الكوره اقوان

صباحات الجمال والشوق علي الناس الحلوين وطبعا الحلاوة زاتو انواع
بمناسبة الحلاوة التحية الزول المرهف الجميل الأنيق ايمن حلاوة
اها حكاية الكورة اقوان تلعب وتلعب ومافي اي نتيجة واجي واحد ناطي منظراتي اقولك والله لعبنا كويس المرة الجاية نكسب طيب نحن ماكسبنا شن فائدة اللعب الكويس
دي زي حكاية البت السمحة المكسرة كل اولاد الحلة ومع الاسف لسة ماعرست ماجاها النصيب مع العلم كل بنات الحلة الفي عمرها عرسن حتي الشينات اتخارجن وهي لسة رغم الجمال
عليكم الله دا ماوجع ومغص عديل هنا السماح والوجاهة مامنها اي فائدة
علي العموم دا الحاصل في الكورة اي دورة مارقين بدون اي حاجة ياخ في دول والله في اطلس العالم ماموجودة وماشاء الله أمورة واضحة
ونحن الهلال والمريخ استادات وإعلام طبال والنتيجة تعب في الفاضي وبرضو لعبنا كويس طيب مادام لعبت وين الاقوان وبكل برود اقول ليك السنة الجاية
بكتب في الدردشة دي والليلة كورة الهلال والمريخ مع العلم كلهم ماعندك طموح لا حاج احمد لا محمد احمد
المهم ربنا انصر الجميع ونتلاقا في ساعة خير بازن الله
سامي. سيمو