جلكسات

هوي يا انت المطير عويناتك
دخلت لي دكان مش دكان سوبر ماركت مش سوبر ماركت حاجة كده أسمها مول وانا في الهول أقصد المول ، هو انا ذاتي الدخلني شنو مكان ذي ده ما بخشوها الا عيال وبنات عمك ميكي وعيال المصارين الملونات ناس الكاتشوب
اها اتذكرت الدخلني شنو عاوز لي كرت بتاع رصيد أبو ٢ جنيه داك بس جات بت حلوه حلا بت مقسمه ذي مصاريف الشهر ، والشعر خصل تايهه حدها الوجنات والكحل حدو الاضان والعيون شدة ما كبيرات تعاين بكل الاتجاهات الرموش عاملات ضل تحلف تقول وقعت من مسلسل تركي انا لمن بقيت اتحسبن المهم دخلت وجات علي قربت علي وقالت لي السلام عليكم
قلت ليها وعليكم السلام ٨٨
قربت من التلاجه وقالت لي تحب تشرب شنو وهي خاته يدها في الببسي اجيب ليك ببسي لا الببسي ما خلو بعمل هشاشة عظام طيب اجيب ليك سفن اب
قلت ليها بحبو السفن اب دا
شالت السفن اب واتجهت نحو ثلاجة الشوكلاته قالت اها تحب اشتري ليك شنو
قلت ليها اي حاجه علي ذوقك
قالت طيب اشتري ليك كيت كات ولا اقول ليك اشتري استكرز لا لا اشتري ليك جلكسي أحلي
نزلت الطرحه وطلعت السماعه البلوتوث من اضانها
وقالت لي هووي يا انت اسمك منو
احح انا في اللحظه دي قلبي فر وحسيت بيهو مافي ودخلت في حاله غريبه اشبه بسكر تملكني واعجب كيف بالسكر
وقلت ياجلكسي واجه حظك وسعادتك ورديت ليها
سموني الجيلي
ردت لي رد غير متوقع طيب أنت بتقابض مالك والمعاك منو ذاتو أنا كنت بتكلم بالتلفون معي حبيبي
شكيتك علي الله طيب اديني حق الاستماع وسير وسلوك
وكويس كان عندي جبنه لرفع الهبوط