شوفو قلة الأدب كلام زي دا تتكلمو عنو في الرادي؟

نفيسه بوبار والختان
في جلسة جبنه كالمعتاد نفيسه تتصدر المجلس
نفيسه/ يانسوان بدل القطيعه والكلام الفاضي تعالو اقول ليكم سمعت امس في الرادي شنو ، والله كلام عجيب مجموعه من الدكاترة كدي بتكلمو في الاول ما ختيت بالي الا وقعت في اضاني كلمة الختان وعرفت انو الطهور العادي بتاعنا ده
* علويه / شوفو قلة الادب كمان بقو يتكلمو عنه في الرادي والله كلام
* نفيسه/ كدي اصبري شويه انقول ليكم في الاول انا ذاتي قلت قلة ادب ، لكن لما سمعت باقي الكلام بالجد انبهرت وقلت ياريت ما طهرت بناتي تعرفو عندو اضرار كتيره بعمل التهابات وبحبس الدوره الشهريه ويقلل متعه المره في بنات بموتو عديل في الختان ، وبسبب امراض كتيره منها التهابات بالنسبه للمره والباقي كلام كتير ما خابره
* سعاد/ والله يانفيسه اخير قطيعتنا من الكلام الفاضي البتقولي فيهو ده ، الوحده بقت دايه وادوها شنطه للكلام ده يجو يقولو مانافع
* نفيسه/ والله قالو حلفو الديات قسم عديل عشان ما يختنو البنات وفي قانون عديل بحاسب الدايه
* علويه/ اطرشني ما سمعت كلام ذي ده، هسع جارتنا ستنا ما دايه وحالفه قسم لكن بطهر عادي مافي زول ساله
* سعاد/ والله يانفيسه انحنا ماعندنا كلام ذي ده وهسع انا بجهز لطهور الوليدات قبال الايجازه ما تنتهي قال منعوه قال
* نفيسه/ والله يا سعاد كان عملتي كدي الا ابلغ فيك وانتي عارفه نفيسه لمن تقول كلام قدرو
* سعاد/ لمن طهرت بناتك الايجازه الفاتت في زول سالك ما عملتي الفوت ، الحنه ساي تلاته يوم ونحن معاك ما فارقناك هسع عايزه تتطبقي في بناتي والله كلام
* نفيسه / كنت جاهله ياسعاد اختي ، لكن مما سمعت الكلام ده ما عايزه يكون في ضحايا اكتر من كده وانا قلت كلمتي ، ولو عملتيها في السر برضو ببلغ فيك وفي ستنا
* سعاد/ ما بالدس بالعديل كده وتعملي الدايراه يانفيسه والحشاش يملئ شبكته
* نفيسه/ خلاص ياسعاد والله ما تختي يدك في واحده فيهم وأنا قلت كلمتي
* سعاد/ النشوف
وبدات سعاد الاستعداد لختان بناتها وعملت الحنه وجهزت الجرتق وكل شي تمام واتحدد يوم الجمعه العصرلاجراء عملية الختان وجات ستنا بي شنطته
نفيسه مشت القسم وفتحت بلاغ وحددت ليهم الزمن ، ذي ما سعاد كانت مستعده ونفيسه برضو كانت جاهزه ، وأول ما دخلت ستنا بعد شويه دخلت نفيسه ومعاها البوليس قبض علي ستنا في حالة تلبس وكمان سعاد
* سعاد/ وووب علي يا اخواتي اخر عمري نفيسه تدخلني القسم ماعافيه ليك يانفيسه ياحاقده ياحاسده
أما ستنا تم محاسبتها وأخذ شنطتها لأنها حالفه قسم ما تقوم بعملية ختان البنات
اها رايكم شنو مع نفيسه ولا سعاد