Ultimate magazine theme for WordPress.

أبراج فرفشة حظك كدا .. مساحة للهظار بس ما أكتر

أبراج فرفشة 1

الحمل:  المرقة من البلد مشكلة و القعاد في البلد مشكلتين، لكين شكلك كدا ح (تقعد بس#) مشكلتين مشكلتين شنو يعني؟ الشريك ذاتو منتظرك تتخارج بالمناسبة.

…………………………………………………………………….

الثور: كرامة يا (كرامة)،.. خاشي بقوة لأنك طولت ما أكلت لحمة! الكرامة و قيمي ترفض و المبادئ، وضعك مع الشريك تعبان شديد.. لكين بتصلح إن شاء الله.

…………………………………………………………………………….

الجوزاء: من التعب و الفلس العليك بقيت تشتري جوز السفنجات ( فردة فردة) الغريبة وضعك الصحي فُل ( ما شاء الله)!

………………………………………………………………………………

السرطان: إنت قايل السرطان دا في الجسم بس؟؟ الرشوة البتلهط فيها دي برضو سرطان.. المشكلة تقوم تستشري من جيبك لي جسمك.. الحبيب زعلان منك شديد!

……………………………………………………………………………..

الأسد: ضنبك رقَّ.. لانك ما اتعودت على الصيام من بدري رغم إنو جثتك كبيرة ما شاء الله، الحبيب لا يكترث بك شكلو إكتشف إنك نعامة ساكت!

………………………………………………………………………

العذراء: أعذريني الدمعة ديا ح تبقي آخر فطرة ليا.. عندك أكل سمح لرمضان اوك ما عندك… ما عندك! الحبيب مدمع عديل بي سبب مغايسك و عمايلك!

……………………………………………………………………….

الميزان: دا آخر ما توصلت ليو؟ تدينا كيلوين و تقول ديل خمسة؟ مصيبة كبرى في اتجاهها إليك.. الشريك ما جايب خبر!

……………………………………………………………………………

العقرب: تلدغ و تزوغ.. أيام عصيبة جدا في إنتظار اللَّدغتهم .. أقرأ للنهاية …. و إنتظارك!

…………………………………………………………………………….

القوس: (مرت) الأيام؟؟

……………………………………………………………………………

الجدي: السخرية هي قمة الجِديَّة .. ما تصدِّق بمزح معاك.. الشريك ذاتو ما جادي معاك.. جات علي أنا؟؟؟

………………………………………………………………………

الدلو: المدام زعلانة منك شديد، كل مرة تمشي السوق و تجيها مدلدل يديك.. أمامك فرصة أخيرة في العيد يا ظبطت الأمور يا طلعت دلدول ساي!

………………………………………………………………………..

الحوت: يعني شان رسوم الحاجات زادت خليت الرسم؟؟ أرسم و عبِّر ياخ.. الشريك بحب الشخبتة بتاعتك دي!

 

أكتــب تعليقكـ هنــــا

لن يتم نشر عنوان بريدك الإلكتروني.