تعدد الزوجات: وووب علي ياحروم يومكم أسود، الليله جانا الخايفين منو !

نفيسه بوبار وتعدد الزوجات
وووب علي ياحروم الليله يومكم أسود، الليله جانا الخايفين منو ؟ خبر السواد الليله
في شنو يانفيسه ياتكلمينا يا تسكتي
* نفيسه/ أنا بسكت لكن البسكت ديل منو
* علويه / ديل منو يا نفوس
* نفيسه/ تعالو جاي باقي الحيطان ليها ودان ، تتذكرو أمام الجامع القالو جاي من بعيد وسكنو في الجامع
* علويه/ ايوه مش ابوسكاكات داك ودقنو ذي التيس
* سعاد/ والله شكلو ما بقول ذاتو ممكن يكون امام جامع بعاين يمين وشمال
* نفيسه / ياهو ذاتو قاعد مع رجالكم في بيتنا بعد ضيفناها واكرمناها بحرش فيهم عن تعدد الزوجات والواحد لازم يعرس اكتر من واحده ، ودار المايقوما اتملت عشان كده واجب الزواج مرة واتنين
* علويه / يعدو ايامو انشاءالله هو جاي يصلي ولا يخرب بيوتنا ، نحن مالنا ومال البنات البقو كتار الفاحشه دي بمنعوها رجالنا ، ما يمشي للشباب يحثوهم للزواج ويقول ليهم الكلام ده
* سعاد/ والله كلامك صاح العايزه تعمل شي حتي لوكانت متزوجه بتعمله
* نفيسه / ياجماعه لازم نتصرف سريع قبل ما يخطفو راجلك ياعلويه
* علويه / هو عندو شنو الفقر النقر ، هو قادر ياكل عياله عشان يجيب واحده تانيه الا يشحد
سعاد/ انا عندي توب هزاز واحد ما قادر يشتري لي غيرو ، حق البن في تلتله قال يعرس قال ، حق المدارس ماعندو ، هسع احمد ولدي خلي المدرسه عشان ماقدر علي المصاريف
المهم لازم نتصرف حتي لو طردناه من الجامع
* سعاد/ اول شئ نحاربه اذا جاء بيت أي واحده فيكم مويه ما تقدمه ليه ورجالنا بنقدر عليهم
* نفيسه/ نقنص ليه في الشارع ونلم نسوان الحله كلهم ونعمل ليه جلسه تأديبه حتي يرجع لي صوابه
* سعاد/ نلم فيه كيف ؟
* علويه / نطلب من رجالنا يدينا درس ونلم فيه
* سعاد/ اتفقنا
حدد موعد للدرس وكان ايضا عن تعدد الزوجات والرجل لازم يتزوج كما قال رسولنا الكريم وخذوهم فقراء يغنيكم الله
* نفيسه / قاصد رجالنا عديل ياهم الفقرانين ومقطعين
قبل ما يكمل حديثه جاءه هجوم كاسح من نفيسه وصحباتها واخذ علقه نضيفه
حان موعد الصلاة والامام لم يظهر ولا اي زول يعرف مشي وين
ومن اليوم داك اصبح حضور نفيسه وصحباته الي الجامع بشكل دائم منهم من تقوم بنظافة الجامع وملئ الازيار وجابو شيخه لتعلمهم وكانت الفائده تم حفظ اجزاء من القران ، تغيرت اطباعهم وتركو جلسات الجبنه والقطيعه