حوار متين مع كوفيد ناينتين!

في حوار (المصالحة) و (المصارحة) كوفيد ناين تين لفرفشة:
هو انتو عندكم حاضر الآن.. لما يكون عندكم مستقبل كمان؟؟
لعبوا بي سياسة لعب القرف .. و انتو ناس منافقين حد القرف
لو غيرتو تفكيركم و سلوككم كل شئ بجيكم لحدي عندكم!
كان ما مامور ما كنت فكرت مجرد تفكير أجي بلدكم (الغالية) دي!
غسلوا قلوبكم و نواياكم و إستصحبوا عبري و دروسي معاكم
تتطعموا تقعدوا مسيخين دي حاجة بتخصَّكم انتو يا حلوين
حاوره نادر التوم
البطاقة الشخصية؟؟
– إنت عوير؟؟ دي شني الأسئلة بتاعة قنواتكم الفضائية و إذاعاتكم دي؟؟ بطاقة؟ عليك الله في حاجة معروفة في العالم دا أكتر مني؟؟
ما قاصد كدا.. عرفنا بيك بس ؟
– أبييتت إنت لو ما بتعرفني محاورني لشنو؟
إنت في بلدنا في؟
– ما بتاكَّد
كيف يعني؟
– عديل، بلدكم دي عليك الله فيها زول يقدر يتأكَّد من حاجة؟ حتى نفسو؟
صحي جابك أكل الخفافيش و الحاجات المقرفة؟
لو أكل الحاجت المقرفة بجيب فيروسات إنتو السودانيين ديل مفروض يجيكم كوفيد مليون عديل كدا: كمونية و جقاجق و كوارع و (شنو ما عارف)، البهيمة إلا قرونها ما بتاكلوها، و تحت تحت قالو القرون ماشين عليهن و الجلد كمان!
في تطوُّر و تحوُّر ليك؟
– موش في أي تين و توينتي و كدا و اس ون و لحدي ناين و كدا؟ خلاص في كوفيد توينتي و كدا و تونتي ون و إمكن تو.. الله يستر بس.
سموك الفيروس الملكي ليه، بتشجع ريال مدريد؟
– ريال مدريد يا فاران؟ أنا ملكي أصلا لأنو شكلي طبيعي زي التاج موش تاج البطولة البستلمو في السنة مرة دا.
أول ايام قالوا مافي كورونا في السودان؟
– وتاني أيام ؟؟
تاني قالوا في، لانو الدعاية الاولى كانت بتقول ( ظهور حالة في السودان).
غنوا ليك غنا كتير؟
– بي حقي
و حاربوك كتير؟
– من حقهم
يعني عارف إنك مشكلة؟
– عارف أنا (إبتلا).. زي ما بقولوا ناس الدولة العميقة زمان..، أصلاً ربنا رسلني للناس ديل عشان يرعووا، و برضو ما إرعووا، و لا ح يرعووا لحدي ما تجيهم (طامة كبرى)
و عملوا معاك لقاءات؟
– أيوه مالو فيها شنو؟
كشفت صحتنا و وزارة صحتنا و حالنا؟
– هو إنتو عندكم صحة ولا وزارة صحة مع الناس؟؟، عموما جيتي لخير، الوزير الزمان قال ليكم ما عندنا ليكم شئ ( بنادول بس#)، و الوزراء الهسه ما عارفين القصة، لو انا ما جيت كان قالوا كل الأدوية موجودة و متوفرة و راااااقدة.. صح؟؟
ما عارف و الله!!
