جلكسات

🤣🤣🤣🤣🤣🤣
تلقي حبوبه زي دي تجهجه باكاتك

*من طرائف الحبوبات*

حاجه التومه قومي علي حيلك عشان الحكيم يشوفك ..
_ سمح .. ناوليني التوب يا بت
ــ يمه التوب إنتي لابساهو .. قومي بس ..
_ خلاس أسندوني ما فوقي حيل يقومني ..
ــ يلا قومي نحنا ساندنك
ــ الحكيم : حاسه بي شنو يا حاجه ..

_ والله يا وليدي ما كنت حاسه بي أي شي .. صليت الصبح حاااااضر وسويت الشاي .. وبعد الشمش مرقت قلت أمشي أجيب لي حطيبات للعواسة .. الحطب كان عندنا راقد قدام البيت .. إلا بنات سكينة ما مريحاتننا طالعات يشيلن ونازلات يشيلن .. لامن عدمننا الحطباية .. شكيتن علي الله .. أها بعد جبت الحطب وجيت .. قلت أمشي علي ناس الرضية أشوف ولدها المكسور بي سلامتك .. أماني ماهو واجعني ومقطع قلبي الجنا دا .. الله يقطع الكوره البقت تكسر الوليدات .. و….

ــ يمه الدكتور دا مستعجل كلميهو شاعره بي شنو عشان يديك العلاج ..
_ مستعجل لاحق شنو كمان .. مش ياهو عادل ولد نفيسة بت الزبير .. اليوم كلو قاعد في الشفخانه يرعى في غنم إبليس ومافي زول قاعد يجيهو .. البلد ذاتا فضت وما فيها ناس ..

ــ لا لا يا أمي .. ولد نفيسة سافر .. دا طارق ولد الطيب .. جابوهو يشتغل لمن عادل يجي ..
_ طارق ولد الطيب ؟
ــ ايوه يا أمي
_ طارق ولد سكينة الوسطاني ؟؟
ــ بس ياهو ذاتو يا أمي
_ كدي خليهو يقيف قدامي بي هنا
ــ ايوا يا حاجه انا جنبك ..
_ يا ولد .. وينو جردل الطلس الشلتو مني يوم عرس نوال أختك .. إنت قايلني ما بلقاك ؟ تشيل الجردل تقول داير تملا البراميل وتاني ما تجيبو ؟؟ ..

ــ يا أمي كدي استهدي بالله .. الدكتور دا هسي جاي يعالجك وكلامك دا ليهو اطناشر سنة ..
_ لا لا ما يعالجني ولا يخت ايدو فوقي .. وانا جردلي ما بخليهو ..
ــ أمي عليك الله الكلام دا هسي خليهو عشان إنتي عيانه ..
_ وحات الله ما بخليهو .. جردلي الجايباهو من امدرمان يشيلو الجنا السجمان دا وتاني ما يجيبو .. وكمان هسي جاي عامل فيها حكيم وداير يعالجني .. هو أنا المرضني شنو بلا جردلي الراح .. زح يا ولد من قدامي النقوم قامت قيامتك