Ultimate magazine theme for WordPress.

تحليق اخباري

تحليق إخباري نادر التوم
اهم الاخبار-اخبار السودان
(الاثنين 13يونيو 2022 م
₩الخبر الرئيس: إضراب 718 عاملاً في 6 سدود يهدد الري الزراعي في السودان
_ موية الشراب كيف؟
₩اخبار السياسة:
♢هيئة محامي دارفور تؤكد وجود عصابات فاغنر بالمناطق الحدودية لولاية جنوب دارفور..
_ أها !
♢الحرية والتغيير: الخروج الآمن لا يعني الإفلات من العدالة
_ يعني شنو؟
♢قائد بالدعم السريع يعتدي على مصوّر بالتلفزيون.
_ و التلفزيون (قاعد) لشنو؟
لكين… اعتدى عليه لشنو؟
♢اعتبرت خطوة في الاتجاه الصحيح.. إبراهيم للبزعي يعين الخبير الاعلامي يس أبراهيم مديرا لإدارة التدريب
_ المهم التدريب ما التعيين!
♢اختراق شبكة الاتصالات السودانية بواسطة الاستخبارات الإثيوبية
_ اختراق و لا احتراق؟
♢بسبب الهجوم على اقسام الشرطة.. الحكومة تشكو الثوار لمجلس الأمن الدولي.
_ الشرطة في شكوى الشعب!
♢محتجون يغلقون شوارع رئيسة في الخرطوم
_ بتفتح !
♢تقرير: التضخم في السودان أسفل 200%.. نقطة ضوء وسط مستقبل معتم.
_ تضخم الغدة الدرقية!
♢اجتماع عاجل حول حادثة غرق باخرة المواشي بميناء سواكن
_ بعد ايييه؟
♢تقرير: الباخرة ملاك غرق علي الرصيف.. فضيحة الموانئ السودانية من المسؤول عنها..
_ الرصيف التجاري؟
♢خرجت من كل فجٍّ وفتكت بالمواطنين.. جيوش العقارب تغزو حلفا
_ يا ساتر!
♢اجتماعات لمناقشة الربط السككي السوداني الاثيوبي بنيروبي
_ سكة صفر!
♢توجيهات لجمع السلاح وتقنين العربات بالولاية الشمالية
_ الولاية الشمالية بس؟؟
♢بلاغ لوالي نهر النيل ضد شركة شريان الشمال…
_ فساد و لا شنو؟
♢وقفة احتجاجية للعاملين بالمعاشات ضد المدير تطالب بتدخل البرهان
_ المدير ذاااتو؟
♢مصرع طفلة واصابة 34 آخرين بحادث مروري بطريق (الأبيض – النهود)
_ الله يرحمهم!
♢الاعلان عن وثيقة التراضي الوطني لإدارة المرحلة الانتقالية.
_ كل شي بالتراضي!!
♢من السفينة الغارقة.. الدفاع المدني ينقذ 21 ملاحا و(3) ألف رأس من الماشية!
_ و ليه بقولو الخسارة ترليون؟؟
♢وزير العدل يقود وفد السودان المشارك في فعاليات الدورة (50) لمجلس حقوق الانسان بجنيف.
_ الإنسان السوداني؟ لانو شايف حقوقو كلها مهدرة!
♢د.عنتر حسن الشريف يكتب: من هو المسؤول السوداني الذي حارب سليمان الراجحي وماذا كان هدفه؟
_ و الله ما عارف!
♢سعودي ينقذ حياة سودانيين وجدهم في الصحراء بين الحياة والموت
_ الله يجزيه الخير و يبيض وجهو!
♢مصادر مطلعة تفيد باقتراب الاستاذ عابد سيدأحمد من منصب وزير الثقافة والإعلام بالخرطوم.
_ الغريبة كوز!!
♢اختطاف شرطي من مركز لتأمين الشهادة السودانية (غنجة).. وإغلاق لشارع الستين بأمر الثوار
_ الخطفو منو؟ و خطفو لي شنو؟
♢بشرى الصائم: (المركزي) والمكون (العسكري) وجهان لعملة واحدة.
_ عملة زي الجنيه كمان!
♢والي سنار يستقبل برطم لاستزراع مشروع نايل قولد للانتاج الزراعي .
_ استزرعوا ساي!
