السماني التاني أي واحد فيهم لبد
و يجوك هسه و ما عندهم غير قوانين في شباك الزعيم و يقولوا ليك إنت الطيش
ما عارفين إنو الطيش دي حارقاكم كدا!!
مديدة الحلبي و الهرشي نفعت
الزول دا ليو زمن بكورك فيكم
و الليلة حلف ليكم حرام عديل لو طرتو حرم م نشجعكم. و نشوف لينا فريق تاني نشجعو
شكلو (الهرشي) نفعتكم و جابت راسكم.. و جابت حقها.
أحمدو الله إنو الكورة بدون جمهور
كان جمهوركم الفلاق دا فلقكم
و عرفتو إنكم و إنهم مغبونين شديد.
خربتها!!!!
صحيح إنو لعب لعيبة الهلال على الأجسام أكثر من الكورة
و صحيح أنهم يستهدفون(النجوم) باللعب الخشن.. و حتى الحكام ما نجوا من (ضرباتهم).. و الما مصدق يسأل الحيمودي الرموهو فوق استادهم ببنية تحتية
كل ذلك صحيح لكن الحكم كترها و مسخها
ليضرب عصفورين بحجر.. أصفر و أزرق!

و الما بقيف بعد الكورة دي عرضة ليقيف الجاية (كان حيينا)
بالمناسبة: إنتو لبستو أصفر ليه؟
السؤال لو كانت المباراة طرفها فريق سوداني و آخر ما سوداني.. كان كرت الما سوداني كل هذه الكروت؟
منكم براكم!
ربما يكون الحكم أثر بطريقة أو بأخرى على النتيجة
لكن بأيديكم أنتم
لم تلعبوا .. وىفأحأتونا
تدوينة: الخايف منو: يلعبو بينا سياسة يخلونا نطير بعض و يتأهلو هم.
الجو!!!!
تبرير الجو كان حلو و سخن ما منطقي
يعني إنتو مولودين في حي الوزير و لا أرض اللوا؟
ماهم الجوهم سمح جوا طقطقوا الهلال هنا الجوو كعب و شالو نقلتهم و مشوا زي الحصالة أقصد زي الحلاوة.
لو الجو بأثر كان انغلبو. حالتهم جايين من كأس العالم من جو أبرد من مصر
خليكم منطقيبن شوية شان تقنعزنا!
ساخر بارد
جمعة العجب فعلا الطيش بقى يتفاصح
و أبونقطة عيوطة الحصالة بقت تصرح و تستهتر كمان فيا سبحان الله.
أها السماني أخد كرت .. إرتحتو؟؟
أهدافيا الهلال جايب قوانين في المريخ و خاشي فيو مثلها من المريخ و حبة من صن داونز يعني سالب قوون.. سالب فؤادي و ما عليك
المريخ ٢ في الهلال ٢ في الأهلي ٤، مستقبل ٢ من الهلال و ٢ من الأهلي ٤ يعني صفر
الأهلي ٣ في المريخ مستقبل ٢ من المريخ و حبة ولا ٢ ما عارف من صن داونز يعني يا صفر يا سالب!
الكلام دا بتحدد بعد النقاط تتساوى يا عيوطة الحصالة مو هسه!
هواء ساخن
ايجابية شديدة جدا من جمهور و إعلام الهلال: موش كونهم طيش و بتكلموا عن التأهل.. بل حصالة و بتكلموا عن البطولة.. شفتو الثقة دي كيف؟؟؟؟

باص بيني: كلما لعب المريخ التعادل إنغلب .  إتعظوا ياخ.

الغريبة وكت ما لعبو كويس غلبو.!!!
و ما يضير البحر أمسى زاخرا إن رمى فيه غلام بحجر
و يظل المريخ الحاضر و المستقبل و التأريخ!
المخدرات خطر داهم مكافحته مسؤولية الجميع
خلو بالكم من عيالكم!
آخر قطرة: أم فريحانة!
أللهم صل وسلم وبارك على سيدنا محمد وعلى آله وصحبه بقدر عظمة ذاتك يا أحد.
و هذه بصمتي