تحليق إخباري قراءة ساخرة للأخبار

 

تحليق إخباري  نادر التوم
*أبرز عناوين بعض الصحف السودانية السياسية و الإلكترونية الصادرة اليوم الجمعة 15 أبريل 2022م*

 

صحيفة أخبار اليوم الالكترونية*:

*بشرى سارة من الصحة العالمية بشأن كورونا*

_ لو إنتهت  في ناس بالنسبة ليهم ما بشرى و لا سارة، لأنهم مترزقين منها.. دا (كرت) واحد!

*طبيب سعودى يحذر من الإفراط في شرب الماء قبل الصيام*

_ قبل و لا بعد؟

*طبيبة بيطرية توضح مدى أهمية عدم غسيل اللحوم قبل طبخها*

_ عدم ؟ ما مشكلة.. المهم تنجض كويس!

صحيفة الانتباهة*

*اعتقال 200 من لجان المقاومة بالخرطوم*

_ الله يستر العشرة الأواخر قربت!

*إجلاء 1000 سوداني مقيم بأوكرانيا*

_ إجلاء فتحي؟ مساكين الوصلو هسه و جابوهم راجعين قبل ما يفهمو حاجة!

*تبرئة أنس عمر وضباط في قضية الانقلاب*

_ إنت تبرئ من الألم! هو ديل براهم؟

*توحيد”35″ مبادرة لإنهاء الأزمة..*

_ اتنين منهم ما بتوحدو، الأزمة دي يحطها رب العالمين.. (شكيناكم على الله يا سبب الأزمة كان عساكر كان مدنيين)!

*تراجع أسعار الدولار مقابل الجنيه السوداني*

_ عشان كدا الطماطم رخصت!

*الحرية والتغيير: الحكومة المزمعة ستولد”كسيحة”*

_ لو إنتو ما مشاركين صاح؟

*صحيفة السوداني الورقية*
*“الوطني” المحلول: ندعم التوافق والاستقرار*

_ أقسم بالله كان ختيتونا بنتوافق و نستقر و نعيش في تبات و نبات!

*“الشعبي”: الردّة مستحيلة” .. المحكمة تبرئ أنس عمر و”7″ من قيادات النظام السابق من تهم الإرهاب*

_، طيب رجعوا لينا الدولارات الشالتها أمريكا بتهمة الإرهاب!

*مركزيّ التغيير: ندرس دعوة الآلية الثلاثية لاجتماع مشترك*

_ الثلاثية بتاعة لا تفاوض لا شراكة لا أي شي؟

*الدمازين تستضيف مهرجان الرماية العسكري*

_على المواطنين أخذ الحيطة و الحذر!

*عرديب: مدير جامعة الخرطوم لابدّ أنّ يكون منتخبًا مباشرةً*

_و  رئيس جماعة السودان برضو! إنتو سووا الانتخابات(مباشرة) دي خلوها على ناس الجزيرة و بقية القنوات!

صحيفة الصيحة*

*حميدتي يرحّب بقرار سلفاكير بتشكيل قيادة موّحدة للقوات النظامية*

_ هنا و لا هناك؟

*“المركزيّ” يرفع سقف التمويل الأصغر*

_ برضو السوق ح يرفع سقف تماسيحو و يطلعو!

*زيادة جمارك السكر المستورد بنسبة 100%*

_ بالله بلد ملانة سكر وةعصير قصب و نحن لسه بنستورد سكر؟

*مباحثات عسكرية سودانية ـ أمريكية بالخرطوم*

__ روسيا رأيها شنو؟

صحيفة النيل الدولية:*

*رفع سقف التمويل للمزارعين إلى 1.5 مليون جنيهاً*

_ أزرعو بس.. بالإنتاج لن نحتاج!

*دقلو:نرحب بإعلان القيادة بجنوب السودان تشكيل القيادة الموحدة للقوات النظامية*

_ كدا وضحت،  شخصيا عاجبني التنسيق بين السودان و جنوبو!

*كسلا تمنع قائد قوات تحالف أحزاب وحركات شرق السودان من الدخول للولاية*

_ تاني قفلو و إحتفلو؟

*الجوازات تنفي إستخراج أرقام وطنية سودانية بدولة النيجر*

_ النيجرية؟

*الإعدام في مواجهة أجنبي قتل وقطّع الفتاة نسرين بمنطقة بري*

_ جابت ليها أجانب كمان؟ أما أجانب!