♢لقاء بين فولكر بيرتس وولاة دارفور برئاسة مناوي
_ دارفور بلدنا.. شوفو الطلبة و الطالبات البممتحنو أرضا، والطلبات البسيطة لمواطنيكم و ما لاقنها!
♢الفريق صديق يؤكد سحب استقالته استجابة لمناشدات داخل حزب الأمة
_ زي ترك !!
♢القنصل العام الأثيوبي في القضارف برفقه وفد من اقليم الأمهرا
_ لي شنو؟
♢الاعلان عن وثيقة جديدة تنص على بقاء مجلس السيادة بقيادة الجيش.
_ طيب ما يخلو القديمة !!!!
♢السفير السعودي يجتمع بالسفيرة الفرنسية ويستقبل سفير بريطانيا
_ سفارات ليها أبعاد!
♢هيئة مياه الخرطوم: تشغيل محطة مياه الصالحة (ب) خلال هذا الاسبوع.
_ إن شاءالله المياه ذاتها تكون صالحة!!
إنشاء شركة تأمين للإستثمار في السودان لتسهيل حركة دخول وخروج رأس المال
_ (الوطني)؟؟
♢تظاهرات في الخرطوم للمطالبة بمدنية الدولة وإنهاء الحكم العسكري.
_ مطالبة منو؟؟؟؟
♢إجراءات قانونية ضد المتورطين في غرق باخرة صادر الماشية.
_ ما تبقى زي فض الاعتصام!!
♢الحرية والتغيير لـ(الآلية الثلاثية): نرفض أي ضغوط دولية تشرعن للانقلاب.
_ و تشرعن قحت ذاااتا!
♢تقرير: أوضاع اقتصادية صعبة على السودانيين: هجرة الاستثمارات تزيد البطالة والفقر
_ هجرة الاستثمارات و لا الناس ذاتهم؟؟
♢طالبة تنجب طفلة اثناء جلسة الامتحان بالعكد بنهر النيل
_ سموها جلسة !!
♢مقتل طالبة على يد نظامى بتندلتى قبل ساعات من امتحانات الشهادة الثانوية.
_ الله يرحمها … نظامي برضو؟
♢مخيم العيون بسنار: مقابلة أكثر من (٦٠٠) مريض
_ مقابلة بس؟
العدد دا كبير كلفتوهم و لا شنو؟؟
♢إنطلاقة فعاليات ملتقى الخدمات الصحية الأول للعام 2022
_، هو في صحة و لا خدمات؟
♢مناوي: نرفض قطعا أي مساومات خاصة تحت الطاولة
_ و لا في السماء ذات البروج؟؟؟
♢شمل اغتصابات للإناث والذكور.. النيابة تسلم تقريراً خطيراً عن انتهاكات ما بعد انقلاب 25 أكتوبر للخبير المستقل
_،.. دا خبر؟ ما غريب اذا كان هناك مهنة اسمها مغتصب .. و ممتهنوها رجعوا يمتهنون و يهينون الناس أكثر شراسة و قسوة!
♢يمكن ايقافه بتقنية بسيطة بالمراكز.. حماية المستهلك: قطع الإنترنت مخالفة واستسهال للحلول.
_ المستهلك ديل ما يشوفو الرغيف الضعيف و …. النت هين كلها كم يوم، قبل كدا قفلو. كم مرة. ما حصل شى.. الكلام الأكل!
♢عقد مؤتمرا صحفيا لاستعراض انجازاته.. والي القضارف يعلن إخراج 300 ألف اسرة من الفقر
_، بره القضارف؟
♢استاذ: فيديو الغش في امتحان الشهادة اجريته 2010 كتجربة لاقناع الطلاب ان الغش والبحث عن الاجابات يضيغ وقتهم
_ وين ؟ و ان شاءالله إقتنعوا؟
♢القبض على نظامي في قضية تهريب الذهب
_ شغل منظم يعني!
♢شراكة مع القطاع الخاص لتطوير محطة بحوث الثروة الحيوانية.
الثروة الحيوانية البتغرق دي؟؟
♢بدء إجراءات التطعيم ضد السحائي والحمي الصفراء لحجاج الولاية الشمالية.
_ كورونا ماف طبعا!!
