إخلاص نور الدين في حوار شامل
تقديم
قبل الولوج للجزء الثالث و الأخير يجب أن نشكر (على لسان إخلاص) كل من أرسلوا كلمات إيجابية في حقها من خلال هذا الحوار و أنها تكنُّ لهم ذات الحب، بعدها نواصل في ما تبقى من رحلة عبر مسيرة الدراميَّة إخلاص نور الدين فإلى إفاداتها :
الدِّراما هي البوابة الرئيسيَّة حتى لناس النكات و الفِرَق الكوميديَّة
جلواك ظهرتو (ملف سري) و خال البنات فيلم حلو و جرئ
أداة الممثل جَسَدُو .. و مِنو النجح و ما حَسَدُو؟؟
كل الناس جميلين ودي رؤية مخرجين
(البَّبا) إنتشرت إنتشار خرافي، و زول بحضركم مافي!
إنتااااااج و سيناريو وإخراج وتمثيل ضعيف، بس قول يا لطيف!
أنا زولة محترفة ، و المسلسلات ما فيها قروش (معترفة)!
حاورها / نادر التوم ( رئيس التحرير)
ما قصة سيطرة
الممثلين البجو من الفرق الكوميدية بكون شغلهم مختلف، بشتغلو في فنادق، تخاريج… إلخ
و دي جايبة ليهم مال، ما معناتها أكثر موهبة من الممثلين، الممثلين ما لاقين الفرص شان ينتشروا ويظهرو،شغل الكوميديا بقرِّبك للناس أكتر، الناس بحبو الزول البضحكهم، والبظهرهم أكتر الدراما، (جلواك) مثلاً ظهرتو (ملف سري)، و تيراب إشتغلو دراما
الدراما البوابة الرئيسية و الأساسية (بتبروزك) و تظهِّرك بي شكل يخلِّي الناس تحبك أكتر، النجوم نجوم حتى لو عطاهم قلَّ، و الفرق برضو شغلهم خفيف و جميل و بلقو فرص أكتر
نفس الشي
في ممثلين و في منتجين لكين في النهاية بودوها التلفزيون و برضو بفتشو الرعايات و كدا.
ماف إتفاق
في قناة للدراما لكين ما مُتابعة ، لو كان في نقابة أو اتفاق بين الدراميين كان بنمشي.
على حسب
المسلسل الناسو كتار على حسب الحلقات، بغطي لو لقى رعايات، و دا غالباً في المسلسلات البرَّه، لكين هنا عندنا العدد مناسب.
شئ جديد
(نص ضربة) حاجة مختلفة ظهري بشكل مختلف حبيتو بحب إصطافو فيصل و آفرو
و إنصاف، ما داير اقول م بضيف لي أدبيَّاً لكين شي جديد، دايماً بخالف اللجنة طوالي شان ما نظلم زول.
طبيعتي كدا
أداة الممثل جَسَدُو و بعد داك خيالو وحاجاتو، في تنظير كتير لمن تحرِّك جسمك عيونك يدينك بتقلِّل من (السينس) ، كدا نبَّزتني يا زول لما تقول لي بتتكلمي بي يدينك!
إكتئاب
في ممثلات عالميات مع كبر السن بجيهم إكتئاب لأنو فرص الشغل بتقل، أنا طالبة في الكلية اشتغلت طالبة ثانوي جامعة، أم، و بتمني أشتغل حبوبة.