صحيفة بدون عنوان الالكترونية:*

*الأمانة العامة لمجلس السيادة توضح ملابسات دعوة إفطار عضو المجلس برطم*

_دعوة و لا مقاطعة دعوة؟

*الثروة الحيوانية تؤكد انسياب صادرات الماشية و اللحوم*

_ الشغل الإنسيابي أهم شي.. بالله عمل كم كيلو الضأن هناك وةهنا؟ بقى زي الدولار نسمع بيو إرتفع بس #

*قوى الديمقراطية والتغيير تشكل جبهة واسعة تمهيدا لإعلان العصيان المدني والإضراب السياسي*

_ و المؤتمر الوطني برضو عامل (جبهة) واسعة شديد!

*ردود أفعال عنيفة تجاه مابدر من محامي الرئيس المخلوع في الفيديو الضجة داخل المحكمة*

_ الرئيس المخلوع خبرو شنو؟ فكوهو؟

*شركة جياد تؤسس شركة جديدة للمنتجات الزراعية بجانب توطين صناعة الركشات لتصبح سودانية 100%*

_ الركشات الفي بوظت أعصابنا!

*مصنع زيوت المحركات ( فوكس ) يعود لمالكه شركة بتروباش بأمر المحكمة*

_  كإسم يعني؟

*منشآت جديدة لمباني رئاسة التأمين الصحي لولاية نهر النيل*

_ و الدواء بجي متين؟

*سودانير تستأنف رحلاتها بالايرباص 320 أمس الخميس بعد اكتمال صيانتها*

_ عقبال خط هيثرو!

*المريخ يكرم أسرة المرحوم محمد جعفر قريش وكمال عبد الغني باستاد الأبيض*

_ الوفاء لأهل العطاء!

*قوة مسلحة تعتدي على إداري سابق بنادي المريخ*

_ بسبب التسجيلات؟

*الهلال يضم الى صفوفه رسميا الكاميروني سالمون بانغا*

_ عقبال ما يضم كأس من بره!

*الهلال يتسلم بطاقات عدد من لاعبيه الجدد ليصبحوا مؤهلين رسميا للمشاركة مع الأزرق*

_ في الممتاز؟

*بعد توقيع عقد الرعاية ..إذاعة أمدرمان الرئيسية تبدأ نقل مباريات الدوري الممتاز*

_ الفؤاد ترعاه العناية!

*في تصريح جديد محمد حلفا يمهل الأندية 48 ساعة فقط لارسال كشوفاتها النهائية*

_ لي وين؟

*سيف الدمازين ينتقل معارا من المريخ الى حي العرب بورتسودان*

_ و سيف الكاملين وين؟

*حارس الهلال أبوعشرين يحذر من التعامل مع حسابات مزورة تحمل اسمه*

_ بنكك و لا فيس؟

صحيفة السوداني الالكترونية:*

*تضرر (400) فدان من المحاصيل البستانية ل(انعدام) المياه بالجزيرة*

_  بكون خزنوها!

*السيادي يطلع على أداء لجنة التحقيق في قتل المتظاهرين بعد 25 أكتوبر*

_ و فض الاعتصام مافي جديد؟

*الجيش: لا يحق لأي جهة نشر محتوى دون الرجوع للناطق الرسمي*

_ محتوى إحتيالي؟

*ظلت مشتعلة منذ (20) يوماً حرائق مجهولة تلتهم قرية (أم صيقعون الجاك) بكردفان*

_ وين ناس الإطفاء و  الدفاع المدني؟

وكالة السودان للأنباء “سونا”*

*مبادرة حكماء السودان تدعو للاتفاق على الحل الداخلي*

_ الحل الداخلي دا أهم شي.. بس ما يكون زي حل البرلمان!

*مجلس حكماء السودان يعلن توحيد الجهود الوطنية في وثيقةالسودان الدستورية*

_ هي ما كانت موحدة بالله؟ كانوا شغالين بيها كيف طيب؟

*رئيس هيئة الأركان والملحق العسكري الأمريكي يبحثان تعزيز العلاقات بين البلدين*

_ كدا رجعوا لينا دولاراتنا أول!

*البنك المركزي يؤكد مواصلته تلبية طلبات المصارف من النقد الأجنبي*

_الخبر دا كلو يوم بجي في الاخبار زي الإعلان!

*د.عبدالباقي يفتتح مشروع تأهيل مستشفى البان جديد*

_بله يله ألبان جديد!