♢لقاء بين السفير السعودي والبريطاني لمساعدة السودان للمضي قُدُماً في عملية الانتقال
_ لي وين؟
♢تأجيل محاكمة قتلة العميد بريمة حتى ٢٦ يونيو الجاري
_، محاكمة انقلاب يونيو الحصل فيها شنو؟؟؟
♢التغيير التوافق الوطني: يجب عدم حصر الحوار على أطراف ومناطق معينة.
_ صاح حاوروا اي زول في اي مكان ان شاءالله الفترة الإنتقالية تستمر قرن كامل!
♢الدولار.. استقرار وتراجع
_ شان ينطلق بقوة زي السهم!
تقرير: في ظل انعقاد حوار (السلام روتانا) اليوم التنافس السياسي السوداني.. من يمتلك الأوراق الرابحة؟
_ من يمتلك (الدولار) و الاسترليني و الدينار. دي الأوراق الرابحة ذاااتها!
♢ينتمون لاقليم كردفان.. اعضاء بالعدل والمساواة يعلنون انشقاقهم ويهاجمون رئيسها.
_ رئيسها منو .. وزير القروش؟
♢تسريبات: المكون العسكري يرفض طلب من مركزي قحت للقائه سراً
_ الصلاة فيها السر و الجهر!
♢الجزولي يحذر من “انهدام جدار الثقة” بين الشعب وقيادة الجيش الحالية
_ زي جدار برلين؟؟؟
♢لقاء سوداني اماراتي بالخرطوم
الكشف عن تهرب المندوب السامي لـ(الاجئين) وتحديات تواجه المعتمدية.
_ أبحثوا معاكم موضوع (تهرب) الذهب برضو!!
♢دقلل يوجه رسائل ساخنة للحكومة
_ في الحر دا؟؟؟
♢صحفي لبرنامج سودان جديد باذاعة هلا: مايحدث ليس حوارا انما توزيع للمناصب بين قحت من جهة والعسكر وداعميهم من جهة.
_ لحنتها يعني؟ ح يوزعوا و يقسموا كيف كان ما اتحاورو؟؟؟
♢اعتقال عضو لجان مقاومة هتف ضد حوار الآلية الثلاثية
_ ليه ؟ موش وقفوها الآلية دي؟
♢(الشورى) تفجر الخلافات داخل الشعبي.. ومؤتمر صحفي عاصف اليوم
_ (الشعبي) أم درمان و لا الخرطوم؟
♢فريق هندسي مصري يصل السودان لتطوير ميناء وادي حلفا
_ الجديدة؟
♢جامعة مأمون حميدة تهدد الطلاب المدخنين (بالغرامة والفصل).
_، تهدد ليه ما تفصل؟.. التدخين في الجامعة ممنوع؟ طيب داعش ما ممنوعة؟
♢المحكمة تقرر الوقوف على وضع (توباك) في السجن ومخاوف من تعرضه للاغتيال
_ من وين؟
♢قوى الحراك: عودة قحت للحكم منفردة إستحالة
_، منفردة؟ ليه مهاجمة هي ؟؟؟
♢مدير شركة تينز بالسودان: الصين (تعول) على منتجاتها في السوق السوداني
_ العويل ما كويس!
♢أردول يؤكد أحقية البجا في التمتع بالسلطة والثروة ويطالب فولكر بضمهم للحوار
_ فولكر دا قبل كدا ما قلتو (شرير)؟؟؟
♢خمسة عشر مدرسة ومركزا لامتحان الشهادة السودانية بالخارج
_ و لسسسه!
♢العاملين بوزارة المالية البحر الأحمر يعلنون الإضراب
_ اضربوا ساي .. الاعلان بي قروش!
♢جامعة المشرق تنظم حفل تأبين للبروفيسور الراحل عبد المطلب الفحل.. الثلاثاء 14 يونيو الخامسة مساء بمقرها
_ الله يرحمو!
♢مسؤولة أمريكية لمركزي التغيير: انتم لا وزن لكم
_ نهااائي؟
♢حيدر الصافي: لا استبعد الإستقرار السياسي الشامل
_ الشامل في التاأريخ؟
♢عطفا على غرق باخرة المواشي.. المخرج والمؤلف عبد الباقي الزين كاسر يشارك العالم مأساتنا عبر فيلم (خروفتنك)
_ و أنا ساشارك ب (ضحيييتك)!
♢تجمع المهنيين: لانبارك لقاء التغيير والعسكري
_ الشغل إتهندس خلاس يا شفاتة!
