Ultimate magazine theme for WordPress.

ظلال الحروف  أماني حسن

ظلال الحروف  أماني حسن
بخاااااف!
الإحساس بالخوف إحساس بمر علي كل الناس بس بتختلف درجتو ونوعو ومسبباتو لأنو الخوف ذاتو خشم بيوت في ناس تخاف من الناس وكلام الناس وزي دا تلاقي قاعد في أمان الله مبسوط بتونس ويأكل ويشرب علي طبيعتو لما يلقى حولو ناس طوالي بغير التكنيك وبدل كان بياكل بمعدل 5لقمة/الدقيقة بقي يأكل لقمة كل 5دقائق
وفي ناس تخاف من العين وديل كلامهم يخطئ ويصيب ،البتقول شبطي إتقطع بعد سنية علقت عليه بي عينها المكوة دي ..بتكون بس دخلتو الموية ولا نزلت ليها في حفرة أثناء ماهي ماشية بسرعة الغزال في محاولة لإثبات الرشاقة وهي وزنها 84 كيلو.
لكن كمان في ناس عينها من شدة ماحارة لو عاينو للبن في ماعونو يقطع وديل الخوف علاج كويس ليهم لأنو العيشة معاهم بتكون (بالمدارقة).
في ناس بتخاف من الإمتحان وهو يكون ماقارئ ولاسطر ماعارف الخوف من شنو هنا إلاَّ يكون خائف ينجح مثلا ودا بنقول ليه أقرأ وذاكر ماتبقى زي الطالب القام صلاة الصبح يدعو ويقول: يارب كما خلقت عيسى بدون أب نجِّحني بدون مذاكرة.
في خوف من الحيوانات الفار والضب والكديسة والصرصور وديل غالبا عند البنات الغريبة الواحدة فيهم ممكن تقتل العقرب والدابي عادي وتسك الحرامي لكن عند مواجهة الفار هي قادرة تلم ناس الحلة والجيران في ثواني من ظهور الفار في مسرح الحدث.
معتقداتنا القديمة يمكن لترسخ للخوف زي يقولوا ليك الخواف ربَّا عياله يعني بقنعوك بالعرض البطئ إنك تقيف محلك وماتتقدم خطوة وتأثر السلامة.
مع انو اغلب مخاوفنا اوهام وماعندها وجود في الواقع وأنجح وسيلة لمحاربة الخوف إنو نواجهو حانلقاهو إنسحب وإختفي والحاجة دي محتاجة تمرين وممارسة إنو نعمل الشئ البنخاف منو.
وكمان نحاول قدر مانقدر ننهي الكلمة السلبية دي من قاموسنا لأنها كتيرة فيه ومن الهينة للقاسية أقرب زول ليك بدعو عليك ويقول تخاف من ضلك.
الخوف من الكلاب كمان خوف عام بتعرض ليه الكبير والصغير والرجل والمرأة و السمين و الضعيف!
قفلة: الما بخاف الله خافو!

أكتــب تعليقكـ هنــــا

لن يتم نشر عنوان بريدك الإلكتروني.