ما شي كعب
الجمال ما شي كعب لكن ركِّز تكون بي شكل تحترم جمهورك،أي زول في الميديا لازم يهتم بالشكل ، و دي حاجة كويسة، ما فرقت معاي قبل أصل ٤٠ أدوني أم طالما هم شايفنها جاية معاي، أنا لا صغيرة لا كبيرة شديد، عمري ٢٥ سنة إشتعلت أم عز الدين العمدة لضرورة، كلما يكبر الممثل مسؤليتو بتكبر ببقى قدوة للجيل شان تدعمهم،
طبيعة الحياة
الصورة البروفايل خاتي صورة من ٢٠٠٧ مرات بتكون في صورة عاجباك لكين ما شان تحس إنك شباب، أصلاً انت بتظهر و الناس شايفاك، العمر ماحاجة بتحسسو منها، دا كلام بقولو للنسوان ساي دي طبيعة الحياة مافي زول بركن في عمر الزهور عمر الغرام و المنى عمرو كلو، بالعكس انا مستمتعة بالتطور العمري دا و متين أولادي يكبرو و أشوفهم و أبقى حَبُّوبة، و اشتغلو، ربنا يدينا طولة العمر و الصحة والعافية!
كل الناس جميلين
ما بنتظر جمهور يقول لي بحبك، زمان بكون ممثلة واحدة في مسرحية و الجمهور يتغزل فيها، ما بحب كدا، بحب يكون عندها دور، ما حسيت اني جميلة، شايفة كل الناس جميلين، ما بقبل يكون زول جايب إخلاص عشان شكله، و كل زمن عندو تذوقو.
أكتر حاجة رفعت معنوياتي
بتكيَّف لما زول يقول لي بنحب تمثيلك، دا المكسب، أجمل كلمة : أولادي بِحبوك حبيتها في البت البتقلدني في فاطمة تحرير و رفعت لي معنوياتي، اتواصلت معاها هيو أختها،دي اكتر حاجة رفعت معنوياتي في الدنيا دي!
رؤية مخرج
ما حصل زول قال لي كبرتي، بقولو لي ضعفتي.. المسؤولية و الوليدات، وصلت ٤٠
و لاموني أمثل أم بنات قريبين مني، ما قصة شح في الممثلات ما ممكن أولدها، مازحتهم قلت ليهم: دايرين تتخاسسوا على تنتهو من قصتي سريع المخرج قال لي بحب أدائك كأم
معقول؟
شايفة الناس بقولوا إخلاص بتمثل من زمن (أقمار الضواحي) مع اني اشتغلتها عمري ١٩ سنة.
خيال
تمارين الخيال (إتذكَّر مواقف)، بدرِّبوك ع الكلام دا في الكُليَّة، تتذكر حاجات إنفعاليَّة، ما عندي زول بكرهو لكين فعلاً بنستعين بالذاكره الانفعالية عاطفة حب بتتذكر و تستدعي .
ميديا
مشاهير الوسائط ما معتمدين على دولة و لاَّ غيرها، اليو تيوب في إيد أي زول بعملو كبسولات بعد داك بتحوم، النجم بصنع نفسو ما بحتاج لاعلام و لا دولة، المشاهير البتهافتو عليهم إمكن عشان شايفين جمهورهم أكبر و أكتر.
لا أسنان لا عضام
إمتحنت علمي و كنت مميزة وكان رغبتي أدرس طب أسنان قبل ما أعرف إنو في كُليَّة بتدرس للتمثيل، شطبت الأسنان و كتبت الدراما و قلت لا أسنان لا عظام، جليت الفكرة لأنُّو من الدورة المدرسية ممتحنة إشتغلت تمثيل المعلمات عارضوني بإعتبار ممتحنة و مفروض أتفرغ لقرايتي، لما جا عثمان رمضان الله يرحمو مشيت لي قلت ليو أنا بمثل إذا عندكم دور قَدْري، و سبحآن الله إتلاقينا في عمل (نور) أول عمل تلفزيوني لي، أنا كنت ضابطة و هو عسكري قلت ليو كنت بحنِّسك أمثِّل معاكم، و لمَّا مثَّلت معاك و أنت البتنادي لي الناس ، الحمد لله من أنا طفلة كنت بحب التمثيل.