بعرف واحد قريبي كان بتمنى أن تجيو؟ إنت بقيت ما زي أول؟ زمان سيرتك ساي مرعبة؟
– أي حاجة بتجي في الأول بكون عندها بريقها، قريبك دا لو جيتو في الأيام الأولى كان إتوفى من الخوف، بالمناسبة ناس كتار ماتوا خوفة مني أنا عارفهم.. و كمان أزيدك بيت شعر؟ في سودانيين أنا خشيت جسومهم و مرقت و هم ما جايبين خبر.. ياخ إنتو فايقين من الرغيف و باقي الصفوف؟
إنت صناعة صينية و رغم إنو بقولوا الصناعة الصينية ما أصلية لكين جهجهتنا؟
– في صيني درجة أولي، و في درجة عاشرة الناس مقامات يعني إنت مفتكر هسَّه كوفيدكم دا زي حق أمريكا و لاَّإيطاليا و لاَّ فرنسا و لا النرويج و لاَّ أيِّ حتَّة بهاجروا ليها شبابكم بالسنبك؟؟
طيب بقولوا إنت مصنوع و ترامب الموضوع دا ما عجبو؟
مصنوع؟؟ ليه أنا بسكويت؟ ترمب دا أي حاجة ما عجباهو.. و كلام إنو انا مصنوع زهجني عشان كدا اكتر ناس ضربتهم الطاغية الأمريكان.. بعدين ترامب دا (بايدن) عليو انو زول منفوش في الفاضي.. هسه المصنوع أنا و لا هو العاوز (يكنكش) في الرئاسة بالرجالة و السلاح؟
طيب المواطنين ذنبهم شنو؟
– ذنبهم بسمعوا كلام ترمب و غاشيهم
البلازما كيف معاك؟
البلازما دي شاشة.. قلت ليك أنا إبتلاء هسه ‘نتو لقيتو علاج للايدز؟.. أنا بس تشتغلو معاي وقاية، و تنظفوا ضمايركم الوسخانة دي. بلا بلازما بلا ثاني أكسيد الكربون!
في ناس إستفادو منك؟
عادي أي أزمة في ناس (معفنين) بستفيدو منها .. ناس يقولوا ليهم حظر يمرقوا، يقولوا أقفلوا الكباري يسووها تجارة و الواجعني العساكرسووها شغلة.
يا زول الكلام دا بدينك؟
– يديني شنو ياخ دي ما حاجة أي زول عايشها و شافها.. خليني اتم كلامي.. طيب العساكر العندهم تصاريح ديل يعني أنا ما بجيهم و لا هم ما بنقلوني لي حتَّات تاني؟
و في دول بدت تعمل حالات ( من راسها) عشان يجيها دعم، مع إنو لو قالت ما عندنا كورونا كان بكون حلو معاها في المستقبل، بس الناس ما بتعاين للمستقبل!
و في دول لا عندهم دقيق لا عندهم وقود لا عندهم غاز لا عندهم دولار لا عندهم حكومة لقوني سبب، و سووني شماعة، لكين مواطنيهم عرفوا الحاصل طبعا
أسمح لي أنا شايف إعلامك أكتر منك؟
أكتر مني كيف؟ إنت ما قريت عدد المصابين و الميتين؟
برضو إعلامك كتير
– انت حاسدني؟
ما حاسدك لكين زادوك كوزين
كيزان برضو؟ أها طلعني دولة عميقة عليك الله!
لانَّكم ما بتخافوا الله عشان كدا بقيتو تخافو من أيِّ شئ.
لكين نحن ما خفنا منك
إنتو منو ياخ؟؟ .. العالم كلو خاف
هسه وضعيتك شنو يا عمو كورونا؟
الناس عيَّدت مرقت على اصحابها و زهجو من الصبَّة دي.. ترامب العامل فيها حقار دا بقى يقول للناس أمرقو من البيت لحدي ما مرق هو من البيت الأبيض.. و كما تدين تدان.
و تداعياتك؟
كتيرة و الله على المستوى الاخلاقي و الاقتصادي و السياسي و الفني
الفني؟
– أيوه في فنانين و شعراء و مبدعين ظهروا بي سببي، و واحدين كمان نالو جوائز بي سببي، و واحدين بكوا عديييل و سابو البلد بي سببي.
و صحي ح تتحوَّر تاني؟
– ما معروف، حسب تحوراتكم إنتو.
و رايك شنو في ثورتنا دي؟
– و الله كانت زيي شاغلة العالم، و محيِّرة العالم لكين هسه زيي برضو بدت تتلاشى
ما حزين على الوديتهم (ديل)؟
– وديتهم أنا؟ وداهم ربنا.. الله يرحمهم و إنتو يا ريت تتعظوا!
شايفك واثق من إنو ما يلقوا ليك علاج؟
– علاج شنو ياخ ديل بلعلعو ساكت؟ الناس ديل إفتروا على ربنا، و ربنا عاقبني بيهم ،ياخ إنت عارف شنو يعني فيروس؟
شنو؟
يعني حاجة لا تذكر – زي زيادة مرتباتكم دي – ! يعني الزول المتكبر دايما ربنا بفصموا و يقصموا بي حاجة ( ولا تذكر) ..