♢صحيفة إسرائيلية: تل أبيب عززت علاقتها مع السودان رغم مشاكل السياسة.
_ عززت و لا عذبت؟ تيل مي.. تل عجيب!!
♢محمد ناجي الأصم يكتب: عذرا أمهات الشهداء فقد خذلناكن.
_ أمهات الحيين برضو خذلتوهن!!
♢اطلاق سراح متهم بقتل رقيب استخبارات بالجيش بعد (تدهور حالته)!
_ زي الجنيه ؟؟؟؟
♢والي الخرطوم في عمارة السلام
ضبط مخدرات بحوزة قوات أجنبية بمطار نيالا الدولي
_ الخبر دا (أين) بتاعتو وين؟
♢(15) مليون ريال سعودي تقديرات خسارة غرق باخرة المواشي
(غراق الحجرة) . تموت الناس في السودان جوعا و لحم الضأن تأكله (الموية)!
♢تسريبات: علي كرتي يعمل على ايجاد اشخاص ليديرو الفترة الانتقالي لصالحه
_، الفترة الانتقالية و لا إستثماراتو الرجعوها ليو؟؟؟
♢تحليل: لقاء “الحرية والتغيير” بعسكر السودان: تنازلات ترضي واشنطن والرياض على حساب الشارع
_ الشارع ما في زول شغال بيو لا مدنيين لا عساكر لا قحاطة لا اولاد لا بنات، لا عربية النفايات!
♢سد النهضة»: مصر ترفض المساس بـ«حقوقها التاريخية» في مياه النيل
_ شوفو الما برفض!
♢التغيير “التوافق الوطني”: الحوار في السودان أطرافه متعددة وليس كالسابق
_ دي ذاتها مشكلة أطراف متعددة معناتها كلام كتير بالتالي عمل مافي!
♢بادي يؤكد أهمية إيجاد حلول لمشاكل الأراضي الزراعية بالإقليم
_ الإقليم ياتو؟
♢ورشة لرفع قدرات العاملين بالخدمة المدنية بنهر النيل
_ ارفعوا مرتباتهم!
♢أردول يتهم جهات حكومية بتهريب الذهب ويقول: أسألوا المالية أين تذهب الأموال؟
_ حول..
المالية نحن ما بنلم فيها، أسألها انت، الحالة واحدة!
♢مصدر: الباخرة الجانحة بسواكن ترفع العلم التنزاني
_ جانحة كورونا؟ هههههه!
♢محامو الطوارئ يتقدمون ببرقية خاصة للشهداء من طلاب الثانويات
_ برقيات؟ نحن في رحلة؟

₩ اخبار الرياضية:
♢الخندقاوي على فضائية البلد يتحدث عن الراهن الهلالي
_ زي الراهن السياسي.. واااحد!
♢مدثر خيري يكشف الخطير والمثير في قضية كاس
_ أصلا كاسات بطولات ما عندكم ، في الكاسات بتاعين جدل!
♢تونسي المريخ يطرد اداريين من المعسكر
_ و الله قريتها بدون ميم!
♢محمد الشيخ مدني يكتب عن قضية انتخابات المريخ
_ الزمان؟
♢خطاب جديد من كأس بشأن قضية 24 القرشى
_ كاس كاس كاس ، البلد دي تترنح!
♢حازم :المريخ لن يعود لعصر الظلام
_ كهربتو م بتقطع؟؟
♢مدثر خيري: تصريحات حلفا والشاعر ستحولهما للجنة الانضباط
_ حوول!
♢يعقد مؤتمرا حطيرا.. برقو يطالب بمنصبه في اتحاد الكرة
_ المناصب ما بتدوم!
♢الوزيرة هزار تجدد العزم لنفير وطني يتوج النهائيات بالمدينة الرياضية
_ الواطة قلعتوها؟ و لا رجعت بعد الجماعة رجعو؟
♢تأهل المريخ والأمل والخرطوم وتوتي وانسحاب (مروي) من كأس السودان
_ الله يستر على الكهربا!
_ كاس السودان بقى زي السودان كلو بقي (ما جايب حقو)!!!
♢خمسة عربات جوائز مهرجان النادي القومي لسباق الخيل بنيالا
_ بكاسي؟
♢بعدما كان ضمن الخيارات خلال الجولات التي لعبت في الفترة الماضية.. استبعاد ملعب”الهلال” بأمر اتحاد الكرة..
