عدَّة الشغل، سمير العود – الحلقة التانية
عِدَّة الشُغُل- نادر التوم
سمير العود – 2
يا بت الجيران أنا بيك ولهان!
يا سلالالام ياخ أنا عارف إنو البلد دي لسه فيها ناس فناَّنة و بتقيم الفن الأصيل و الطرب الجميل
أي نعم هم مسحوقين و بركبوا دفَّارات معانا، لكين مرهفين رهافة الحس البلون عيون المتعبين
حاضر يا حبيبنا نغني ليك طوالي
– سوري.. قالها سمير للفتاة التي إنتهرته قبل قليل.. ثم طَفِقَ يعزف
و إنطلق صوته موازياً لإنطلاق الدفار في الأفق مثيراً الغبار و الكتَّاحة لتمتزج مع علايل سمير
الناس بقت ما بتصدِّق أيِّ حاجة تقولا
حتى لو كانت حاجة مقبولة
البلد دي بِقَت ما معقولة
و بجي يوم أفوتها بي طولا
– الله الله ياخ.. أنا قريتك ..عرفتك فنَّان.. بالله دي كلمات منو؟
دي كلمات جوجو شُرَّأب.. الشاعر اللعَّاب
– رووووعة .. يا سلام يا إبني
– و إنت ما جربَّت تكتب براك؟
– لالا أنا بلحِّن بس# و بغنِّي
لكين ممكن أجرِّب ليك هسَّه..
إنت شكلك فنَّان برضو و بتعرف تعزِف.. أمسك و أنا هسَّه بألِّف ليك حاجة تعجبك:
يا القاعدة جنبي
قالها ملتفتا للفتاة التي تجلس بجواره
يا القاعدة جنبي .. يا الساكنة قلبي
حبيبك إنتي ياخ حِبِّي
ثم عاين لبتاعة البنادول و أكمل
قولْ ليهو ياك طِبِّي
لو صدَّعتَ في دربِي
يحفظك ربي!
– كان الشاب الآخر يعزف و سمير يواصل في إنتقاء المفردات موجِّهاً إياها لكل الحسناوات:
يا اللابسة طرحة كُحلية يا بت يا أصليَّة
ماشة وين قولي ليا؟؟ .. هاك قلبي هديَّة
مشوار جميل مشيتو معاك
كمل أسرع من الماهيَّة
– يا سلالالام ياخ إنت زول فلتة.. عليك الله دي هسَّه عملتها؟
– طبعاً، طبعاً.. جيب العود شان ما بعرف أتونَّس إلا أنقرِش
– هاك نقرِش و فرفِش.. و نعنِشنا يا سلالالام ياخ .. عندك إستعارات و كنايات و حاجات عجيبة
– كيف يعني؟
– ياخ (كِمِل أسرع من الماهية) دي قوووية
الدفَّار كان يمشي ببطء و المشوار كان ثقيلاً و متثاقلاً و الصمت يخيِّم إلاَّ من سمير العود
و رفيقه الذي تعرَّف به في الدفَّار
– و بعدين عجبتني حكاية : (حبيبك إنتي ياخ حِبِّي).. عارف أنا ال2 جرَّبتهن؟
– شِنِنْ ديل؟؟
– الماهيَّة و الحب من طرف واحد
– ياخ أنا جرَّبت (الحب من طرف).. لكين طبعا أخوك لسه طالب ماعندو ماهيَّة، إلاَّ ماهيَّة علم النفس
– هههههههههه ياخ و الله مجنون.. أنا طبعاً عندي محاولات إنت (كديسة اللِّحين) بتجيك متين؟
– متى ما إستدعيها
– يعني تحضير أرواح؟
– مالك ؟
– عندي محاولات قطعتها زمان في بت الجيران ممكن تطقطقها لي؟
– يا سلالالام ياخ مالو نوثِّق للزمن دا.. طبعاً إنتو عندكم الما حبَّ بت جيرانو ما حبَّ و نحن ما عندنا ليهن الحبَّة.. كدا قول!
يا بت الجيران .. يا زول فتَّان
أنا بيك ولهان دايماً طربان
أكون فرحان
لما القاكي جنب الدكان
او ماشة المدرسة أزرق فستان
بهديك ألحان و بيك هيمان
يا بت السودان يا أريج يخلي الزول نشوان
عشرقتي حياتي زي البمبان!
– حببيييييبي أستاذ و الله.. شكلو كدا نحن ح يكون بينا تعاون فظييييع
ياخ انت شاااااذ يا ملاذ
– ملاذ منو؟
– ملاذ بت الجيران.. ههههههااااي!
ملاذ يعني زول تحفة …
و بدأ سمير ينقرش أغنية بت الجيران.. بينما مضت ساعة كاملة و الدفار يشقُّ عباب الخرطوم
نسيت أن أخبركم بم نصح الرفاق سمير و ما حدث .. كما وعدتكم في الحلقة السابقة، لكن ما مشكلة نخليها في الحلقة القادمة ان شاء الله
فلقد تُهنا مع تجليَّات سمير العود، وإندياحات صاحبو الجديد شاعر (بت الجيران)!