عاش بهلول في العصر القديم والحديث،يعني شخصية معاصرة،

بهلول

الحلقة الأولى.

عاش بهلول في العصر القديم والحديث،يعني شخصية معاصرة، وهو رجل عصامي، ولد في قرية صغيرة وربتو حبوبتو وبدت حياتو ما زي أي طفل، كان يحب جمع القرض من شجر السنط، عشان يبيعو،وبرضو بحب يمشي يزرع مع أبوه، ورعي الغنم ولا يحب اللعب مع الأطفال..!
كانت حبوبتو أم أبوه تحن عليه شديد، وتقاسمو الحلوة والمرة،من النوع البيأكل كل يوم عشاه من المغرب، وجنو فطير باللبن ونشاة حلبة، ورغم دلال حبوبتو ليهو، كان شقي خلاص، وكل همه يتعب ويشقى حتى ولو لم يجد عائد مادي كبير..
أحد الشباب سماه ديك العدة، لأنو أي حاجة ممكن يجوطا، مرة لقى الأطفال يلعبوا الكورة، صاحبنا طوالي كفكف سروالو والعراقي، ونزل !
أول كورة جاتو وهو القون، شاتا فوووق، وكسر ضفرو، ومرق دمو سائل،يضولع، ويكورك، حي ،حي، ضفري انكسر كع..!
يلا ودوني البصير،،،،،، واحد من القاعدين قال ليه: سكران أنت؟! كاسر كرونة ؟! كاسر كراعك وللا ضفرك..؟!!!
واحد شليق قال ليه: وكت ما بتعرف تشوت الكورة،الهبالة ليك شنووو!
وطبعا ً هو كان طويل القامة، بين أولاد جيله..!
واحد من الجمهور،سماهو، الديك اللنقو!
أنا براي فتشت أي قاموس، عشان أعرف معنى كلمة اللنقو،ما عرفتها..!

التميرابي

في الحلقة القادمة نواصل.