صباح غير! عبر برنامج (الجيم معطشة)

صباح غير! عبر برنامج (الجيم معطشة)
مشاهيدينا الأعزاء نرحب بكم عبر برنامج (الجيم معطشة) صباح غير.. عبر شاشة فرفشة الفضائية F M
نتناول اليوم موضوع مهم و جاذب و نتلقى إفاداتكم و مشاركاتكم عبر رقم الجوَّال و الواطس و على صفحتنا في الفيس بوك..
و كذلك على أرقام هواتفنا (الظاهرى على الشاشة)
موضوع اليوم هو سعر الرغيفة و العلاقة بين مرتب الموظف الكحيان و امكانية توفير لقمة (العيش)..
– ألوووووووو
– مرحبا نتلقى أول محادثة
– ياخي انتو ما عندكم موضوع و لاَّ شنو؟
– كيف؟ دا موضوع حيوي و بهم الناس.. إنت ما قاعد (تاكل عيش) و لا شنو؟؟
– ياخ الناس طلعت القمر و بتفكر تمشي المريخ إنتو لسه مع العيشة بي كم و زادت كم؟ و تأثير دا على الإحساس الداخلي للبني آدم السوداني؟؟
– معانا منو لو سمحت؟؟
– معانا منوووو؟
تييت بيييت طييييط
معليش انقطع الاتصال
طبعاً دا رأي و بنقبلو.. لكين ما إحتمال بعد زيادة سعر العيش دي الشارع ما نقدر نطلع خلي القمر و المريخ!
مطواصلين معاكم و عندنا (طفاصيل) كتيرة ح نتناولها بس نطلع فاصل نسمع غنية
و نرجع
………………………..
الغُنية :
خلى العيش حرااام ما دام أرى الصف يطول.
………………………….
رجعنا ليكم فررررفشاااا إف إم نحملكم بعيداً بعيداً نحو القمر و المريخ بنا يحلو (العيش) و تطيب الحياة.
– ياخ سلام عليكم
– ألو
– مرحب مرحب ممكن أشارك في المسابقة
– هي ما مسابقة لكين!
– ما مسابقة كيف هسَّه الزول لو ما سابق و ساكك بدري، بلقى ليو عيش مع الصفوف دي؟ ياخ معقول تجاري و بي 35 و 40 جنيه و برضو صف؟؟
– معانا منو؟
– معاك الطيب ياخ أنا بفتكر زيادة الخبز دي عادية
– زيادتو لي خمسة و تلاتين جنيه لكين يا زيادتو أقصد يا سعادتو؟
– مالو قولي بقت بي خمسين جنيه لاقاك زول ما قادر (يعيش) ياخ الناس في البرد تاكل في الآيس كريم و في الحر تاكل في السمك و أي صرَّاف آلي فيو صف زي الرغيف
– يعني شنو؟
– يعني كلامي واضح
بيييب بيييب طييييط
معليش فقدنا (الإطِّصال)
………………………….
– ألوووو، برنامج (العيش)؟؟
– لا برنامج الغذاء العالمي! عيش شنو يا مولانا نحن فرفشة إف إم برنامج (صباح غير)
– و ما لقيتو –غير العيش-
– يعني إنت عاجباك حكاية العيشة بي 35 جنيه دي؟
– و الله انتي مسكينة، إنتو عندكم مشكلة في الإعداد العيشة بي 35 جنيه عايش الدايش ببيعها لينا بي 40 و 50
– يعني كم؟
– يعني قريب سينتي..
– هو طبعا قالوا إحتمال تصل خمسين مع الحاصل دا، في جرايد، و في جرايد تانية في نفس اليوم قالوا كان شفتوها عملت عشرين (المدعومة ذاتها – الله يرحمها- ) ،ما تستغربو
– اتنين و نص و تعال وبص..
– لا هي لو عيشتةً حسينة عوجة مافي، المشكلة عيش عايش، و الموج و ود الفران التلاتة ما بجيبن لهن واحدة
– (عوجة و الله).. هسَّه في رايك الناس تسو شنو؟
– رأيي أنا دا؟ بري بري بري.. إنتي جايباني أقول رأيي و لاَّ أتكلَّم عن العيش
– ما ياهو
– ياهو ضوط كوم؟ لا بالله انتي بتتذايعي ع منو آ المذيعة؟؟ أنا على الطلاق أفهمها طايرة
– عندك كلمة أخيرة
– لا بس عايزكم تسمعوني: خلي العيش حرام ما دام أري الموج يحل
جبناها قبيل، لكين تاني نجيبها بي صوت فنان (شاب)
نطلع فاصل إعلاني و نرجع
…………………………….
فاصل إعلاني
صابونة (دي منو؟) شطيفة واحدة تعيد لبشرتك ألقها و جمالها
صابونة (دي منو؟) في منها بعصير القصب و في منها بالمنقا و في بالإسكان!
…………………………..
– ألو
– مرحباً
– ياخ أنا بقترح النسوان يعوسن
– ما قاعدات يعوسن.. ثم انتو بتجيبو ليهن مستلزمات العواسة؟
– مستلزمات؟ إنتي قايلاها عواسة و لا حكومة إنتقالية؟
– ما كلو عواسة في عواسة
– تيييت تيييت طوووت طوووت ، المتصل يفصل الخط بعد كلام المذيعة الغريب
و الغريبة المذيعة تتضحك ساي و تصلح في (جلحاتها)!
……………………………
– ألو
– مرحبا، لو سمحت زح من التلفزيون شان أسمعك
تلفزيون؟ إنت من زمن التلفزيون؟ أنا شغال بي إتش دي!
خلاص زح من ال إتش دي شوية
– كويس معاك عياش.. ممكن أهدي؟
– تهدي شنو ؟ إنت عارف موضوعنا؟
– إنتو عندكم موضوع؟ أنا داير أهدي لاحق الصف موقِّف لي زول هناك!
أي غنية تكون حارة من نارها و تكون تجارية ما مدعومة.. المدعوم ( ما بتبلع) ما تفتكروهو انتهي، المدعوم في نص التجاري الغالي دا (صابيها)!
…………………….
موشاهدييينا الكرام بي كدا نكون إتونسنا معاكم و إنتهينا من حلقة اليوم
شنو؟ في مكالمة ؟
– يا مخرج موش وكت المكالمات إنتهى؟
– كدا شوفيو إمكن خبر عاجل
– ألو
– أهليين و مرحبتين
– دايرة تختمي البرنامج؟
– أيوه!
– لكين أقوال الصحف ما قريتيها
– الصحف الليلة كلها عيش في عيش فما في داعي نجيب عيش و نقرا عيش كدا بتبقى عيشة تقرف
– كلامك صاح لكين في حاجة تانية
– أها!!
– الليلة الزول البعمل في الشبكة ما جبتوهو
– بتكون الشبكة كعبة
مع السلامة زي اليوم دا من الإسبوع الجايي بنتلاقى شكرا لكل الشعب السوداني المتابع معانا حكاية العيش من فرن لي فرن و دوامتون زادوهو خلوهو نقصوهو كبرهو!
ودعناكم الله.