_ ماقلتو جوهرة€€_^
♢المريخ يطوي ملف الكأس ويستعد للدوري الممتاز
_ الكأس الباعو زمان داك؟؟؟
♢المريخ يهزم هلال الابيض بهدف بيبو
_ بيبو حي!
♢مشاركة فاعلة لمرشح رئاسة الهلال الخندقاوي في مؤتمر فجر الغد
_ و رجعنا تاني، تاني تاني !
♢العاجي الشيخ موطورو يبدي رغبة اللعب لصقور الجديان
_ نادوا لي الشيخ!
♢الزمالك يعلن سر تواجد أطهر الطاهر في مقر النادي
_ هو سر يعني؟
♢الهلال يهزم الاهلي الخرطوم بهدف الشعلة
_ شعلة نشاط! عقبال أهداف في الأهليات البره!
♢مدرب هلال الابيض يؤكد رضاه باداء اللاعبين رغم الخروج
_ من السودان؟
♢جماهير المريخ ترفض قرارات كاس وتتمسك بحازم
_ ليه الكيل بمكيالين لما يدوكم الكأس تفرحوا و لما يطلعوا قرارات تانية تحزنو.. الواضح لا حازم لا آدم ما ح يدقوها في المريخ.. اللهم إلا مستقبلا كان الله حيانا!
₩اخبار منوعة:
♢يوم مفتوح للتوعية بمخاطر المخدرات بمشاركة أبطال مسلسل سكة ضياع
_ الأحمل لو كان في أبطال حقيقيين أقلعوا عن التعاطي ما ممثلين شان بس مسلسلهم فيو مخدرات، بالمناسبة سكة الخطر برضو اتكلم عن المخدرات و بائع السموم و غيرو و غيرو ….. إلخ!
♢أحدهم عرض عليها ود (ابرق).. ندى القلعة تنوي شراء ببغاء باكثر من ثلاثة الف دولار..
خبر الببغاء و ال ٣ ألف دولر عرفناو.. ود أبرق دي شنو؟؟
خلاص يعني الهموم و العموم كملت ماباقي غير رقيص ندى و ببغائها ؟؟
الببغاء ما الدارين يشتر وا بي ٣ ألف اد، الببغاوات البهرجوا مجانا ديل، بل بخسروا خدمة نت!
♢تقرير: ربع مليون حالة.. طلاق السودانيات أرقام صادمة وسلوك احتفالي غريب.
_ حالات الزواج أكتر و البطلقوا ديل تاني بتزوجو كان نسوان كان رجال!
♢اجهزة طبية حديثة و(3) مبردات لبنك الدم والصحة الانجابية بسنار.
_ أهم شي مبردات بنك الدم دي ، الناس دمها بقى فاير و مسخن خلاص!
♢بالجدلة السودانية.. فاصل رقص مُثير بين المودل آية آفرو والمطربة ندى القلعة يحصد آلاف التعليقات
_ و متي نحصد آلاف الجوالات من المحصولات.. الخبر دا اتكرر كتيرا، الرقص دا بقى ما بثير اي شي .. زي البمبان: اللهم إلا الدموع و وجع الحلق و الطعم الشطة!
♢شاب يفجر راس طفل جاره ويرديه قتيلا
_ لا حول ولا قوه إلا بالله!
♢إتفاق ل(تغطية) ضباط وضباط صف وجنودالفرقة الأولى مشاة بالتأمين الصحي
_ كعب تكون الشبكة كعبة!
♢بدء الدورة التدريبية القطرية حول تغذية الحيوان في السودان.
_ الحيوان الناطق دا ما بتغذي؟
♢ختام فعاليات ورشة نشر ثقافة المسؤولية المجتمعية للمؤسسات بالخرطوم.
_ المسؤولية مشتركة
آخر خبر : الخرفان الغرقت دي كان صحت لي كم زول؟
الفساد سبب خراب البلاد و العباد الربا و الرشاوي أس البلاوي المخدرات خطر داهم مكافحته مسؤولية الجميع
خلو بالكم من عيالكم.
أللهم صل وسلم وبارك على سيدنا محمد و آله!
الأخبار من شبكة السودان نيوز
تعليق فرفشة

أكتــب تعليقكـ هنــــا

لن يتم نشر عنوان بريدك الإلكتروني.