أفهم إنك قاعد تلمِّح لي (بشَّة)؟؟
– أفهم أي حاجة المهم أي ظالم ليو نهاية و يوم و إمكن بي حاجة إستهتر بيها أو ما إتوقع نهايتو تجي منها.
كلامك صاح و الله
– غصباً عنك!
أنعشت سوق الكمامات؟
– الكمامات براها؟ الكمامات و الإشاعات و البنزينات، وحاجات تانية كتيرات
لكين اقتصاد العالم إتاثَّر؟
– غصباً عنو برضو.. الناس خايفة تمرق الشارع ياخ.. و الواحد يسلِّم عليك من بعيد،
و بقى في تباعد فعلى، بجانب التباعد الحقيقي بين الناس ( القريبين و البعيدين).
و الله لقيتك فاهم
الحمد لله.. كويس إنَّك غيرت (صورتك الذهنية) عني.. و هسَّه بتتونَّس معاي عااادي.. عارف لو ما كان إتونست معاي عادي كان خفت و البخاف من العفريت بطلع ليو
و البخاف من الكورونا بوديو!
بوديو و لا بتوديو؟
قلت ليك أنا فيروس توديو كيف يعني، زي كلكم بتتكلموا عن (الفيفا) باعتبار أنها مؤنث مع انو هو الاتحاد الدولي لكرة القدم.
طيب بمناسبة الفيفا دي، أقصد (دا) الرياضة دورت في العالم كلو إلاَّ نحن جمهورنا محروم و المباريات بقت زي بيت البكا، و زي المواصلات بعد زيادة التعريفة :
– إنتو شغلكم دا شغل معاكسات دا (يتشدَّد) و دا مع ( الولاء) بتاعو.. ثم ثانياً يا صديقي هو إنتو أصلاً يعني مقتنعين عندكم رياضة و لا كورة مع الناس يا ناس؟
ياخ بتفرِّق لينا
– عندكم ستات شاي و شوارع نيل، و حتات كتيرة بتفرِّق عليكم.. جات ع الكورة؟ الجرايد الرياضية ذاتها الأيام دي وقفت (رغم انها شغالة)، و بعدين ناسها إتحولو سياسيين
و ثورجيين كُلَّهم.
و الجمهور زي ما بقولوا ملح المباريات و اللاعب رقم 12؟
– خليكم من ملح المبارات انتو ناقصين ملح يعني حياتكم مَرَّة مُرَّة – مَرَّة بفتح الميم و مرة بضمها- ، و بعدين اتحلوا من اللاعب رقم 19 دا و تاني شوفوا الللاعب رقم 12.
مسَّخت الحياة
– هسه ما كنا كويسين.. تاني رجعنا لتبريرات و شماعات الدولة العميقة و النظام البائد دي؟ (تبيدو في السجن ياخ)، حياتكم دي براها مسيخة.
ياخ إنت ما شاء الله عارف حاجات كتيرة عننا؟
– و عارف أكتر، في حاجات ما بتتقال في الحوار دا.. إنتو شعب بتاع قوالات
و شمارات أنا أول زول خشيت فيو فهمت البلد دي الحاصل فيها شنو.. و كمان أسمح لي أقول ليك منافقين شديد إنتو!
طيب وكت عارف كدا جايينا مالك؟
مأمور و مجبور، مسيَّر و ما مخيَّر.
مستقبلنا كيف بعد تمشي انت ( بالسلامة)؟
– مستقبلكم؟ ياخ كدا ظبِّطوا حاضركم أول، هسَّه الوسخ الفي الشوارع دا ما أخطر مني لكين بس حقارتكم بي أنا!
بتشوف إنُّو (لعبوا بيك سياسة)؟
ذكرتني أحمد هارون
بالله بتعرفو؟
– كيف ما بعرفو و دي عبارة مرتبطة بيو، بعدين هو قبل فترة قال أنا أصبتو
قال؟ِ
– أيوه.
يعني ما اصبتو (حقيقةً كدا)؟
– نرجع لسؤالك
أرجع أها
– طبعا في دول كتيرة لعبت بي سياسة و أنا سوف أتحدث ( بدون ذكر أسماء) بشرح ليك الحاصل و إنت براك أوِّل و فسِّر…
تمام
– في ناس عندها أزمات إقتصادية ، و صفوف رغيف، و مشكلات دقيق، خمسمية أسبوع ما بتتحل خلي إسبوعين، اضف لذلك صفوف البنزين و ما إلى ذلك من صفوف
المهم ديل لعبوا بي سياسة لعب القرف.. استغلوني و مدَّدوا بي فتراتهم في الحكم، و لو ما شخصي الضعيف كان زمان يكونوا في خبر كان.
