جلكسات

تانى بتجى الحفله ؟

شايقى بحكى لصاحبه قال ….
كان في البلد عرس جعليين اصلي من النوع ابو كديس داك وبرضو كنت غاتس مع الطباخ من امبارح بالليل ارمرم واسفسف والهط لحدي باكر العصر حتي جيت منسلي منو على الحفلى . والفنان كان واحد كدا اسمو ود الحوري ولا الحواري ماعارفو المهم الزول دا بدا الحفله ب رميى كدا بتقول ؛
اسمك سيده وانتي السيده
و ست الجمال والروقه
ونغمة لهجك القمري المغرد قوقه
اهااا انا مسمم سم ومورم ورم من الشبع وملان دهن لحم ودهن ضلع وسلطات بجميع انواعا ومحاشي وكسره ب ام رقيقه ومخلل ومكرونه بالجبنه واقف ززززززططط .
ف شالتني الهاشميى وياريتا لو ماشالتني او بعد ماشالتني ختتني راجع تاني .
جريت على نص الدارى وانا اعمي واطرش لابشوف لا بسمع . وقفت في نصها
وملصت جلابيتي
وتحتها العراقي ملصتو
وانكربت من نصي بجلابيتي
وشنقت طاقيتي وحدرتها
ختيتا فوق حواجبى
وعكازي في يدى ركزتو في الواطه وانتكيت فوقو وشتحت كرعي هنااااك كل كراع جدعتها في بلد وبقيت منشحط راجي الجلد .
اها الجماعه كبسوني يحنسوا فيني عشان اطلع اسمها الحجازه الحركه دي كل حبانك واصاحبك الجعليين البهمهم امرك بجوا يحجزوك اذا مرقت معاهم ربنا نجاك واذا اتعاورت واتالتخت وحرنت قبلك ، ح تتبل بل العرديب
اها جوني يتلاتخوا فيني تسمع حررررم ماتندق وطلق ماتندق آسليمان . وانا مغبي كلو كلو قاتل الله الشبع يااخوانا بعمي البصر والبصيره ويخليك تتغى تغى الحمار الشبعان في الفتريتا .
قلت ليهم هوي آناس ابعدو مني انا حالف قسم الا اتجلد ابعدوا تب يارجاله شكر الله سعيكم واحسن الله عزاكم
اها قالوا لي مخيييير بلاقيك . وفعلا لاقاني ان اشاء الله ملاقاة عدوك المعاديك يامؤمن .
ف بتذكر الكان بدق الناس واحد كدا اسمو عوجى ود اب عاج ، وفعلا هذا الرجل عوجى بايتى ومقيلى عديل كدا والله . قام جاني قال لي : كدي اول شيتن اخدلك لعبه وتعال اركز وطبعا اللعبى دي يعني اخد ليك عرضى وصوقيرى وترتيرى وبشيرتن اها ختفت عكازي وعرضت زييييييينتي وصوقرت جمب الحريم والجعليات يزرغتن لي وانا مع الزغاريت اتنفخت نفخه شومى خلاااااس . لمن ضلعي ديل بقن يطقطقن براهن زي الماسكاهن ارضى وقلت كدى مشيت ركزت في نص الدارى تاني . وجاني الاعوج ود اب عاج ، الهي وانت جاهي بالتعوج خشيمو تخليهو يقوقي زي القمريى . عاين لي عين حفارة قوووووي في عويناتي وهو قصير كىادى ومتملك الواطه ومتوهط فيها تب ، وشنبو زي فرامة الخدرا الله لا زورو المصطفي رفع يدو فووووق وكربني ليك السوط الاول قولة زبططططك كدي في نص ضهري . والله الذي لا اله الا هو ضقت طعم الدم في خشمي واضني صنن صننننننن وطرشن فرد مره وعويناتي برقن براق وماشات مضلماااااات اول شي شفت الواطه حمممممرا زي الكأنو القيامى ح تقوم هسي .
اها قبل استوعب السوط الاول تاني يقوم مال التش دا يكربني بالسوط التاني في نفس بكان السوط الاول بالسنتي والملي اهااااا ،انا الله يكرم السامعين بقيت زول بول تب يااخوانا الواضح مافاضح اييى بالحيل انا بدور ابول .. والبول لا عيب ولا حرام الكبير ببول والصغير ببول كل البشريى دي بتبول اشمعنا انا؟ طبعا دا غير اني ماشايف ولا سامع وكمان محنطر بول حنطير . وتاااااني يقوم عوجى ود اب عاج يكربني بالسوط التالت وانا بالحالى. دي شكيتك شكيتن لا تتعطل ولا تتبطل ياعوجى ود اب عاج وان شاء الله تلقاهو في وليداتك وفي عافيتك ونظرك بركة سيدي ومولاي هردت جوفي وزدت خوفي اها مع السوط التالت دا خلاص رفعت الاقلام وجفت الصحف وانقطع العمل الا ولدا صالحا يدعوا لي وانا لا جنا لا تنا البدعيلى منو يايمه ؟ احييي يايمه من وجع الضلمى ف بقيت لخوخه ولكوكه وعروكه ومامسيطر ع اي شي ولا مسؤول من اي شي العايز يكب يكب والعايز يتسجم يتسجم هو انا ح احبس لمتين يعني؟ ولا دي حالى الواحد ممكن يحبس او يتحكم في حاجاتو واعصابو فيها المهم ماعارف نفسي غمران ولا واعي وواقف ع حيلي ولا واقع ولا سامع دلوكى ولا غنا ولا حاسي ب اي شي . ب اختصار كدا لمن فتحت ووعيت لقيت نفسي في الحمام وخالد ودخالتي يكورك من بره سليمان ها زول ها كفاك تعال مارق بعد دا انا تاني مابملا ليك ابريق والله دا الابريق الخامس.
سبحان الله انا لحدي تاريخ اللحظه دي ادفع نص عمري واعرف الحصل شنو من لحظة السوط التالت الفي نص الدارى لحدي مالقيت نفسي في الحمام دا؟
ماعارف الجابني منو وجابني كيف وهل شالني شيل اولا قادني قوادى ودرجني دريج او كراني كر بالواطه …