Ultimate magazine theme for WordPress.

الشلب رائع خاصة عندما تشعر بالانتصار

اسلوب رخيص والاصعب عندما يكون من قريبه

الشلب اصبح من العادات الدائمه للبنات والاولاد الكل سعيد بانه شلب فلان او فلانه وما معروف الضحيه منو، اما انها لعبة كراسي في النهاية الشلب اجتهاد ولكل مجتهد نصيب
هناء خلف الله/ ياريتو كان نافع ولا شافع بعد عشرين سنه زواج اتشلبت والشلب اسلوب رخيص ، لان الواحده ما بتكون مبسوطه ولا مستمتعه لان الواحده عارفه في مشاركة ليها ، والواحده كيف ترضي تشارك زوله في حاجه ما حقته الله يجازيهم
س-م /والله الشلب شي رائع خاصة عندما تشعر بالانتصار ورغم اني شلابه كبيره لكن الشئ المحيرني الزول البشلبو وبمشي معاي صدقوني ما بحترمه لانه شخص ما عندو مبادئ ممكن يغير مجري حياته في اي وقت
ع-ع والله اكون معاك صريحه نحن مجموعه من الصحبات متزوجات ونسبة لظروف الحياه الصعبه جعلت لكل واحده منا صاحب يقوم بالجانب المادي. اتعودناكل واحده فينا تشوف صاحب التانيه يصرف عليها اكتر نقوم نشلبو منها . نتشاكل ونتصالح ونعود للشلب مرة اخري . واقول ليك صراحه الشلب بالنسبه لينا مقدرات ومواهب
اسما.م صديقتي ورفيقة دربي لا ادري مالذي حدث لها واتعلمت هذا الاسلوب الرخيص.طعنتني في حبيبي . رغم انها لا تحمل اي مؤهلات الشلب بكل المقاييس . وانا عندما عرفت اسلوبها الرخيص قطعتو معاها .تخيلو معي عشرة سنين تضيع في لمح البصر . لا اقول انها استاطعت شلبه ولن تستطيع فقط كان بقضي وقت معاها . تركته لانه رخيص ولا يستحق اي شيء
سميه محمد/ بالجد اسلوب رخيص والاصعب عندما يكون من قريبه ليك وتعرف اي شيء عن حياتك . وتعيش معاك مشاكلك وتساعد في حلها . في الاخر تلقاها خاته عينه عليه . وهذا اصعب موقف مره علي. لو كان من شخص غريب ما كان بيحرقني . شلبته ياريته حافظت عليه تخلت عنه واختارت شخص اخر
ومن هنا اقول من تشلبك من من تحب سوف تتركك وانت يا العوقه باري الشلب ذي ما انت عايز تقضي معاها وقت هي بايعاك بالرخيص
حاجه امنه/ والله يابتي زمنكم صعب كل حاجه فيهو اتغير . نحن زمنا لو عايز يشوفك ساي الا في مناسبه ومن بعيد لبعيد . يعني مافي شلب ولا الكلام الفاضي ده .
لكن يابتي مدام كلكم في الشارع ولابسات الضيق وبقيتو سلعه معروضه. ذي ما تشتري حاجه من الدكان وغيرك بشتريها . برضو انعدم فيكم الصدق والامانه . زمنا كان زوجة صاحبك تعتبرها اختك . كنا نقعد مع بعض من غير نية سؤ . لكن زمنكم ده بري منو
محمد بدر الدين/ ماعارف اقول ليك شنو بقينا ذي مقاعد الحافله ينزل راكب ويقعد اخر . اصبح هناك هرج ومرج في المشاعر . ما يحصل اليوم فقط تجد ونيس تقضي معاه الرحله . ينزل ويركب اخر. لكن اقول ليك كثير ما فكرت في نهاية هذا الشئ . ولكن دائما يكون هناك راكب يسوق الحافله اي واحده للزواج
في النهاية نقول من تشلبه او تشلبيه لن يكون لك فقط مجرد عرض مؤقت وتنتهي صلاحيته وقد تكون هناك اضرار تلحق بالطرفين

أكتــب تعليقكـ هنــــا

لن يتم نشر عنوان بريدك الإلكتروني.