و عملوا ليكم كروت و كوارد و شنو و شنو و كلو بي تمنو طبعا تمنو من القروش و الزمن.
ختاما عاوز أختم معك ماهي الفرص التي خلقتها لنا هنا في السودان ( بذكر اسماء)؟
دا سؤال جميل و خير ختام شوف إنتو بلدكم دا بلد غني جداً، ثري بمعنى الكلمة و ليس ثراء مادياً فحسب، و إن كان هذا هو المطلوب في هذا الزمن..
الفرصة أمامكم بعد أن أنقشِع لتبلوروا حياتكم بصورة جديدة، و هذا طبعاً لن يتم ما لم تمحوا الصورة القديمة : فمعظمكم الآن يفكر في أنَّ : ايطاليا و فرنسا و غيرها من الدول ناسها ماتوا كتار، و يفكر بالذهاب إلى هناك و الزواج من فتاة هناك، و لو طقيتو أنا ذاتو ما عندو مانع، و هذا يا عزيزي تفكير قاصر (شديد).. يمكنكم أن تتزوجوا الإيطاليات
و الفرنسيات و غيرهن من البنات هنا في هذا السودان إذا طوَّرتم من بلادكم، لكنَّ هذا لن يحدث ما لم تغيروا من سلوككم : سلوككم كأفراد و ك(كهربا).. و السلام!
كلمة أخيرة
كلمة شنو تاني هسه ما قلت داير تختم معاي.. كلمة أخيرة ( مافي كلام)!
بشكركم على الدردشة دي و أتمنى ليكم كل السمح .. يله خلينا نحصل لينا (حالة جديدة).
إنت عندك واتس؟؟
– أبيييت (ما بوريك) على قول الشفَّع.
ممكن استفسار أخير؟؟
– هسَّه ما قلت كلمة أخيرة و حركات الصحفيين دي.. إستفسر أها لكين سريع.
ناس المنقا و الهبهان و النبق و السمك و الدكوة و النبق ديل كلهم ما بعالجوك صحي؟
– انت ما بتفهم؟ قبيل شرحت ليك إنو أنا ما عندي علاج ( لا يوجد) .. لكن لأنَّكم شعب مسكين و ساذج كل من له سلعة يريد أن يسوقها يغشكم بفوائد يخترعها من راسو.. زي حكاية عصير القصب بعمل شنو و شنو، و الحلبة بتساعد على قوة و متانة شنو ما عارف.. هذا كلام لا أساس له من الصحة هي مجرد ترهات.. و التجار كسبوا منكم بقوا يبيعوا ليكم النبقة بي عشرة جنيه ( التقول رغيفة) و بقواالفقرا بتقسموا النبقة صحي صحي…
أنا طبعاً ما بستغرب لو قلت لي إنو السجاير و الشيشة و الكحول بتروح الكورونا، لأنو شايف محلات الشيشة كترت و كمان – مع الأسف – فيهم نسبة كبيرة من النسوان.. كبِّروا دماغكم ياخ و شغلوهو شوية.. كوارع شنو البتعالج الكورونا؟؟؟
طمِّنا بس هسه إنت على إنحسار؟
امريكا بقتكم من الدرجة الرابعة للتالتة .. يعني القطر أقصد الخطر قل، و شايف ما شاء الله الناس في الكعبة طايفين أكتر من زمان.. و الجماهير بدت تخش المباريات و الحفلات عندكم بدت تكتر و المطرة صبت و الدنيا حلوة.
طيب قصة اللقاح دي كيف؟ في ناس خوفونا و ناس قالوا نتطعم؟
لا من ناحية تتطعموا بي مساختكم دي مفروض
نعم؟
– و الله شوف أنا لا بقدر اقول ليكم اتطعموا لا بقدر اقول ليكم م ا تتلقحوا، انتو ناس لواييق جدا جدا لو قلت ليكم اتطعموا تموتوا تقولوا التطعيم كتلنا و لو قلنا ليكم خلوها تقولوا الكورونا كتلنا يعني في الحاتين ميتين أحسن ما تتطعموا إلا لضرورة.
شكرا كورونا و نتمنى إنو ما نلتقيت تاني
– كلو بأمر الله .. الله معاكم خيراً جانا و جاكم!