قاسم أستاذ و معلِّم
في الكلية عندنا نظام ورش بختارو الطلبة ، قاسم أبوزيد رشحوني ليهو و معروف عنو إنو بختار بدقة راقبني في الكلية في الورشة و إتكلم معاي، و قبل أقمار الضواحي شغلني فيلم (خال البنات)
خال البنات فيلم جرئ و حلو ، قاسم بالنسبة ليى أستاذ، مدرِّب معلِّم، كان دقيق جداً وعيَّن لينا صالح عبد القادر يشرق على الممثلات كلنا طلبة أنا و إنتصار ورحاب و إيرين.
من طالبة في الكلية كنت بمثل و أسافر و ما حصل شلت مادة، بعذب زملائي في البروفات
و غيرو شان كدا بقوا بِتحاشوا يشتغلوا معاي!
تغيير شخصيات
قاسم جابني لي دور بت إسمها شادية وغير لي الدور إشتغلت (شخصية شحمانة)، زي تاجوج في الخرطوم كان كاتبها مجدي النور جماهيرية فرقة الأصدقاء و محمود و سمية عبد اللطيف اشتغلت دور و بعد داك حول الادوار و اداني شخصية تاجوج!
ماركة مسجلَّة
الببا بتقولها خالتي و أمي لي أولادنا الصغار، حقت خالتي لزم مافي زول مؤلفها بنوم في حمودي ولدي، في الشارع ماشة أسمع ناس راكبين ركشة يكوركو يا الببا، طلعتي يدي أسلم عليهم لقيتهم بشاغلو في بنات. فرحت لانو الحكاية نجحت، و الحمدلله الناس لسه لتتذكر إكس لارج بالببا!
نوموا نومكم!
كنا بنصور نص الليل جنب الكبري الفتيحاب و معصورين و الكاميرا بحاسبوهم بالساعة ، جات حافلة و ألناس ماشين كان معاي حياة طلسم في (الوجه الآخر للحب)، إنتاج ياسر رضا الله يرحمو.. الساعة وحدة و تعبانين واحد كورك يا ممثلين يا وهم نوموا نومكم زول بحضركم مافي!
ضربة
مشيت لي تجديد الرخصة في الجمهور ، و كنت قاعدة عادي، بعد شوية جا واحد فال لي معقول يا أستاذة تقعدي هنا، لازم يعملو ليك (v I p)، قلت ليو أنا ما عاوزة أخش محل زول،
أصرَّعلى و قال لي : إنتى زولة مبدعة وجميلة و فنانة، و نحن بنحبك ضربتك دي بالدنيا يا تهاني الباشا!
مجمَّد
العمل الشاركت فيه و ما بثوهو رمضانيات ما بثوهو كان بطولة ولدو ناصر، أول سنه لما إتوفى كان دايرين يعملو سلسلة ناصر اشتغل أدوار بت قضيم،
ريحة التراب
لقي قبول شديد الفيلم بتاع العنصرية و عجب ناس كتار، و في الوسائط و اللقاءات طوالي بشيدوا بيهو، و دا دور الدراما تعالج القضايا!
إنفصال
في وكت واحد بكون بصور ٣،٤ أفلام شخصياتها ما عندها علاقة بي بعض ، بنفصل منها عادي، وهي بتكون شخصيات من واقعنا و مجتمعنا و بنعايشها، و بتكون مريت بيها بتكون بتهبشك، ما صعب تعملها.
شكلها في المستشفى
حبي ليك كان زادي كان صادف الوالدة جاتها أول جلطة هجمتنا، لأنها بالنسبة لينا حاجة عظيمة، و صاحبتي و أختي و صاحبة أصحابي و بصاحبوها أكتر مني ، سندي و بتمشي معاي الشغل و بتمسك لي أولادي، زولة جميلة لما مرضت كان بداية الشغل دا و حاسة إنَّها أدت (بُوش) للموضوع دا والشخصية، إحساس جاهز، ببكي بكا صادق لما اتذكر شكلها في المستشفى
ملاذ
أكتر شخصيَّة حبيت أكون زيَّها في للواقع شخصية د ملاذ في مسلسل عرفة دار المطلقات، متسامحة متصالحة متوازنه معالجة نفسية، بمثل الطرف الآخر للمآسي بمثل الأسرة المستقرَّة السليمة، بتمنى أكون زيها رغم إنِّي متوازنه لكين ما لدرجة دكتورة ملاذ!