*عضو السيادي د.عبدالباقي يطلع على قضايا صادر الثروة الحيوانية*

_ قضايا ملحة و مهمة!

*مناوي يؤكد أهمية شريحة الرحل في دعم الإقتصاد*

_ الرحل و الرحلوا بره البلد، كلهم قاعدين يدعمو !

*الجهاز المركزي للإحصاء يصدر مذكرة التضخم والمتوسط السنوي 2022*

_ و… دخل الفرد لسه عامل ألف دولار؟ إنتو ربيع وين؟ حر بس#

*الدخيري يدعو للاعتماد على الذات لتحقيق الأمن الغذائي العربي*

_ و الاعتماد على آل this! يدعو منو لكين؟؟

*برطم يترأس الاجتماع التنسيقي الأول بين ولايتي نهر النيل والشمالية*

_ في إفطار برضو؟

*الخارجية تستعرض اوضاع السودانيين باوكرانيا*

_ أكعب شي الاستعراض.. أجلو الناس خلوهم يجو لي أهلهم!

*المالية تؤكد حرص الدولة على تحسين الخدمات بولاية البحر الأحمر*

_ بس؟؟ و العاصمة خدماتها دي عاجبكم يعني؟

*وزير التعليم العالي يؤكد اهمية تعزيز التعاون بين الجامعات السودانية واليمنية*

_ جامعات اليمن فاتحة و لا زي هنا؟

*عرديب: مدير جامعة الخرطوم لابد أن يكون منتخباً انتخابات حرة ومباشرة*

_ و نزيهة!

*والى جنوب دارفور يوجه بإعادة هيكلة الخدمة المدنية العامة*

_ لأنها (هيكلها) العظمي بقى ظاهر!

*لجنة التخطيط العمراني بالجزيرة تجيز 24 مشروعاً موزعة على المحليات*

_ زراعي؟

*الهيئة العامة للغابات تقف على وضع الثروة الغابية بجنوب دارفور*

_ وضع صعب!

*اجتماع طارئ لوضع (المعالجات) اللازمة لمشروع خور ابوحبل الزراعي*

_ عيان؟

*والي جنوب كردفان يؤكد إهتمامه بشريحة الأطفال*

_ الأطفال ذاتو بقى عندهم شرائح؟

*جهاز المغتربين ومنظمة سلامات الطبية يبحثان تطوير الشراكة*

_ هناك و لا هنا؟

*هيئة الطرق والجسور بولاية الخرطوم (تبحث) استئناف العمل بجسر الدباسين*

_  إن شاءالله لقتو؟

*التربية بالنيل الأزرق تشرع في تسليم مشروع إسكان المعلمين*

_ يستاهلون.. عقبال بقية الولايات إن شاءالله! ما قلتو كتار ديل سكنوهم كيف؟

*العون الانساني بشمال دارفور يبحث مع المنظمات دعم نازحي دليبا*

*وزير الصحة بالنيل الأبيض يقف على( سير العمل) بمستشفى الشوال*

_ كدا ما بنقطع!

*إدارة صندوق التنمية بنهر النيل تقف على المنشآت الجديدة*

_ برضو تقف؟ بلد كلها وقفات، و واقفة على فد كراع!

*وصول السلع الاستهلاكية لغرب دارفور*

_ سلعتي؟

*قرار باستثناء فتح فصول دراسية بمدينتى الرصيرص والدمازين*

_ جامعة و لا تعليم عام؟

*الجزيرة:الأسبوع المقبل إنطلاقة تكملة سفلتة طريق رفاعة*

_ رفاعة وين؟ تستاهل مدينة العلم إنظلمت كتير!

*اللجنة الفنية لمصابى ثورة ديسمبر تودع الدفعة التاسعة للعلاج بالهند*

_ عاجل الشفاء للجرحى و المصابين!

*والي وسط دارفور يتفقد الإمدادات الطبية بالولاية*

_ الدوا في؟

*تكوين لجنة تسيير للاتحاد الرياضي النسوي بالنيل الأزرق*

_ بلد كلها ماشة بالتسيير، طولنا من مباريات كرة القدم النسوية، الكيزان وقفوها؟

الفساد سبب خراب البلاد

الربا و الرشاوي أس البلاوي

المخدرات خطر داهم مكافحته مسؤولية الجميع خلو بالكم

جمعة مباركة على الجميع

من عيالكم آللهم صل وسلم وبارك على سيدنا محمد و آله!

الاخبار من الوسائط

تعليق فرفشة