العاليابي يكتب زهرة روحي (شعر)
زهرة روحي
زهرة روحي فاحت وموج أريجا غمرني
حبها لي بلاد عدم النصاح سفرني
علي مغرق بسيمته ريده كم دفرني
ياشارع مناي كتر الظنون فترني
بتلولح صباي وفي الجمال بتفنو
وبتحرش علي كل البعرفو يغنو
في عينيها شئ بشتاقلو وأجفل منو
جماله بخلي قلبي يطيب ويكتر جنو
كيفن أوصف البيها الشعر بتوصف
والماشافه كيف طول عمرو مايتأسف
التبره التخجل كل شئ يتلصف
ترباية دلع ذات نبع مابتجفف
يومداك العصير من بيته مرقت بره
صرصرت القلوب في ضحكته المنفره
وكت ندهت علي كانت سماحة زره
القلب إنخلع متل إنخلاعة الفره
بي العطر البيفضح وبي قديمك المانشه
صوبرتي القلوب وقدحتي فيهن قشه
في الآمال دروب غالبني فيها أتمشى
من قلبي العشق وروني كيف بنقشه
غايتو الريده بتخلي السنين تتلاشي
مابيعرف طبابعه إلا زولا عاشه
تفتش لي مزازات الاماني فتاشه
مابيقدر عليها الفي قليبو هشاشه
محمد عبد القادر العاليابي