الموووشكلة
مشكلة الدراما : إنتااااااج السيناريو الضعيف والإخراج الضعيف والتمثيل الأضعف تولِّدو الظروف وغياب الفنانين الاصيلين الحقيقين والساحه فااااضيه
مشاكل اخري وهي غياب وجيع للدراما عدم الموسسيه لمن يكون بيدهم زمام امر الدراما وغياب جسم يحمي حق الدرامي والتدريح للوصول للقمه طبعا البلد الوحيد اللي اسهل مهنه يمكن تمتهنها هي ان تصبح درامي لانو الدراما عندنا بعافيه شويه والباب فاااتح.
عشان كدا الشغلانية بايظة
صراحة مااقدر اقيم عمل او حتي لو في هنات اتكلم عنها لانو دا مجهود مقدر من الشباب في ظِل الركود بحاولو ينتجو والظاهر من خلال الأعمال ،إانتاج مجازف هههههه (تضحك)، بس في مشكله ويارب ماتصيبنا التغيب المقصود عمداً للدراما بِجلِب عابسين بالدراما وتحسب عليها وعلينا يا أخوانا ما كُل من يحوِّش قروش يقرِّر يمثِّل وينتج (ويجيب فِردَوُ) ههه، مافي رقابه ماعندنا نقابه عشان كدا الشغلانيه بايظه.
نادر جدا
لايام دي وقبلها ب٣سنين تقريبا نشاط الدراما عموما نادر جداً آخر مسرحيه بدأت يوم ٧اكتوبر ووقفت يوم٢٥من نفس الشهر لأوضاع أمنيَّة.
بديل!
مؤامرة حادثة حسد إتعمل ليى في الكلية، لحظة الإمتحان مشيت أفتح بلاغ شان كدا ما إمتحنت، و دي المرَّة الوحيدة في الكليَّة أتأخَّر و أشيل بديل الحمد لله رغم تسفاري و شغلي الكتير ما شلت مادة في الكليَّة.
نفس المعنى
في مؤلِّفين بتمسكوا لازم تقول كلامهم و في واحدين بجيبو ليك السيناريو أصلاً بقول ليك خاتِّي ليك دي كدا شان إنت تضيف، و تكون في تربيزة قراية ٣مرات الناس بتعدِّل و بتقول رأيك، و تسمع رأي غيرك، و تتفقو على حاجة معينة، أما الحوار دا بالطريقة البتريحك يعني لكين تدي نفس المعنى!
كتييير!
مثلَّت فصيح كتير تلفزيون سلسلة مع ذكية محمد عبد الله خلاف الكلية و مع غير ذكية، إذاعة فصحى و مسرح …إلخ
الرغبة أهم شي
٢٧مارس اليوم العالمي للمسرح وِلدتَ ولدي و مثَّل معاي عمره ٤ شهور
مع إنِّي من أسرة فنية إشتغلت، الرغبة كانت عندي قوية، ما بَمنع زول من أولادي يِخُش المجال (لو راغب).
النجاح ما شرط تبقى دكتور و مهندس، أي مجال تاخدو و تبدع فيو دا نجاح، و الناس ميولها مختلف، ما عندو علاقة بالشطارة ممكن تكون دكتور و ما شاطر او،حتى الناس الما إتوفَّقو ما تَمُّو قرايتهم ما معناتها ما شطار،الرغبة أهم شي.
ختاماً
كل الشكر للأستاذة إخلاص نور الدين على المساحة التي منحتها لفرفشة، و قراء فرفشة على موعد إن شاء الله مع إخلاص الكاتبة عبر مقال (وسط اللمَّة).